8. KAPITEL
Du kaust Jehova sien Frint sennen
Jehova well haben, daut du mea doaräwa lieescht, woo hee es, waut hee deit un waut hee sikj väajenomen haft. Wuarom? Hee hopt, daut je bäta du am kjanen lieescht, je dolla woascht du wellen sien Frint sennen. Oba kaust du opp iernst Frint sennen met Gott? (Läs Psalm 25:14.) Woo schauft daut? De Schreft jeft ons de Auntwuat un dee sajcht ons uk, wuarom Jehova de basta Frint es, waut eena haben kaun.
1. Waut wenscht Jehova sikj von ons?
“Nodat junt no Gott, dan woat hee uk dicht no junt komen” (Jakobus 4:8). Waut meent daut? Jehova well haben, daut du sien Frint woascht. Fa eenje es daut schwoa to jleewen, daut see met Gott kjennen Frind sennen, wiels see dän nich seenen kjennen. Oba en sien Wuat, de Schreft, lat Jehova ons aules äwa sikj weeten, waut doa needich es toom am noda komen. Wan wie daut läsen, waut Gott haft loten fa ons oppschriewen, dan woa wie jratre Frind met am woaren, mau rajcht wan wie am uk noch kjeenmol jeseenen haben.
2. Wuarom jeft daut kjeenen bätren Frint aus Jehova?
Kjeena räakjent die soo väl, aus Jehova deit. Hee well haben, daut du schaftich best un am no Help frajchst, wanemma die daut fält. De Schreft sajcht: “Schmiet aul june Sorjen opp am; hee sorcht fa junt” (1. Petrus 5:7). Jehova es emma reed, no siene Frind to horchen, dee to unjastetten un to treesten (läs Psalm 94:18-19).
3. Waut velangt Jehova von siene Frind?
Jehova leeft aule Menschen, oba besonda es hee “de jerajchte sea noaun” (Spricha 3:32). Hee velangt von siene Frind, daut dee daut proowen to doonen, waut hee fa goot talt un daut tochloten, waut hee fa schlajcht talt. Eenje kunnen denkjen, daut et väl too schwoa es, daut aula notokomen. Oba Jehova es gootmeenent. Hee es sea tofräd met aul dee, waut am opp iernst leewen un sikj aunstrenjen, daut to doonen, waut hee jleicht (Psalm 147:11; Aposteljeschicht 10:34-35).
DOLLA UNJASTONEN
Lia mea, woo du kaust Jehova sien Frint woaren un wuarom hee de basta Frint es, waut et jeft.
4. Abraham wia Jehova sien Frint
De Jeschicht enne Schreft von Abraham (waut uk Abram jenant woat) halpt ons to vestonen, waut daut meent, Gott sien Frint to sennen. Läst von Abraham en 1. Mose 12:1-4. Dan got toop dise Froagen derch:
-
Waut säd Jehova to Abraham, waut hee doonen sull?
-
Waut vespruak Jehova am?
-
Woo kjeem Abraham daut no, waut Jehova am säd?
5. Waut Jehova von siene Frind haben well
Jeweenlich es eena met soone Menschen Frind, waut soo sent, aus eena daut jleicht.
-
Woo mott een Mensch sennen, daut du west met dän Frint sennen?
Läst 1. Johanes 5:3 un dan got toop dise Froag derch:
-
Waut velangt Jehova von siene Frind?
Wan wie Jehova jehorchen wellen, dan woa wie veleicht motten jewesset en ons Läwen ooda aun onse Natua endren. Läst Jesaja 48:17-18 un dan got toop dise Froag derch:
-
Wuarom well Jehova haben, daut eena sikj vebätren saul?
Een gooda Frint wudd eenem aun soont denkjen halpen, waut eenem togood kjemt un beschizt. Jehova deit daut met siene Frind krakjt soo
6. Waut Jehova fa siene Frind deit
Jehova halpt siene Frind, met Trubbels foadich to woaren. Kjikjt daut VIDEO un dan got toop dise Froagen derch.
-
Woo holp Jehova de Fru en daut Video, met aul daut schwoare foadich to woaren, waut ar bedrekjt?
Läst Jesaja 41:10, 13 un dan got toop dise Froagen derch:
-
Waut vesprakjt Jehova, fa aul siene Frind to doonen?
-
Jleefst du, Jehova kaun een gooda Frint sennen? Wuarom?
Goode Frind halpen die, wan die daut fält. Jehova woat daut uk doonen
7. Met Jehova Frind sennen meent uk, to am räden un am toohorchen
Wan Frind unjarenaunda räden, dan woaren dee noch jratre Frind. Läst Psalm 86:6, 11 un dan got toop dise Froagen derch:
-
Woo kjenn wie met Jehova räden?
-
Woo rät Jehova to ons?
Wie räden to Jehova, wan wie bäden un hee rät to ons derch de Schreft
WAUT EENJE SAJEN: “Daut es nich mäajlich, daut Gott mie woat aunnämen.”
-
Waut fa eenen Bibelvarsch wurscht du brucken toom wäm wiesen, daut wie kjennen met Jehova Frind sennen?
KAPITEL TOOPJEFOT
Jehova well Frind sennen met die un hee woat die halpen, am noda to komen.
Waut hast du jelieet?
-
Woo halpt Jehova siene Frind?
-
Wuarom sajcht Jehova, daut eena sikj vebätren saul?
-
Denkjst du, Jehova velangt too väl von siene Frind? Wuarom wurscht du daut sajen?
MEA NOSIEEKJEN
Woo kaun die daut halpen, met Gott Frind to sennen?
“Daut loont sikj, Jehova Gott kjanen to lieren” (De Woaktorm, 15. Feebawoa 2003)
Lia, woo du kaust Frind sennen met Gott.
See, wuarom eene Fru sajcht, daut ar daut äa Läwen jerat haft, met Jehova Frint to sennen.
Horch mol, woo junge Menschen vetalen, woo see äwa Jehova denkjen.
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
