Jehová Diosqa maytan munashan payta allinta reqsinaykita. Chaypaqmi yachanayki imayna Dios kasqanta, imakuna ruway munasqantapas. Ichaqa tapukushankipaschá: “¿Atisunmanpunichu runakuna Diospa amigon kayta?”, nispa (leey Salmos 25:14). Arí, atisunmanmi. Ichaqa ¿imatan chaypaq ruwananchis? Bibliapin chaymanta willashan. Chaypin willashallantaq imaraykus Diospa amigon kay ancha allinpuni chaytapas.

1. ¿Ima ruwanaykitan Jehová Dios munan?

Bibliapin nishan: “Diosman asuykuychis, jinan paypas asuykamusunkichis”, nispa (Santiago 4:8). Chaypi nisqan jina, Jehová Diosqa payman asuykunaykita, paypa amigon kanaykitan munan. Ichaqa manataq Jehová Diosta rikuyta atinchischu chayqa, mana ruway atikuqta jinapaschá chayta qhawarishanki. Ichaqa payman asuykunanchista munaspan Jehová Diosqa simin qelqapi willawanchis imayna Dios kasqanta. Chhaynapin rikushasunmanpas jina payta reqsisunchis, jinaspa paywan amigontin kapusunchis.

2. ¿Imaraykun Jehová Dios aswan allin amigoyki kanman?

Jehová Diosqa anchatapunin munakusunki. Payqa kusisqa kausanaykitan munan, sasachakuykunapi tarikuqtiykipas yanapasunkipunin. Chaymi Bibliapipas nin: “Tukuy llakipakuyniykichista payman saqeychis, payqa qankunamantan llakikun”, nispa (1 Pedro 5:7). Jehová Diosqa liston kashan yanapawananchispaq, sonqochawananchispaq, mañakusqanchista uyariwananchispaqpas (leey Salmos 94:18, 19).

3. ¿Imayna runa kananchistan Jehová Dios munan?

Llapa runakunataña Jehová Dios munakun chaypas, “chanin runakunallawanmi payqa sonqota tupachin” (Proverbios 3:32). Payqa munan vidanchista cambiaspa allin kaqta ruwananchistan. Sasaña chay ruway kanman chaypas, tukuy atisqanchistan kallpachakunanchis. Chhaynapin Jehová Diospa sonqonta kusichisunchis. Payqa sumaq sonqo pacienciakuq Diosmi, sumaqtan chaskiwasunchis tukuy atisqanchista kallpachakuqtinchisqa (Salmos 147:11; Hechos 10:34, 35).

 ASTAWAN YACHASUNCHIS

4. Abrahanqa Jehová Diospa amigonmi karqan

¿Imaynan Diospa amigonkuna kananku? Chayta yachanapaq yachasunchis Abrahanmanta (Abrahantaqa “Abrán” nispan nikullantaq), payqa Diospa amigonmi karqan. Abrahanmanta leeychis Génesis 12:1-4 textopi, jinaspa jamuq tapuykunaman jina parlariychis:

• ¿Imata ruwananpaqmi Jehová Dios Abrahanta kamachirqan?

• ¿Imatan Jehová Dios Abrahanman qonan karqan payta kasukuqtin?

• ¿Imatan Abrahán ruwarqan Jehová Diospa kamachisqanta uyarispa?

5. ¿Imatan Jehová Dios munan amigonkunamanta?

Lliupas amigonchiskuna imallapipas yanapawananchistan munanchis ¿riki?

• ¿Amigoykikuna ima ruwapunasuykitan munawaq?

Leeychis 1 Juan 5:3 textota, jinaspa qatiqninpi tapuyman jina parlariychis:

• ¿Imatan Jehová Dios munan amigonkunamanta?

Jehová Diosta kasukunanchispaqqa yaqapaschá imachus ruwasqanchistapas imayna kasqanchistapas cambiananchis kanqa. Leeychis Isaías 48:17, 18 textota, jinaspa jamuq tapuyman jina parlariychis:

• ¿Imaraykun Jehová Dios vidanchista cambiananchista munan?

 6. ¿Imakunatan Jehová Dios ruwan amigonkunarayku?

 IMATAN YACHAMURQANCHIS

Jehová Diosqa paypa amigon kanaykitan munan. Paymi yanapasunki pisi-pisimanta payman asuykunaykipaq.

Yuyarisun

• ¿Imaynatan Jehová Dios amigonkunata yanapan?

• ¿Imaraykun Jehová Dios munan vidanchista cambiananchista?

• ¿Mana ruway atinatachu Jehová Dios kamachiwanchis? ¿Imaraykun chhaynata piensanki?