PFUNZIRO 08
Imwepo Mungakhale Xamwali wa Yahova
Yahova akufuna kuti mumudziwe bwino. Thangwe ranyi? Iye akudikhira kuti mukapfunza bzizinji bza makhalidwe yace, njira zace na bzomwe iye ambafuna, mun’dzafuna kukhala naye pa uxamwali. Kodi imwepo mungakhaledi xamwali wa Mulungu? (Werengani Salimo 25:14.) Kodi n’ciyani comwe mungacite kuti mukhale xamwali wace? Bibliya limbatawira mibvunzo imweyi ndipo limbalatiza thangwe race kukhala pa uxamwali na Yahova n’kwakufunika kwene-kwene kuposa uxamwali bomwe mungakhale nabo na munthu ali-wentse.
1. Kodi Yahova akufuna kuti mucite ciyani?
“Fendererani Mulungu ndipo iye an’dzakufendereranimbo.” (Tiyago 4:8) Kodi bzimwebzi bzimbathandauza ciyani? Yahova akufuna kuti mukhale xamwali wace. Wanthu winango bzimbawanesa kukhala pa uxamwali na munthu omwe akanati kumuwona, tsono tani kukhala pa uxamwali na Mulungu. Mu Fala lace, Bibliya, Yahova ambalewa bzinthu bzentse bzomwe tikufunikira, kuti tidziwe unthu bwace bzomwe bzingatithandize kukhala pa uxamwali bwakulimba na iye. Tikambawerenga mafala ya Mulungu mʹBibliya, uxamwali bwathu na iye bumbalimba napo tikanati kumuwona.
2. Thangwe ranyi Yahova ni Xamwali wabwino omwe imwepo mungakhale naye?
Palibe munthu ali-wentse omwe ambakufunani kuposa Yahova. Iye akufuna kuti imwepo mumbakhale wakukondwa nakuti nthawe zentse mukafuna thandizo mumbamuuze. Imwepo mungamutulire “thupo lanu lentse, thangwe iye ambakukonkhobzani.” (1 Pedru 5:7) Yahova ngwakukonzeka kuthandiza, kutsangalaza na kutetekera axamwali wace.—Werengani Salimo 94:18, 19.
3. N’ciyani comwe Yahova ambafuna kuna axamwali wace?
Yahova ambafuna wanthu wentse, “tsono Iye ambafuna maka-maka munthu wakulungama.” (Mimwani 3:32) Yahova ambafuna kuti axamwali wace ambacite bzinthu bzomwe iye ambabziwona kuti mpsabwino acimbawenga bzomwe iye ambabziwona kuti mpsakuipa. Wanthu winango ambawona kuti angakwanise lini kuteweza malamulo ya Yahova yakulewa bza kusiyanisa cabwino na cakuipa. Tsono dziwani kuti Yahova ngwantsisi, ndipo ambabvuma munthu ali-wentse omwe ambamufuna na kucita bzinthu bzabwino kuti amukondwese.—Salimo 147:11; Mabasa 10:34, 35.
FUFUDZANI BZINANGO
Pfunzani bzinango bzomwe bzingakuthandizeni kukhala xamwali wa Yahova, ndipo zindikirani thangwe ranyi iye ni xamwali wabwino kwene-kwene kuposa omwe mungakhale nawo.
4. Abalahamu akhali xamwali wa Yahova
Nkhani ya Abalahamu (omwe akhacemeredwambo Abalamu) imbatithandiza kuwona thandauzo la kukhala xamwali wa Mulungu. Werengani nkhani ya Abalahamu pa Genesesi 12:1-4. ndipo mukamala cezeranani mibvunzo ikutewerayi:
-
Kodi Yahova adakumbira Abalahamu kuti acite ciyani?
-
Kodi Yahova adamuuza kuti an’dzamucitira ciyani?
-
Kodi Abalahamu adabvera bzomwe Yahova adamuuza?
