Gwɛ̃ tɛ Yehova du ya mɔ hĩnga lo nzɔ̃ni. Na lo nɛ? Na lo mɛ ya lo ndo kpã bɛ lo ya se mɔ hɛ̃ tɛrɛ mɔ na gingɔ hĩngangɔ seliye tɛ lo, se mɛ lo ndo li na kpale tɛrɛ azi, dangɔ bɛ mɛ lo na ni na lo tɛ mɔ ko, mɔ na tingɔ na gwɛ̃ ti dungɔ kwa lo. Kanda mɔ lengbi ti dungɔ nvɛ̃ni kwa Nzapa? (Di Nzembo 25:14.) Ye mɛ mɔ li ti nɛngɔ ya mɔ ti kwa lo nɛ? Ngbangɔ hɛ̃ gbinya ti ahũnda mɛ wa ni kambisa nga nda mɛ dungɔ kwa Yehova adu ngbondoni aɔ dungɔ kwa azi mɛndɛ̃.

1. Ye mɛ Yehova yɔ ka ti mɔ ya mɔ li nɛ?

“Ĩ fɔ̃ tɛrɛ ĩ na Nzapa, wa Nzapa afɔ̃ nga tɛrɛ lo na ĩ.” (Zaki 4:8) Tɛnɛ mɛ vɛrsɛ olo ye tɛnɛngɔ nɛ? Yehova ndo yɔ ka ti mɔ ya mɔ ti kwa ni. Azi mɛndɛ̃ ndo da bɛ la ya ta ani lengbi ti dungɔ kwa Nzapa ma, na lo mɛ ya ta ani ndo hũ lo ma. Kanda kaya Ngbangɔ tɛnɛ tɛ lo ko, Yehova kambisa hɛ̃ e aseliye tɛ lo mɛ e na gwɛ̃ ti hĩngangɔ ni ti nɛngɔ ya e ti akwa lo. Na ngoi mɛ e ndo di tɛnɛ mɛ Nzapa tɛnɛ hɛ̃ e kaya Ngbangɔ ko, mangbi tɛ e na lo na tingɔ kpengbani abɛse du ya ta e ndo hũ lo ma.

2. Nda mɛ Yehova du nzɔ̃ kwa ɔngɔ akwa zu nɛ?

Ta zo mɛ lengbi ti yengɔ mɔ ɔngɔ Yehova da ma. Gwɛ̃ tɛ lo du ya mɔ du na dengɔ bɛ wa mɔ ndo li sambela hɛ̃ lo ngoi zu mɛ mɔ ndo du na gwɛ̃ ya lo za mɔ. Ayɔ ya “alo zu mɛ bɛ [mɔ] ndosɔ na lo ni ko, zia ni ka ti lo, ta sanga ma lo ndo [da bɛ lo na mɔ. NWT].” (1 Petro 5:7) Yehova ndo du ngoi zu dã ti zangɔ akwa lo, gbɔ̃ngɔ bɛ la, nga na mangɔ ala.​—Di Nzembo 94:18, 19.

3. Ye mɛ mɔ lengbi ti lingɔ ti nɛngɔ ya mɔ ti kwa Yehova nɛ?

Yehova ndo ye azi zu, “kanda azi ti mbilimbili la ndo du akwa lo ti kpɔ̃ bɛ lo.” (Masese 3:32) Yehova yɔ ka ti akwa lo ya, ala li kpengbani ali aye mɛ nzɔ̃ni ka lɛ lo wa ala kɛ̃ lingɔ aye mɛ lo ndo hũ ya ni du siɔni. Azi mɛndɛ̃ ndo hũ ya ta ala lengbi ti tɔndɔngɔ aye zu mɛ Nzapa yɔ ka ti la ya ala li ni ma, ta ala lengbi nga ti kɛ̃ngɔ aye zu mɛ Yehova yɔ ka ti la ya ala kɛ̃ ni ma. Kanda Yehova ndo kpã tɛrɛ lo na ndo tɛ e. Lo ndo sepala na zo ko la ye lo nvɛ̃ni wa lo ndo li zu ti hɛ̃ngɔ lo dengɔ bɛ.​—Nzembo 147:11; Awa Pangɔ Kwa 10:34, 35.

 GI HĨNGANGƆ LO MƐNDƐ̃

4. Abrahama ndó kwa Yehova

Pandɛ tɛ Abrahama (mɛ ndo ili nga lo ya Abrama) mɛ kaya Ngbangɔ ndo za e ti nɛngɔ ya e hĩnga nzɔ̃ni bere dungɔ kwa Nzapa alengbi na nɛ. Di pandɛ tɛ Abrahama mɛ kaya mbɛti ti Ebandeli 12:1-4. Wa na pɛni hɛ̃ gbinya ti ahũnda olo mɛ:

• Ye mɛndó Yehova yɔ ka ti Abrahama ya lo li nɛ?

• Kapa mɛndó Yehova ko hɛ̃ lo nɛ?

• Ye mɛ Abrahama li na ngoi mɛndó Yehova hɛ̃ lo andia nɛ?

5. Aye mɛ Yehova ndo yɔ kati akwa lo nɛ?

Na ya angoi gba, e ndo du na gwɛ̃ ya akwa e li hɛ̃ e aye mɛndɛ̃ mɛ e na gwɛ̃ ni.

• Aye mɛ mɔ ndo ye ya akwa mɔ li na lo tɛ mɔ nɛ?

Di 1 Yoanɛ 5:3, wa na pɛni hɛ̃ gbinya ti hũnda olo mɛ:

• Ye mɛ Yehova yɔ kati akwa lo ya ala li nɛ?

Ti nɛngɔ ya e tɔndɔ Yehova, ayɔ ya engbinyangbi aseliye tɛ e ná akpale mɛndɛ̃ ti ya dungɔ lɛ ngɛ̃́ tɛ e. Di Yisaya 48:17, 18, wa na pɛni hɛ̃ gbinya ti hũnda olo mɛ:

• Nda mɛ Yehova ndo yɔ ka ti akwa lo ya ala gbinyangbi seliye tɛ la nɛ?

 6. Ye mɛ Yehova ndo li na lo tɛ akwa lo

 NA NDUNU NI

Yehova ye ya mɔ ti kwa ni, wa lo nga na zangɔ mɔ ya mɔ du dã na lo.

Bozongeli

• Yehova ndo za akwa lo ngasia?

• Nda mɛ Yehova ndo yɔ ka ti akwa lo ya ala gbinyangbi aseliye tɛ la nɛ?

• Mɔ da bɛ mɔ ya ta zo lengbi ti tingɔ kwa Nzapa ma? Nda mɛ mɔ tɛnɛ ngaso nɛ?