THUTO 08
O ka ba Mogwera wa Jehofa
Jehofa o nyaka gore o mo tsebe gakaone. Ka baka la’ng? O a tseba gore ge re ka ithuta ka mo go oketšegilego ka dika tša gagwe, ra ithuta gore o dira dilo bjang le gore o nyaka gore re dire eng, re tlo nyaka go ba bagwera ba gagwe. Eupša, na go a kgonega gore o be mogwera wa Modimo? (Bala Psalme 25:14.) O ka dira’ng gore o be mogwera wa Modimo? Beibele e araba dipotšišo tše, e bile e re botša gore ke ka baka la eng go ba mogwera wa Modimo, go phala go ba mogwera wa motho le ge e le ofe.
1. Jehofa o go mema gore o dire eng?
Beibele e re: ‘Batamela Modimo, gomme le yena o tla go batamela.’ (Jakobo 4:8) Lengwalo le le ra go re’ng? Le ra gore Jehofa o go mema gore o be mogwera wa gagwe. Batho ba bangwe ba bona okare ga go kgonege gore re be bagwera ba Modimo, ka gore ga re kgone go mmona. Eupša ka Lentšung la gagwe e lego Beibele, Jehofa o re botša selo le ge e le sefe seo re swanetšego go se tseba ka dika tša gagwe, e le gore re kgone go ba bagwera ba gagwe. Ge re ithuta ka Modimo ka Beibeleng, segwera sa rena le yena se tlo gola le ge re sa nka ra mmona.
2. Ke ka baka la eng Jehofa e ka ba mogwera wa nnete yoo o ka bago le yena?
Ga go na motho yo a go ratago kudu go swana le Jehofa. O nyaka gore o thabe, e bile o nyaka gore o mmotše ge o hloka thušo. Beibele e re: ‘Lahlela dipelaelo tša gago ka moka go Modimo, gobane o a go hlokomela.’ (1 Petro 5:7) Ka mehla, Jehofa o dula a ikemišeditše go thekga bagwera ba gagwe, go ba homotša, le go ba theetša.—Bala Psalme 94:18, 19.
3. Jehofa o nyaka gore o dire eng gore o be mogwera wa gagwe?
Jehofa o rata batho ka moka, ‘eupša o gwerana kudu le baloki.’ (Diema 3:32) O nyaka gore bagwera ba gagwe ba leke go dira dilo tšeo yena a di bonago di lokile, gomme ba se dire dilo tšeo di sego tša loka. Batho ba bangwe ba bona okare ba ka se kgone go phela ka melao ya Jehofa. Eupša Modimo o a re kwešiša. O amogela batho ka moka bao ba mo ratago kudu, e bile ba šoma ka thata gore ba mo thabiše.—Psalme 147:11; Ditiro 10:34, 35.
ITHUTE KA MO GO TSENELETŠEGO
Ithute ka mo go oketšegilego gore o ka dira eng gore o be mogwera wa Jehofa, le gore ke ka baka la eng e le mogwera yo mokaonekaone yoo o ka bago le yena.
4. Aborahama o ile a ba mogwera wa Jehofa
Beibele e re botša ka Aborahama, yoo gape a bego a bitšwa Aborama, go re thuša go kwešiša gore go bolela eng go ba mogwera wa Modimo. Balang ka Aborahama go Genesi 12:1-4. Ke moka le boledišaneng ka dipotšišo tše di latelago:
-
Jehofa o ile a kgopela Aborahama gore a dire’ng?
-
O ile a mo tshepiša’ng?
-
Aborahama yena o ile a dira’ng?
5. Jehofa o kgopela bagwera ba gagwe gore ba dire eng?
Gantši ge re na le bagwera, re letetše gore ba re thuše ka dilo tše itšego.
-
Ke dilo dife tše dingwe tšeo wena o nyakago bagwera ba gago ba go direla tšona?
Balang 1 Johane 5:3, gomme le boledišaneng ka potšišo e latelago:
-
Jehofa o nyaka gore bagwera ba gagwe ba dire’ng?
Re ka swanelwa ke go fetoša mekgwa ya rena goba tsela yeo re itshwarago ka yona. Balang Jesaya 48:17, 18, gomme le boledišaneng ka potšišo e latelago:
-
Ke ka baka la’ng Jehofa a kgopela bagwera ba gagwe gore ba fetoše tsela yeo ba itshwarago ka yona?
Mogwera wa nnete o go botša gore o dire dilo tšeo di ka go šireletšago le tšeo di ka go thušago. Jehofa le yena o dira se se swanago go bagwera ba gagwe
6. Jehofa o thuša bagwera ba gagwe bjang?
Jehofa o thuša bagwera ba gagwe gore ba kgone go rarolla mathata a bona. Bapalang BIDIO ye, gomme le boledišaneng ka potšišo e latelago:
-
Jehofa o thušitše bjang mosadi wa mo bidiong ye go lebeletšana le bothata bjo a nago le bjona, bja go nagana ka dilo tše bohloko tšeo di kilego tša mo diragalela?
Balang Jesaya 41:10, 13, gomme le boledišaneng ka dipotšišo tše di latelago:
-
Jehofa o tshepiša bagwera ba gagwe ka moka gore o tlo ba direla’ng?
-
Na o nagana gore Jehofa e ka ba mogwera yo mokaone? Ke ka baka la’ng o re’alo?
Bagwera bao ba go ratago ba a go thekga ge o hloka thušo. Jehofa le yena o tla go thuša
7. E le gore re be bagwera ba Jehofa, re swanetše go bolela le yena le go mo theetša
Ge bagwera ba boledišana, seo se dira gore ba tshepane kudu. Balang Psalme 86:6, 11, gomme le boledišaneng ka dipotšišo tše di latelago:
-
Re ka bolela bjang le Jehofa?
-
Jehofa yena o bolela le rena bjang?
Re bolela le Jehofa ka go mo rapela, gomme yena o bolela le rena a diriša Beibele
BATHO BA BANGWE BA RE: “Ga go kgonege gore re be bagwera ba Modimo.”
-
Wena o ka ba bontšha lengwalo lefe leo le bontšhago gore go a kgonega gore re be bagwera ba Jehofa?
O ITHUTILE ENG?
Jehofa o nyaka gore o be mogwera wa gagwe, e bile o tla go thuša gore o dire seo.
Dipotšišo
-
Jehofa o thuša bagwera ba gagwe bjang?
-
Ke ka baka la’ng Jehofa a botša bagwera ba gagwe gore ba fetoše tsela yeo ba itshwarago ka yona?
-
Na o nagana gore Jehofa o re kgopela go dira dilo tšeo re ka se kgonego go di dira? Ke ka baka la’ng o re’alo?
ITHUTE KA MO GO OKETŠEGILEGO
Go ba mogwera wa Jehofa go ka go thuša bjang?
“Jehofa Modimo yo a Swanelwago ke go Tsebja” (Morokami wa February 15, 2003.)
Ekwa gore o ka dira eng gore o be mogwera wa Modimo.
“Nka ba Mogwera wa Modimo Bjang?” (Dipotšišo tša Bafsa le Dikarabo tše Šomago, Bolumo 2, kgaolo 35)
Ekwa gore ke ka baka la eng mosadi yo mongwe a boletše gore go ba mogwera wa Modimo go fetošitše bophelo bja gagwe.
Ekwa gore bafsa ba bangwe ba re ba ikwa bjang ka go ba bagwera ba Jehofa.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
