LESON 08
Ou pe èt kamarad Jéova
Jéova i ve ke ou aprann konèt ali. Akoz ? Parske li éspèr ke, plus ou va aprann su son pèrsonalité, son bann manièr aji é son projé, plus ou nora anvi èt son kamarad. Mé èske i pe vréman èt kamarad Bondieu ? (lir Psom 25:14). Kosa ou pe fé pou vni son kamarad ? La Bib i réponn bann késtion la, é li ésplik anou poukosa lamitié èk Jéova, sé le plu joli lamitié ki égzis.
1. Kosa Jéova i ve ou fé ?
« Kos koté Bondieu, é li va kos koté zot » (Jak 4:8). Kosa i ve dir vèrsé la ? Jéova la anvi ke ou devien son kamarad. Pou désèrtin, lé difisil kroir ke zot i pe èt kamarad avèk Bondieu, parske zot i voi pa li. Mé dan son Parol la Bib, Jéova i di anou tout sak nou la bezoin konèt su son pèrsonalité, pou ke nou ‘kos koté li’. Plus nou lir la Bib, sétadir le lèt ke Jéova la ékri pou nou, plus nout lamitié avèk li i sra for, mèm si nou voi pa li.
2. Poukosa Jéova lé le méyeur Kamarad ke ou pe avoir ?
Na poin pèrsonn i ièm aou plus ke Jéova. Li ve ke ou lé ereu é ke ou apèl ali a lèd, chak foi ke ou la bezoin. Ou pe ‘rejèt tout out traka su li, parske li sousi ali pou ou’ (1 Pièr 5:7). Jéova lé toujour paré pou aport son soutien, pou soulaj é redonn la fors, é pou ékout son bann kamarad (lir Psom 94:18, 19).
3. Kosa i fo fé pou èt kamarad èk Jéova ?
Jéova i ièm tout domoun, mé « li devien le plu proch kamarad bann domoun ke lé droit » (Provèrb 3:32). Pou èt kamarad èk Bondieu, i fo fé zéfor pou fé sak li konsidèr ke lé bien, é rejèt sak li konsidèr ke lé mové. Désèrtin néna linprésion, ke zot i poura jamé réspèk tout bann lansègnman biblik su le bien é le mal, ke Jéova i donn. Mé Jéova na in gran keur. Li akord son lamitié pou tout sak i ièm ali vréman é ki fé tout zot posib pou fé plézir ali (Psom 147:11 ; Akt 10:34, 35).
ALON APRANN PLUS
Alon voir kosa i fo fé pou èt kamarad Jéova é poukosa sé le méyeur Kamarad ke nou pe avoir.
4. Abraam lété kamarad Jéova
Le zistoir la Bib su Abraam (ke té apèl osi Abram) i mont anou kosa i ve dir èt kamarad Bondieu. Lir Jenèz 12:1-4 é koz su bann késtion la :
-
Kosa Jéova la demann Abraam pou fé ?
-
Kosa Jéova la promèt ali ?
-
Koman Abraam la réaji kan Jéova la donn ali bann zinstruksion ?
5. Sak Jéova i atann de son bann kamarad
Lé normal atann ke out bann kamarad i fé detroi zafèr pou ou.
-
Kosa ou ièm ke out bann kamarad i fé pou ou ?
Lir 1 Jan 5:3 é koz su késtion la :
-
Kosa Jéova i atann de son bann kamarad ?
Pou obéi Jéova, i fodra petèt chanj nout fason d’fé, oubien sak lé pa bon dan nout pèrsonalité. Lir Izai 48:17, 18 é koz su késtion la :
-
Akoz Jéova i demann son bann kamarad fé bann chanjman ?
In kamarad i donn anou bann konsèy pou nout bien é pou protèj anou. Jéova i fé parèy avèk son bann kamarad.
6. Sak Jéova i fé pou son bann kamarad
Jéova i èd son bann kamarad sobat ansanm zot bann difikulté. Gard le VIDÉO é koz su le késtion ki vien apré.
-
Dan le vidéo, koman Jéova la èd le jeun madam sobat kont son bann pansé é son bann mové santiman ?
Lir Izai 41:10, 13 é koz su bann késtion la :
-
Kèl promès Jéova i fé pou tout son bann kamarad ?
-
Èske ou pans ke Jéova i sré in bon kamarad pou ou ? Akoz ou di sa ?
Out bann proch kamarad lé la kan ou la bezoin lèd. Jéova va èd aou osi.
7. Pou èt kamarad ansanm Jéova, i fo koz èk li é ékout ali
Kan 2 kamarad i koz ansanm, zot lamitié i devien plu for. Lir Psom 86:6, 11 é koz su bann késtion la :
-
Koman nou pe koz èk Jéova ?
-
Koman Jéova i koz èk nou ?
Nou koz èk Jéova gras la priyèr ; li koz avèk nou gras la Bib.
NADFOI DOMOUN I DI : « Lé pa posib èt kamarad Bondieu. »
-
Kèl vèrsé ou noré utilizé pou mont ke nou pe èt kamarad ansanm Jéova ?
SAK NOU LA APRANN
Jéova i ve ke ou lé son kamarad é li va èd aou pousa.
Alon révizé
-
Koman Jéova i èd son bann kamarad ?
-
Akoz Jéova i demann son bann kamarad fé bann chanjman ?
-
Èske ou pans ke lé tro difisil èt kamarad ansanm Jéova ? Akoz ou di sa ?
GARD SA OSI
Kosa lamitié èk Jéova i pe aport aou ?
« Jéhovah : un Dieu qui mérite d’être connu » (La Tour de Garde, 15 février 2003)
Koman èt kamarad èk Bondieu ?
In madam lé sur ke son lamitié avèk Bondieu la sov aèl.
Bann jeun i koz su lamitié ke zot néna ansanm Jéova.
