MUTU 08
Mwewo mungankhale shamwali wa Yehova
Yehova ofuna kuti mwewo mumuziŵe luweme. Ndaŵa yanji? Yove oyembekezela kuti keno mungaphunzile vinyinji vokhuza umunthu wake, njila zake na cholinga chake muzankhale ofunishisha kunkhala shamwali wake. Kansi mwewo mukhulupilila kuti vingakwanishike kunkhala shamwali wa Mulungu? (Ŵelengani Salimo 25:14.) Kansi mwewo mungachite chinji kuti munkhale shamwali wake? Baibolo yuyankha makonsho amene aŵa ndipo yufotokoza chifukwa chake kunkhala pa ushamwali na Yehova ni chinthu chofunika ngako kupambana chinthu chilichonse.
1. Kansi Yehova okusengani kuti muchite chinji?
“Vwendelani kuli Mulungu, ndipo yove naye akuvwendeleni.” (Yakobo 4:8) Kansi vamene ivi vutanthauza chinji? Ivi vutanthauza kuti Yehova okuitani mwewo kuti munkhale shamwali wake. Kuli ayakine vingankhale vovuta kukhulupilila kuti angankhale shamwali wa Mulungu chifukwa chakuti okwanishalini kumuwona. Koma, m’Mawu ŵake Baibolo, Yehova otiululila vinthu vonse vatufunikila kuziŵa vokhuza umunthu wake kuti tinkhale naye pafupi. Tikoŵelenga uthenga wa Mulungu m’Baibolo, tutang’isha ushamwali wasu na Yehova olo kuti tikaliye muwonapo.
2. Ndaŵa yanji Yehova ni shamwali muweme wamungankhale naye?
Paliye munthu aliyense okukondani ngako kupambana Yehova. Yove ofuna kuti mwewo munkhale osangalala komasoti mukosakila thandizo yake nthawe iliyonse yamungafukile thandizo. Mungachite vamene ivi “pamumutulila nkhaŵa zanu zonse, pakuti yove okudelani nkhaŵa.” (1 Petulo 5:7) Nthawe zonse Yehova niwokonzeka kuyavya, kulimbikisa komasoti kumvwishila azishamwali ŵake.—Ŵelengani Salimo 94:18, 19.
3. Ponkhala azishamwali a Yehova, kansi yove ofuna kuti tikochita chinji?
Yehova okonda ŵanthu onse, “koma okonda ngako munthu wokhulupilika.” (Miyambo 3:32) Yehova ofuna kuti azishamwali ŵake akoyeja-yeja kuchita vinthu vakuwona yove kuti ni viweme komasoti akopewa vinthu vakuwona yove kuti ni viipa. Ayakine oganiza kuti angakwanishelini kukonkheja malamulo a Yehova okhuza chiweme na chiipa. Komalomba, Yehova ni wachifundo. Yove olondela Aliyense omukonda chendi komasoti ŵala oyeja-yeja kuti akomukondwelesha.—Salimo 147:11; Machitidwe 10:34, 35.
VATI TIPHUNZILE
Phunzilani vinyinji vokhuza mwamungachitile kuti munkhale shamwali wa Yehova, komasoti chifukwa chake yove ni shamwali muweme wamungankhale naye.
4. Abulahamu enze shamwali wa Yehova
Nkhani ya m’Baibolo ya Abulahamu (wamene enzeitiwasoti kuti Abulamu) yutipasa chithunzi cha tanthauzo yonkhala shamwali na Mulungu. Ŵelengani vokhuza Abulahamu pa Genesis 12:1-4. Ndipo pavuli pake mukambilane makonsho aŵa:
-
Kansi Yehova emusenga kuti achite chinji Abulahamu?
-
Kansi Yehova emulonjeza chinji Abulahamu?
-
Kansi Abulahamu echita chinji?
5. Kansi Yehova ofuna kuti azishamwali ŵake akochita chinji?
Nthawe ziyakine tuyembekezela vinthu kufumila kuli ayasu.
-
Kansi ni vinthu votyani vamungakonde kuti muyanu kuti akuchitileni?
Ŵelengani 1 Yohane 5:3, ndipo pavuli pake mukambilane konsho iyi:
-
Kansi Yehova ofuna chinji kuli azishamwali ŵake?
Kuti timvwile Yehova, payakine tingafunike kuchinja nkhalidwe yasu olo umunthu wasu. Ŵelengani Yesaya 48:17, 18, ndipo mukambilane konsho iyi:
-
Ndaŵa yanji Yehova osenga azishamwali ŵake kuti okochinja umunthu wawo?
Shamwali muweme otiyavya potipasa malangizo angatiteteze komasoti angatipindulishe. Yehova ochitasoti chimozi-mozi kuli azishamwali ŵake
6. Vakuchita Yehova poyavya azishamwali ŵake
Yehova oyavya azishamwali ŵake kuti akopilila mavuto. Lolelani VIDIYO, ndipo pavuli pake mukamnbilane konsho yokonkhapo.
-
Kansi Yehova wamuyavya tyani mwanakazi watalolela mu vidiyo yamene iyi kuti alimbane na maganizo ŵake olakwika?
Ŵelengani Yesaya 41:10, 13, ndipo pavuli pake mukambilane makonsho aŵa:
-
Kansi Yehova walonjeza kuŵachitila chinji azishamwali ŵake?
-
Kansi muganiza kuti Yehova angankhale Shamwali muweme? Keno n’tetyo ndaŵa yanji?
Azishamwali ngawo-gawo oyavyana nthawe zonse pakafunikila thandizo. Yehova naye akokuyavyani
7. Kuti tinkhale pa ushamwali na Yehova, tufunika kulaŵila naye komasoti kumumvwila
Keno azishamwali olaŵijana pafupi-pafupi, ushamwali wawo unkhala wotang’a ngako. Ŵelengani Salimo 86:6, 11, ndipo pavuli peke mukambilane makonsho aŵa:
-
Kansi tingalaŵile naye tyani Yehova?
-
N’nga kansi Yehova olaŵila nase tyani?
Tulaŵila na Yehova kupitila mpemphelo; ndipo yove olaŵila nase kupitila m’Baibolo
ŴANTHU AYAKINE ONENA KUTI: “N’vosakwanishika kunkhala shamwali wa Mulungu.”
-
Kansi ni lemba yotyani yamungakatishile ntchito powonesha kuti vingakwanishike kunkhala shamwali wa Yehova?
MFUNDO ZACHIDULE
Yehova ofuna kuti tinkhale Shamwali wake, ndipo yove azatiyavye kuti tinkhale naye pafupi.
Makonsho oweleja
-
Kansi Yehova oŵayavya tyani azishamwali ŵake?
-
Ndaŵa yanji Yehova olangiza azishamwali ŵake kuti akochinja vinthu pa moyo?
-
Kansi muganiza kuti ni kovuta kunkhala shamwali wa Yehova? Ndaŵa yanji?
PHUNZILANI VINYINJI
Kansi kunkhala pa ushamwali na Mulungu kungachinje tyani moyo wanu?
“Yehova—Niye Mulungu wofunika kuti timuziŵe” (Nsanja ya Olonda, 15 February, 2003)
Phunzilani mwamungankhalile shamwali wa Mulungu.
Onani chifukwa chichitisha mwanakazi muyakine kuwona kuti ushamwali wake na Yehova wipulumusa moyo wake.
Tetekelani vakufotokoza achilumbwana ayakine vokhuza Yehova.
Kansi kunkhala shamwali wa Mulungu kutanthauza chinji? (1:46)
