Kʼa Jehová i ne ge nuke má gi pädi a i nkja gege. ¿Ó i nkjapu̱? I nkjapu̱, xo kʼa Tsi Mähkí Tá i to̱ʼmi ge mu̱ nuke má gi pädi de gege —ku̱ yo tsi chala ʼmu̱i, ankja ga o̱te goʼtho yu̱ i ʼbu̱i nihi kʼa i mbeni da o̱te— má gi ne gi nkja ro amigo. ¿Pe hä da zo go nkjahu̱ ro amigo kʼa Tsi Mähkí Tá? (xödí Salmo 25:14). ¿Té ʼbenkʼa da zo gi pe̱hke pa da nkjanu̱? Nu̱ Biblia i thähtígihu̱ gehna ntʼöni nihi i xihkígihu̱ ge mu̱ má gi mpädiui ko kʼa Jehová genkʼa má ra ndo̱ zo pa nuke.

1. ¿Té i xiʼkí kʼa Jehová gi pe̱hke?

“Kuatihu̱ ko kʼa Tsi Mähkí Tá ʼne gege da guaʼkihu̱” (Santiago 4:8). ¿Té i ne da mä gehya hñä? Ge kʼa Jehová ra xiʼkí gi nkja ro amigo. ʼBu̱i ʼra yä kjäʼni i benihu̱ ge hi i tso da nchíxihu̱ ko ʼna kjäʼni hi i käʼtihu̱, nihi i benihu̱ nkjanu̱ de kʼa Tsi Mähkí Tá. Pe gege xi nahkígihu̱ nu̱ ro hñä, nu̱ Biblia, pa go pädihu̱ a i nkja nihi pa da zo go kuatihu̱ ko gege. Mu̱ di xödíhu̱ ha nu̱ Biblia kʼa xi nthutsí pa nugohu̱, má go ne go nchíxihu̱ ko kʼa Jehová mahke hi i tso go käʼtihu̱.

2. ¿Ó kʼa Jehová i nkja kʼa amigo má ra ndo̱ zo da zo gi peʼtsige?

Nindi ʼna kjäʼni má da mäʼkí ngu i mäʼkí kʼa Jehová. Gege i ne ge nuke zäi gi mpoho nihi gi nzofo mu̱ gi höní. Da zo gi ʼye̱ntsibihu̱ “goʼtho kʼa i kjá gi ʼñonfenihu̱” xo gege i ʼñonfeni po nukehu̱ (1 Pedro 5:7). Kʼa Jehová zäi i ne da mötsí, da jóʼti nihi da o̱de mu̱ ku̱ yo amigo da nzofo (xödí Salmo 94:18, 19).

3. ¿Té i to̱ʼmi kʼa Jehová de ku̱ yo amigo?

Kʼa Jehová i mädí goʼtho yu̱ kjäʼni, pe “i nchíxiui ra ndo̱ zo ko yu̱ i kjá kʼa ra zo” (Proverbios 3:32). Kʼa Jehová i to̱ʼmi ge ku̱ yo amigo da mpexkehu̱ pa da kjáhu̱ kʼa ra zo, pe nihi hin da kjáhu̱ ku̱ ra ntsʼo. ʼBu̱i ku̱ tó da mbeni ge hi da zo da kjáhu̱ goʼtho kʼa i to̱ʼmi kʼa Jehová. Pe gege i pädi kʼa i tso yu̱ kjäʼni nihi i nú ra zo goʼtho ku̱ i mädí ko ku̱ i mpexke pa da kjáhu̱ kʼa i ne gege (Salmo 147:11; Hechos 10:34, 35).

 MA PÄDIHU̱ MÁ RA NGU DE NU̱ TEMA

4. Kʼa Abrahán mbro amigo kʼa Jehová

Kʼa xi nthutsí ha nu̱ Biblia de kʼa Abrahán (nihi mi tʼimbi Abrán) i úhtigihu̱ kʼa go pe̱hmu̱ pa go nkjahu̱ ro amigo kʼa Tsi Mähkí Tá. Xödíhu̱ de kʼa Abrahán ha nu̱ Génesis 12:1-4 nihi ñähu̱ de gehna:

• ¿Té bi öhpíbi kʼa Jehová kʼa Abrahán?

• ¿Té bi ñähtíbi kʼa Jehová?

• ¿Té bi me̱ʼ kʼa Abrahán mu̱ kʼa Jehová bi xifí kʼa di me̱fí?

5. Kʼa i öhpíbi kʼa Jehová yu̱ yo amigo

ʼBu̱i kʼa té di to̱ʼmihu̱ de yu̱ ma amigohu̱.

• ¿Nuke té gi to̱ʼmi de yu̱ ri amigo?

Xödíhu̱ 1 Juan 5:3 nihi ñähu̱ de gehna:

• ¿Té i to̱ʼmi kʼa Jehová de ku̱ yo amigo?

Pa go ʼyo̱htebíhu̱ kʼa Jehová, petsite go mbödihu̱ kʼa di pe̱hmu̱ nihi ngu di nkjahu̱. Xödíhu̱ Isaías 48:17, 18 nihi ñähu̱ de gehna:

• ¿Ó kʼa Jehová i öhpíbi ku̱ yo amigo da mbödi ku̱ yo nzahki?

 6. Kʼa i pe̱ʼ kʼa Jehová po ku̱ yo amigo

 KʼA KO PÄDI

Kʼa Jehová i ne da nkja ri amigo nihi da möxkí pa gi kuati ko gege.

Kʼa to núhu̱

• ¿Ankja i fötsí kʼa Jehová ku̱ yo amigo?

• ¿Ó kʼa Jehová i xiʼ ku̱ yo amigo da mbödihu̱ ku̱ yo ʼmu̱i?

• ¿Nuke gi beni ge ra ndo̱ nthí go nkjahu̱ ro amigo kʼa Jehová? ¿Ó gi beni nkjapu̱?