Yehova onachuna wi nyuwaano mmusuwele phaama. Ntakhara heeni? Owo onaweherya wi vaavaa munahaalaanyu ohuserya vancipale vooloca sa mikhalelo sawe, meerelo awe, ni yookhwela awe, munahaala tho ochuna okhala nthamwene awe. Apwanne munneemererya wi ti wooweryeya okhala nthamwene a Muluku? (Mwaalakhanye Salumu 25:14.) Tiheeni munaphwanelaanyu weera wi mukhale nthamwene a Muluku? Piipiliya onnaakhula makoho yaala nave onnooniherya wi onthamwene ni Yehova echu yoochuneya munaphwanelaanyu okhalano.

1. Tiheeni Yehova onoovekeiyeeni wi mpake?

“Mwaacameleeni Muluku, yoowo onarwa awaacamelaani nyuwo.” (Tiyako 4:8) Ela enataphulela eheeni? Yehova onnoowopaani wi mukhale nthamwene awe. Wa akina onamukhala woovila weemererya wi ananwerya okhala nthamwene a Muluku nthowa nawi hanawerya omoona. Naamwi hiiha, Mmasu awe, Piipiliya, Yehova onnanooniherya ichu soothene nnaphwanelaahu osuwela vooloca sa mikhalelo sawe wi niwerye omwaacamela yoowo. Vaavaa nnaalakhanyaahu michaka sa Muluku Mpiipiliyani, onthamwene ahu ni Yehova onnannuwa naamwi nihiweryaka omoona.

2. Ntakhara heeni Yehova Nthamwene aphaama munaphwanelaanyu okhalano?

Yehova onnoosivelaani vancipale waapwaha achu akina. Owo onachuna wi nyuwaano muhakalale ni olocaka ni yoowo elukuluku vyakala munachunaanyu nikhaviheryo. Nyuwaano munanwerya “oriha wa yowo wipa murima wanyu wothene, ntakhara Yowo tanothokororyiyeni nyuwo.” (1 Pedro 5:7, NN) Ilukuluku soothene Yehova ori oorehereya waakhaviherya, waalipiha, ni waawiriyana asinthamwene awe.—Mwaalakhanye Salumu 94:18, 19.

3. Tiheeni Yehova onaweheryeiye wa asinthamwene awe?

Yehova onnaasivela achu oothene, ‘nto onniiwananano awookololowa murima.’ (Masiposipo 3:32) Yehova onaweherya wi asinthamwene awe yeereryeke opaka ichu seiyo onooneiye okhala saphaama ni osepa ichu seiyo onooneiye okhala soothanyeya. Akina anoona wi heni ewerye opaka soothene seiyo Yehova onooneiye okhala saphaama ni osepa soothene seiyo onooneiye okhala soothanyeya. Nyenya, Yehova onniiwexexa. Owo onnaweemererya oothene yaale anamusivela Yoowo ni aniilipixerya wi emuhakalalihe Yoowo.—Salumu 147:11; Saweriwa T’arummwa 10:34, 35.

 OHUSERYA MWAWIISEELA

4. Aparahamu aari nthamwene a Yehova

Yaweereya ya Mpiipiliyani vooloca sa Aparahamu (yoowo tho iichaniwa Aparamu) ennanikhaviherya wiiwexexa yeeyo enataphulela okhala nthamwene a Muluku. Mwaalakhanye vooloca sa Aparahamu mu Maphatxuwelo 12:1-4. Voocharela muthokororye makoho ala:

• Tiheeni Yehova aamvenkeiye Aparahamu wi apake?

• Tiheeni Yehova aamuroromelinheiye?

• Aparahamu aakhulenle hai sooleeliherya sa Yehova?

5. Yeeyo Yehova onaavekeiye asinthamwene awe

Mweeparipari hiyaano ninnaweherya ichu ikina wa asinthamwene ahu.

• Ichu taani ikina munachunaanyu wi asinthamwene anyu epakeke ntakhara nyuwaano?

Mwaalakhanye 1 Yohani 5:3, voocharela muthokororye nikoho nla:

• Tiheeni Yehova onaweheryeiye wa asinthamwene awe?

Wi niwerye omwiiwelela Yehova, nnaphwanela otoroka meecelo ni omuchu ahu. Mwaalakhanye Isaiya 48:17, 18, nave voocharela muthokororye nikoho nla:

• Ntakhara heeni Yehova onnaaveka asinthamwene awe opaka matorokelo?

 6. Yeeyo Yehova onapakeiye wa asinthamwene awe

 MUKWASU

Yehova onachuna wi mukhale Nthamwene awe, nave onahaala wookhaviheryaani omwaacamela.

Makoho awuuluulela

• Yehova onaakhaviherya hai asinthamwene awe?

• Ntakhara heeni Yehova onnaahusiha asinthamwene awe opaka matorokelo?

• Mano, munuupuwela wi Yehova onnawehererya sincipale wa asinthamwene awe? Waakhanle wi aa ntakhara heeni, naari waakhanle wi hooye ntakhara heeni?