ƐZUKOALƐDEƐ 08
Ɛbahola Wɔayɛ Gyihova Agɔnwo
Gyihova kulo kɛ ɛnwu ye kpalɛ. Duzu ati ɔ? Ɔze kɛ mekɛ mɔɔ ɛlɛsukoa ye subane, kɛzi ɔyɛ ye ninyɛne yɛɛ ye bodane ne anwo ninyɛne dɔɔnwo la, ɛbahulo kɛ ɛbayɛ ɔ gɔnwo. Ɛdie ɛdi kɛ ɛbahola wɔayɛ Nyamenle agɔnwo amgba ɔ? (Kenga Edwɛne 25:14.) Duzu a ɛbahola wɔayɛ amaa wɔayɛ ɔ gɔnwo a? Baebolo ne bua kpuya ɛhye mɔ yɛɛ ɔkile deɛmɔti Gyihova a le agɔnwolɛ kpalɛ mɔɔ tɛla biala la.
1. Duzu a Gyihova se ɛyɛ a?
“Bɛbikye Nyamenle, na ɔbabikye bɛ.” (Gyemise 4:8) Ɛhye kile duzu? Gyihova se ɛrayɛ ɔ gɔnwo. Bie mɔ die di kɛ ɔyɛ se kɛ bɛbahola bɛayɛ Nyamenle agɔnwo ɔluakɛ bɛnnwu ye. Noko, Gyihova ɛmaa yɛnwu ye subane ne anwo debie biala wɔ Baebolo ne anu amaa yɛahola yɛabikye ye. Saa yɛkenga Nyamenle edwɛkɛ ne mɔɔ wɔ Baebolo ne anu la a, agɔnwolɛvalɛ mɔɔ yɛ nee Gyihova lɛ la anu bamia ɔnva nwo kɛ yɛtɛnwunle ye ɛlɛ la.
2. Duzu ati a Gyihova a le Agɔnwolɛ kpalɛ mɔɔ tɛla biala a?
Awie biala ɛngulo wɔ edwɛkɛ ɛndɛla Gyihova. Ɔkulo kɛ ɛ nye die na ɛka wɔ edwɛkɛ ɛkile ye wɔ mekɛ biala mɔɔ ɛhyia moalɛ la. Ɛbahola ‘wɔavuandi wɔ adwenleadwenle muala wɔagua ɔ nwo zo ɔluakɛ ɔdwenle ɛ nwo.’ (1 Pita 5:7) Gyihova ɛziezie ɔ nwo kɛ ɔbaboa ɔ gɔnwo mɔ, yeakyekye bɛ rɛle na yeadie bɛ mekɛ biala.—Kenga Edwɛne 94:18, 19.
3. Duzu a Gyihova kpondɛ kɛ ɔ gɔnwo mɔ yɛ a?
Gyihova kulo menli kɔsɔɔti, “noko Ɔ nee tenlenema nyia agɔnwolɛvalɛ kyengye.” (Mrɛlɛbulɛ 3:32) Gyihova kpondɛ kɛ ɔ gɔnwo mɔ yɛ ninyɛne mɔɔ ɔbu ye kɛ ɔle kpalɛ la na bɛtwe bɛ nwo bɛfi ninyɛne mɔɔ ɔse ɔnle kpalɛ la anwo. Bie mɔ te nganeɛ kɛ bɛnrɛhola bɛnrɛyɛ ninyɛne mɔɔ Gyihova kpondɛ kɛ bɛyɛ la amuala yɛɛ bɛnrɛhola bɛnrɛgyakyi debie biala mɔɔ ɔse ɔnle kpalɛ la. Noko, Gyihova se anwunvɔne. Ɔdie awie biala mɔɔ kulo ye na ɔbɔ mɔdenle ɔyɛ mɔɔ sɔ ɔ nye la ɔto nu.—Edwɛne 147:11; Gyima ne 10:34, 35.
SUKOA DƆƆNWO
Sukoa kɛzi ɛbahola wɔayɛ Gyihova agɔnwo la anwo debie dɔɔnwo na nea deɛmɔti ɔle Agɔnwolɛ kpalɛ mɔɔ tɛla biala la.
4. Ɛnee Ebileham le Gyihova agɔnwo
Ebileham (eza bɛfɛlɛ ye Ebilam) anwo edwɛkɛ mɔɔ wɔ Baebolo ne anu la maa yɛte mɔɔ kile kɛ awie le Nyamenle agɔnwo la abo. Kenga Ebileham anwo edwɛkɛ mɔɔ wɔ Gyɛnɛsese 12:1-4 la. Na akee bɛzuzu kpuya ɛhye mɔ anwo:
-
Duzu a Gyihova hanle hilele Ebileham kɛ ɔyɛ a?
-
Duzu a Gyihova vale bɔle ye ɛwɔkɛ a?
-
Duzu a Ebileham yɛle ye wɔ Gyihova edwɛkɛ ne anwo a?
