FAKAAKOAGA 08
Eke a Koe mo Kapitiga ha Iehova
Manako a Iehova ki a koe ke iloa mitaki a ia. Ko e ha? Amanaki a ia ka iloa lahi e koe e aga, tau puhala, mo e finagalo haana, to manako lahi foki a koe ke eke mo kapitiga haana. Maeke mooli nakai a koe ke eke mo kapitiga he Atua? (Totou Salamo 25:14.) Ko e heigoa ka taute e koe ke eke mo kapitiga haana? Tali he Tohi Tapu e tau hūhū ia mo e fakakite e kakano kua mua e aoga he fakafetuiaga kapitiga haau mo Iehova.
1. Ko e heigoa ne uiina e Iehova a koe ke taute?
“Kia fakatata atu a mutolu ke he Atua, ti fakatata mai ai a ia kia mutolu.” (Iakopo 4:8) Ko e heigoa e kakano he mena nei? Uiina e Iehova a koe ke eke mo kapitiga haana. Liga uka e falu ke manamanatu ke eke mo kapitiga he taha ne nakai kitia e lautolu, mua atu ke he Atua. Ka e fakakite mai e Iehova he Kupu haana ko e Tohi Tapu e tau mena oti kua lata a tautolu ke iloa hagaao ke he aga haana ke maeke a tautolu ke fakatata ki a ia. Ka totou e tautolu e fekau he Atua i loto he Tohi Tapu to tupu e fakafetuiaga ha tautolu mo Iehova pete kua nakaila kitia e tautolu a ia.
2. Ko e ha ko e Kapitiga uho a Iehova kua moua e koe?
Ko Iehova ni tokotaha kua mua atu e fakaalofa ki a koe. Manako a ia ki a koe ke fiafia ti tutala ki a ia he magaaho kua manako lagomatai a koe. Maeke a koe ke “tuku atu kia ia e tau mena oti kua fakaatukehe ai . . . ha ko e mena kua manatu e ia” a koe. (1 Peteru 5:7) Mautali tumau a Iehova ke lalago, fakamafana, mo e fanogonogo ke he tau kapitiga haana.—Totou Salamo 94:18, 19.
3. Ko e heigoa ne amanaki a Iehova ke taute he tau kapitiga haana?
Fakaalofa a Iehova ke he tau tagata oti, “ka kua feofanaki a ia mo lautolu ne mahani hakohako.” (Tau Fakatai 3:32) Amanaki a Iehova ke he tau kapitiga haana ke lali ke taute e tau mena kua onoono a ia ki ai kua mitaki mo e kalo kehe he tau mena kua manatu a ia kua kelea. Logona hifo he falu kua liga nakai maeke a lautolu ke momoui fakatatau ke he tau tuaga mitaki ha Iehova mo e kalo kehe he tau mena kelea oti. Ka e fakaalofa hofihofi noa a Iehova. Talia e ia e tau tagata oti kua fakaalofa mooli ki a ia mo e eketaha ke taute e tau mena ke fakafiafia a ia.—Salamo 147:11; Gahua 10:34, 35.
KUMIKUMI FAKAHOKULO
Fakaako foki ke he puhala ka eke a koe mo kapitiga ha Iehova mo e iloa e kakano ko ia e Kapitiga uho kua moua e koe.
4. Ko Aperahamo ko e kapitiga ha Iehova
Ko e tala he Tohi Tapu ki a Aperahamo (ne ui foki ko Aperamo) kua moua e tautolu e maama ke he kakano ke eke mo kapitiga he Atua. Totou hagaao ki a Aperahamo he Kenese 12:1-4. Ti tutala ke he tau hūhū nei:
-
Ko e heigoa ne tala age e Iehova ki a Aperahamo ke taute?
-
Ko e heigoa ne mavehe e Iehova ki a ia?
-
Tali atu fēfē a Aperahamo ke he tau fakatonuaga ha Iehova?
5. Tau mena kua amanaki a Iehova mai he tau kapitiga haana
Fa fai mena ne amanaki a tautolu ke taute he tau kapitiga ha tautolu.
-
Ko e heigoa falu mena kua manako a koe ke he tau kapitiga haau ke taute ma haau?
Totou 1 Ioane 5:3, ti tutala ke he hūhū nei:
-
Ko e heigoa kua amanaki a Iehova mai he tau kapitiga haana?
Ke omaoma ki a Iehova, lata a tautolu ke hiki e mahani po ke aga ha tautolu. Totou Isaia 48:17, 18, ti tutala ke he hūhū nei:
-
Ko e ha ne tala age a Iehova ke he tau kapitiga haana ke taute e tau hikiaga?
Ko e kapitiga mitaki ka fakamanatu ki a tautolu e tau mena ka puipui mo e aoga ki a tautolu. Taute pihia foki e Iehova ke he tau kapitiga haana
6. Tau mena ne taute e Iehova ma e tau kapitiga haana
Lagomatai e Iehova e tau kapitiga haana ke fahia ke he tau lekua. Tā e VITIŌ, ti tutala ke he hūhū nā.
-
Lagomatai fēfē e Iehova e fifine he vitiō ke fehagai mo e tau manatu mo e tau logonaaga kelea haana?
Totou Isaia 41:10, 13, ti tutala ke he tau hūhū nei:
-
Ko e heigoa ne mavehe e Iehova ke taute ma e tau kapitiga oti haana?
-
Ko Iehova nakai e Kapitiga mitaki he manatu e koe? Ko e ha?
Lagomatai he tau kapitiga tata a koe ka manako a koe ki ai. To lagomatai foki e Iehova a koe
7. Ko e fakafetuiaga mo Iehova kua putoia e fetutalaaki
Fakamalolō he fetutalaaki e pipiaga he tau kapitiga. Totou Salamo 86:6, 11, ti tutala ke he tau hūhū nei:
-
Tutala fēfē a tautolu ki a Iehova?
-
Tutala fēfē a Iehova ki a tautolu?
Tutala a tautolu ki a Iehova he liogi; tutala a ia ki a tautolu puhala he Tohi Tapu
PEHĒ FALU TAGATA: “Nakai maeke ke tata ke he Atua.”
-
Ko e heigoa e kupu tohi ka fakaaoga e koe ke fakakite kua maeke a tautolu ke eke mo kapitiga ha Iehova?
MANATU KATOA
Manako a Iehova ke eke mo Kapitiga haau, mo e to lagomatai e ia a koe ke fakatata ki a ia.
Liu Fakamanatu
-
Lagomatai fēfē e Iehova e tau kapitiga haana?
-
Ko e ha kua tala age a Iehova ke he tau kapitiga haana ke taute e tau hikiaga?
-
Lahi kia e mena ne amanaki a Iehova mai he tau kapitiga haana he manatu e koe? Ko e ha ne manatu pihia a koe, po ke ko e ha ne nakai manatu pihia a koe?
KUMI FOKI
Maeke fēfē e kapitiga mo e Atua ke lauia e moui haau?
“Iehova—Ko e Atua kua Lata Mooli ke Iloa” (Vala tala he Kolo Toko)
Fakaako ke feaki e kapitiga mo e Atua.
Kumikumi e kakano kua logona hifo he taha fifine ko e kapitiga haana mo Iehova ne fakahao a ia.
Fanogonogo ke he tau fuata mui he talahau e tau logonaaga ha lautolu hagaao ki a Iehova.