5. Kodi Yahova ambafuna kuti axamwali wace acite ciyani?
Ifepano timbafuna kuti axamwali wathu ambaticitire bzinthu bzabwino.
-
Kodi imwepo mumbafuna kuti axamwali wanu akucitireni bzinthu bziponi?
Werengani 1 Juwau 5:3, ndipo mukamala cezeranani mbvunzo wakutewerayu:
-
Kodi Yahova ambafuna kuti axamwali wace ambacite ciyani?
Kuti timbabvere Yahova, tin’funika kucinja makhalidwe yathu. Werengani Zaiya 48:17, 18, ndipo mukamala cezeranani mbvunzo wakutewerayu:
-
Thangwe ranyi Yahova ambafuna kuti axamwali wace acinje?
Xamwali wabwino angatikumbuse bzinthu bzomwe bzingatikhotcerere na kutibweresera phindu. Yahova ambacitambo bzibodzi-bodzibzi kuna axamwali wace
6. Kodi n’ciyani comwe Yahova ambacita kuna axamwali wace?
Yahova ambathandiza axamwali wace kuti apirire akagumana na mabvuto. Onani VIDIYO, ndipo mukamala cezeranani mbvunzo wakutewerayu.
-
Mu vidiyo yomwe mwawonayi, kodi Yahova adathandiza tani mkazi munango kukunda makumbukidwe yace yakuphonyeka?
Werengani Zaiya 41:10, 13, ndipo mukamala cezeranani mibvunzo ikutewerayi:
-
N’ciyani comwe Yahova akufuna kucitira axamwali wace wentse?
-
Kodi mukukumbuka kuti Yahova angakhale xamwali wabwino? Thangwe ranyi?
Xamwali wa ponda ndipondembo ambakuthandizani mukafunikira thandizo. Yahova ankuthandizanimbo
7. Kukhala pa uxamwali na Yahova kumbaphatanidza kulewalewa naye
Kuti wanthu akhale pa uxamwali bwakulimba ambafunika kulewalewana. Werengani Salimo 86:6, 11, ndipo mukamala cezeranani mibvunzo ikutewerayi:
-
Kodi ifepano tingalewelewe tani na Yahova?
-
Kodi Yahova ambalewalewa tani na ifepano?
Timbalewalewa na Yahova mu mpembo; ndipo iye ambalewalewa na ifepano mwakuphatisa basa Bibliya
WANTHU WINANGO AMBALEWA KUTI: “Bzingakwanisike lini kukhala pa uxamwali bwakulimba na Mulungu.”
-
Kodi ni cinembo ciponi comwe mungaphatise basa comwe cimbalatiza kuti ifepano tingakhale pa uxamwali na Yahova?
KODI MWAPFUNZA CIYANI?
Yahova akufuna kuti akhale xamwali wanu, ndipo iye ankuthandizani kuti mukhale pa uxamwali bwakulimba na iye.
Mibvunzo yakubwerezera
-
Kodi Yahova ambathandiza tani axamwali wace?
-
Thangwe ranyi Yahova ambafuna kuti axamwali wace acinje?
-
Kodi imwepo mukukumbuka kuti Yahova ambafuna kuti axamwali wace acite bzinthu bzomwe angakwanise lini? Penu munti inde thangwe ranyi? Penu munti ne thangwe ranyi?
ONANI POMWE IBZI
Kodi kukhala pa uxamwali na Mulungu kwacinja tani moyo wanu?
“Yahova ni Mulungu Omwe An’funika Kudziwidwa” (Ntsanza ya Mulindiri ya 15 Fevereiro, 2003)
Onani momwe mungakulisire uxamwali bwanu na Yahova.
Onani thangwe race mkazi munango adawona kuti kukhala pa uxamwali na Yahova kudamupulumusa.
Bvani bzomwe maswaka yakulewa bza Yahova.
Kodi Kukhala Xamwali wa Mulungu Kumbathandauza Ciyani? (1:46)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