5. Mɔɔ Gyihova anye la kɛ ɔ gɔnwo mɔ bayɛ la
Yɛ nye la kɛ yɛ gɔnwo mɔ bayɛ ninyɛne bie mɔ.
-
Ninyɛne mɔɔ ɛkulo kɛ ɛ gɔnwo mɔ yɛ maa wɔ la bie mɔ a le boni?
Kenga 1 Dwɔn 5:3, na akee bɛzuzu kpuya ɛhye anwo:
-
Duzu a Gyihova anye la kɛ ɔ gɔnwo mɔ bayɛ a?
Amaa yɛadie Gyihova la, bie a ɔwɔ kɛ yɛkakyi yɛ subane anzɛɛ yɛ nyɛleɛ. Kenga Ayezaya 48:17, 18, na akee bɛzuzu kpuya ɛhye anwo:
-
Duzu ati a Gyihova kulo kɛ ɔ gɔnwo mɔ yɛ nzenzaleɛ a?
Agɔnwolɛ kpalɛ kakye yɛ ninyɛne mɔɔ yɛyɛ a ɔbabɔ yɛ nwo bane na yeaboa yɛ la. Gyihova yɛ zɔhane ala maa ɔ gɔnwo mɔ
6. Mɔɔ Gyihova yɛ maa ɔ gɔnwo mɔ la
Gyihova boa ɔ gɔnwo mɔ maa bɛgyinla bɛ ngyegyelɛ nloa. Ye VIDIO ne, na akee bɛzuzu kpuya ɛhye anwo.
-
Kɛzi Gyihova boale raalɛ ne mɔɔ wɔ vidio ne anu la maanle ɔgyinlanle adwenleadwenle mɔɔ maa ɔdi nyane la anloa ɛ?
Kenga Ayezaya 41:10, 13, na akee bɛzuzu kpuya ɛhye mɔ anwo:
-
Duzu a Gyihova ɛbɔ ɛwɔkɛ kɛ ɔbayɛ yeamaa ɔ gɔnwo mɔ amuala a?
-
Ɛnea a Gyihova bayɛ Agɔnwolɛ kpalɛ ɔ? Duzu ati ɔ?
Agɔnwolɛ kpalɛ boa wɔ wɔ mekɛ mɔɔ ɛhyia moalɛ la. Gyihova noko baboa wɔ
7. Gyihova agɔnwo mɔ nee ye tendɛ
Adwelielilɛ maa agɔnwolɛvalɛ nu mia. Kenga Edwɛne 86:6, 11, na akee bɛzuzu kpuya ɛhye mɔ anwo:
-
Kɛzi yɛbahola yɛadendɛ yɛahile Gyihova ɛ?
-
Kɛzi Gyihova nee yɛ tendɛ ɛ?
Yɛdua asɔneyɛlɛ zo yɛtendɛ yɛkile Gyihova; ɔdua Baebolo ne azo ɔtendɛ ɔkile yɛ
BIE MƆ KA KƐ: “Yɛnrɛhola yɛnrɛyɛ Nyamenle agɔnwo.”
-
Baebolo tɛkese boni a ɛbava wɔaboa awie wɔamaa yeanwu kɛ yɛbahola yɛayɛ Gyihova agɔnwo a?
EDWƐKƐ TITILI
Gyihova kulo kɛ ɔyɛ ɛ Gɔnwo, na ɔbaboa wɔ yeamaa wɔabikye ye kpalɛ.
Ndinu
-
Kɛzi Gyihova boa ɔ gɔnwo mɔ ɛ?
-
Duzu ati a Gyihova kulo kɛ ɔ gɔnwo mɔ yɛ nzenzaleɛ a?
-
Ɛnea a Gyihova kulo kɛ ɔ gɔnwo mɔ yɛ debie mɔɔ bɛnrɛhola ye yɛ la ɔ? Nzɔne ati ɔ?
KPONDƐ DƆƆNWO
Kɛzi ɛfa Nyamenle agɔnwolɛ a ɔbahakyi wɔ ɛbɛlabɔlɛ ɛ?
“Gyihova—Nyamenle Mɔɔ Ɔhyia Kɛ Yɛnwu Ye” (Ɛzinzalɛ Arane, February 15, 2003)
Sukoa kɛzi ɛbahola wɔayɛ Nyamenle agɔnwo la.
“Kɛ Ɔkɛyɛ Na Meayɛ Nyamenle Agɔnwo Ɛ?” (Mgbavolɛ Nee Mbɛlɛra Biza Kɛ—Mualɛ Mɔɔ Boa, Foa 2, tile 35)
Sukoa deɛmɔti raalɛ bie ɛnwu kɛ ɔ nee Gyihova agɔnwolɛvalɛ ne ɛmaa ye ɛbɛlabɔlɛ ɛyɛ kpalɛ la.
Tie mɔɔ mgbavolɛ nee mbɛlɛra ka fale Gyihova anwo la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
