Jehová Diosca quiquin paita ali rijsichunmi munan. Jehová Dios imashina cajta ali rijsishpa, pai imata gushtajta yachashpa, imata Jehová Dios quiquinmanda ruragrijujta yachashpaca paipa amigo tucungapaj munapanguimi. Pero ¿ciertopachachu Taita Diospa amigo tucuitaca usharin? (Salmo 25:​14, liipangui). Jehová Diospa amigo cangapaca ¿imatata rurana capangui? Bibliapimi chai tapuicunataca contestan. Shinallata Jehová Dioshuan amigo cana imamanda ashtahuan importante cashcatapashmi ricuchin.

1. Jehová Diosca, quiquin ¿imata rurachunda munan?

Bibliapica ninmi: “Taita Diosmanmi quimirina capanguichi. Chaimi paipash quiquingunapamanga quimiringa” (Santiago 4:8). Cai shimicunaca ¿imatata ningapaj munan? Cai shimicunaca Jehová Dios ñucanchipa amigo tucungapaj munashcatami ricuchin. Huaquingunaca Taita Diosta na ricuimandaca na paipa amigo tucuita ushanchichu ninmi. Pero Bibliapimi Taita Diosca pai imashapacha cashcataca tucuita villashpa saquishca. Chaita ricushpami ñucanchica paipaman quimirita ushapanchi. Jehová Diosta na ricui ushashpapash paipa nishcacunata Bibliapi liishpami paihuanga alipacha amigocuna tucuita ushapanchi.

2. ¿Imashpata Jehová Diostaca shuj alipacha amigomi can nipanchi?

Jehová Diosca quiquindaca ninandami juyan. Paica quiquin cushilla causachunmi munan. Jehová Diosca ‘ima preocupaciongunata charishpapash paiman tucuita saquijpica’ paica ayudangallami (1 Pedro 5:7). Jehová Diosca quiquinda uyangapaj, ayudangapaj, cushichingapaca listomi can (Salmo 94:​18, 19, liipangui).

3. Jehová Diosca, paipa amigocuna ¿imata rurachunda munan?

Jehová Diosca tucuicunatallatami juyan. Paica ‘[alita] rurajcunahuanga’ ali amigomi tucun (Proverbios 3:32). Jehová Diosca paipa amigocuna pai nalicachishca cosascunata na rurashpa alita rurangapaj esforzarichunmi munan. Shinapash huaquingunaca Jehová Dios munashcashna causaitaca na usharingachu yanmi. Ñucanchicuna Jehovata juyaimanda pai munashcashna causangapaj esforzarijujtaca Jehová Diosca alimi yachan (Salmo 147:11; Hechos 10:​34, 35).

 ASHTAHUAN YACHAJUPASHUNCHI

4. Abrahanga Jehová Diospa amigomi carca

Bibliapi Abrahanba causaimanda liishpami Jehovapa amigo tucungapaj imata rurana cashcata yachajupashun. Abrahanba causaimanda Génesis 12:​1​manda 4​caman liishpa, cai tapuicunata contestapangui:

• Jehová Diosca ¿imatata Abrahanmanga mandarca?

• Jehová Diosca ¿imatata rurasha nirca?

• Abrahanga ¿imatata rurarca?

5. Jehová Diosca paipa amigocuna imagutapash rurachunmi munan

Tucuicunallatami ñucanchi amigocuna ñucanchicunamanda imagutapash rurachun munapanchi.

• Quiquinba amigocunaca, quiquinmanda ¿imata rurachunda munapangui?

1 Juan 5:3​ta liishpa, cai tapuita contestapangui:

• Jehová Diospa amigocunaca ¿imatata rurana capanchi?

Jehová Diosta cazungapaca ñucanchi yuyaita, ñucanchi ruraicunatapashmi cambiana capanchi. Isaías 48:17 y 18​ta liishpa, cai tapuita contestapangui:

• Jehová Diosca paipa amigocunataca ¿imamandata cambiocunata rurachun mañan?

 6. Jehová Diosca paipa amigocunataca ayudanmi

 YARINGAPAJ

Jehová Diosca ñucanchi amigo cangapami munan. Y paipa amigo tucuchunga paillatami ayudanga.

¿Imatata yachajupashcanchi?

• Jehová Diosca, paipa amigocunataca ¿imashinata ayudan?

• ¿Imamandata Jehová Diosca paipa amigocuna cambiocunata rurachun munan?

• Jehová Diospa amigo canaca ¿shinllichu ricurin? ¿Imatata nipanguiman?