LEKSION 08
Sarag Mon Nakaaro si Jehova
Labay nen Jehova ya sikatoy mas nakabat mo. Akin ey? On, ta no naamtaan mo ray kualidad to, saray gagawaen to, tan no antoy labay to parad sika, mas labay mon kaaroen. Posible kasi ya nakaarom si Jehova? (Basaen so Salmo 25:14.) Antoy gawaen mo pian nakaarom so Dios? Ebatan na Biblia iratan ya tepet tan naamtaan mo met no akin ya importantin maong ya nakaarom si Jehova.
1. Antoy labay nen Jehova ya gawaen mo?
“Onapit kayo ed Dios, tan sikatoy onapit ed sikayo.” (Santiago 4:8) Antoy labay ton ibaga? Labay nen Jehova ya nakaaro to ka. Parad arum, mairap dan nakaaro so Dios ta agda nanenengneng. Pero diad Biblia, say Salita to, ipapaamta nen Jehova iray kualidad to ta pian sikatoy nakaaro tayo. No basaen tayoy mensahe to ya walad Biblia, lalo tayon nakaaro anggano sikatoy agtayo nanenengneng.
2. Akin ya si Jehova so sankamaongan ya nakaarom?
Agnaparaan so panangaro nen Jehova ed sika. Labay to ya maliket ka tan patulongan kad sikato. “Ipaawit yod sikato so amin a kapagaan yo, lapud iyaansakit to kayo.” (1 Pedro 5:7) Naynay ya wadtan si Jehova ya onsuporta, mamabiskeg, tan ondengel ed saray kaaro to.—Basaen so Salmo 94:18, 19.
3. Antoy aanapen nen Jehova ed saray labay ton nakaaro?
Inaro nen Jehova iray totoo, “balet Sikatoy maapit a kaaro na maptek [o makalakal] a too.” (Proverbio 3:32) Labay nen Jehova ya manggaway maong iray kakaaro to tan ag-ira manggaway mauges. Parad arum, mairap ya gawaen so labay nen Jehova tan paliisan iray agto labay. Pero, makasi tan makatalos si Jehova. Labalabay to ya nakaaro iramay mangaaro tan ontutulok ed sikato.—Salmo 147:11; Gawa 10:34, 35.
DAKEL NI NAARALAN MO
Aralen no panon mon nakaaro si Jehova, tan amtaen no akin ya sikatoy sankamaongan ya nakaarom.
4. Kaaro nen Jehova si Abraham
Nabasa tayod Biblia so istorya nen Abraham (tinawag met ya Abram) tan naamtaan tayod satan no panon tayon nakaaro so Dios. Basaen so agawad si Abraham diad Genesis 12:1-4. Insan ebatan iraya:
-
Antoy ingganggan nen Jehova ed si Abraham?
-
Antoy impromisa nen Jehova ed sikato?
-
Antoy ginawa nen Abraham nen ingganggan nen Jehova?
5. No antoy labay nen Jehova ya gawaen na kakaaro to
Wala ray aanapen tayo ed sakey ya kaaro.
-
Anto ray labay mon gawaen na kakaarom parad sika?
Basaen so 1 Juan 5:3, insan ebatan iya:
-
Antoy labay nen Jehova ya gawaen na saray kakaaro to?
Pian nagawaan tayoy labay nen Jehova, ompan kailangan tayon umanen so ugali o kagagawa tayo. Basaen so Isaias 48:17, 18, insan ebatan iya:
-
Akin et labay nen Jehova ya sikatoy dengelen na saray kakaaro to tan manguman ira no kailangan?
Say maong ya kaaro et walay malasakit tod sikatayo tan protektaan to tayo ed peligro. Ontan si Jehova ed saray kakaaro to
6. No panon ya tutulongan nen Jehova iray kakaaro to
Tutulongan nen Jehova iray kakaaro to pian nasarag day problema da. I-play so VIDEO, insan ebatan iya.
-
Diad video, panon ya tinulongan nen Jehova imay bii pian nalabanan toy negatibon nononoten tan nalilikna to?
Basaen so Isaias 41:10, 13, insan ebatan iraya:
-
Antoy imbaga nen Jehova ya gawaen to parad saray kakaaro to?
-
Parad sika, maong kasi ya Kaaro si Jehova? Akin ey?
Saray maapit ya kaaro et wadtan ira no kailangan moy tulong. Tulongan ka met nen Jehova
7. Pian nakaaro tayoy Jehova, dapat mitongtong tan ondengel tayod sikato
Onelet so pankakaaro no walay pantotongtong. Basaen so Salmo 86:6, 11, insan ebatan iraya:
-
Panon tayon nakatongtong si Jehova?
-
Panon ya mitotongtong si Jehova ed sikatayo?
Mitotongtong tayod si Jehova diad pikakasi; mitotongtong si Jehova ed sikatayo panamegley na Biblia
IBABAGA NA ARUM: “Mairap ya nakaaro so Dios.”
-
Anton teksto so usaren mo pian ipanengneng ya sarag tayon nakaaro si Jehova?
SUMARYO
Labay nen Jehova ya nakaaro to ka, tan tulongan to ka pian magmaliw kayon malet ya sankaaro.
Rebyu
-
Panon ya tutulongan nen Jehova iray kakaaro to?
-
Akin et bibilinen nen Jehova iray kakaaro to ya manguman no kailangan?
-
Parad sika, masyado kasin mairap so pagagawa nen Jehova ed saray kakaaro to? Akin ey?
DISKOBRIEN
No nakaarom so Dios, antoy nitulong to ed sika?
“Jehova—Dios a Makanan Kabaten” (Say Panag-bantayan, Pebrero 15, 2003)
Aralen no panon ya onelet so pikakaarom ed Dios.
Amtaen no panon ya akatulong ed sakey ya bii so pikakaaro to ed si Jehova pian magmaliw ya maliket so bilay to.
Dengelen no antoy imbaga na saray tinedyer ya nalilikna da ed si Jehova.
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
