LESON 08
Iu Savve Fren Witim Jehovah
Jehovah laekem iu for savve gud lo hem, bikos hem savve sapos iu gohed lane abaotem olketa wei blo hem, hao hem treatim pipol, and plan blo hem, bae iu laek fren witim hem. Iu bilivim iu savve fren witim God? (Readim Sams 25:14.) Wat nao iu savve duim for fren witim hem? Bible garem ansa for olketa kwestin hia and why hem important tumas for iu fren witim Jehovah.
1. Wat nao Jehovah laekem iu for duim?
“Fren gud witim God and bae hem fren gud witim iufala.” (James 4:8) Wat nao iumi lanem from disfala verse? Diswan showim Jehovah laekem iumi for fren witim hem. Samfala maet faendem hem hard tumas taem olketa tingim olketa savve fren witim God wea olketa no savve lukim. Bat lo Bible, Jehovah storyim evri samting abaotem olketa wei blo hem wea mekem iumi for laek fren witim hem. Taem iumi readim message blo God for iumi lo Bible, bae iumi fren gud witim Jehovah nomata iumi no lukim hem.
2. Jehovah hem best fren wea iu savve garem, why nao olsem?
No eniwan lovem iu olsem Jehovah. Hem laekem iu for hapi and for iu prea lo hem taem iu needim help. Iu savve “putim evri wari bilong [iu] long hand bilong hem bikos hem tingim [iu].” (1 Peter 5:7) Jehovah hem stanbae for sapotim, comfortim, and lisin lo olketa fren blo hem.—Readim Psalm 94:18, 19, NW.
3. Wat nao Jehovah laekem olketa fren blo hem for duim?
Jehovah lovem evri pipol “bat Hem fren gud witim olketa wea raeteous.” (Proverbs 3:32, NW) Jehovah laekem olketa fren blo hem for traem best for duim olketa samting wea hem sei hem gud, and no duim olketa samting wea hem sei hem nogud. Samfala tingse hem hard for olketa duim evri samting wea Jehovah laekem olketa for duim. Bat, Jehovah savve gud lo iumi. Hem hapi lo olketa wea lovem Hem and traem best for mekem Hem hapi.—Sams 147:11; Acts 10:34, 35.
DIG GO MOA
Bae iumi storyim wat iu savve duim for fren witim Jehovah, and why Jehovah hem best Fren wea iu savve garem.
4. Abraham hem fren blo Jehovah
Story lo Bible abaotem Abraham, (wea nara nem blo hem Abram) helpem iumi for luksavve iumi savve fren witim God. Readim story blo Abraham lo Jenesis 12:1-5, then discussim tugeta olketa kwestin hia:
-
Wat nao Jehovah talem Abraham for duim?
-
Wat nao Jehovah promisim for hem?
-
Wat nao Abraham duim for followim olketa instruction wea hem kasem from Jehovah?
5. Wat nao Jehovah laekem olketa fren blo hem for duim?
Iumi savve laekem olketa fren blo iumi for duim samfala samting for iumi.
-
Wat nao samfala samting wea iu laekem olketa fren blo iu for duim for iu?
Readim 1 John 5:3, then discussim tugeta disfala kwestin:
-
Wat nao Jehovah laekem olketa fren blo hem for duim?
For obeyim Jehovah, iumi mas changem wei blo iumi. Readim Aesaea 48:17, 18, then discussim tugeta disfala kwestin:
-
Why nao Jehovah laekem olketa fren blo hem for changem wei blo olketa?
Wanfala gud fren bae hem savve talem iumi samting wea savve protectim and helpem iumi. Jehovah duim sem samting tu for olketa fren blo hem
6. Hao Jehovah helpem olketa fren blo hem
Jehovah helpem olketa fren blo hem for deal witim olketa problem. Pleim VIDEO, then discussim tugeta kwestin hia.
-
Hao nao Jehovah helpem woman lo video hia for deal witim negative tingting and feeling wea hem garem?
Readim Aesaea 41:10, 13, then discussim tugeta olketa kwestin hia:
-
Wat nao Jehovah promis for duim for evri fren blo hem?
-
Iu tingse Jehovah bae hem wanfala gud fren? Why nao olsem?
Olketa gud fren savve helpem iu taem iu needim. Jehovah tu bae helpem iu
7. For fren witim Jehovah, iumi mas lisin and story witim hem
Olketa wea fren gud, hem olketa wea story lo each other. Readim Sams 86:6, 11, then discussim tugeta olketa kwestin hia:
-
Wat nao iumi savve duim for story witim Jehovah?
-
Wat nao Jehovah iusim for story witim iumi?
Iumi story lo Jehovah taem iumi prea. Hem iusim Bible for story lo iumi
SAMFALA SAVVE TALEM: “Hem hard for fren witim God.”
-
Eni scripture iu savve iusim for showim iumi savve fren witim Jehovah?
MAIN POINT
Jehovah laek fren witim iu, and bae hem helpem iu for duim datwan.
Review
-
Wat nao Jehovah duim for helpem olketa fren blo hem?
-
Why nao Jehovah talem olketa fren blo hem for changem wei blo olketa?
-
Iu tingse hem hard for iumi fren witim Jehovah? Why nao iu ting olsem?
FAENDAOT MOA
Taem iu fren witim God, wanem gud samting nao bae iu kasem?
“Jehovah—God wea Fit for Iumi Savve Gud Long Hem” (Wastaoa, February 15, 2003)
Read abaotem wat iu savve duim for fren witim God.
Read abaotem wanfala woman wea sei, from hem fren witim Jehovah datwan mekem hem garem gud laef.
Lisin lo olketa teenager wea storyim feeling blo olketa abaotem Jehovah.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
