Yihowa seekkite afattosira hasiˈranno. Mayira? Ayimmasi, doogosinna hedosi seekkite afittoro, jaalasi ikka hasiˈrattota afino daafiraati. Addinta Maganu jaala ikka dandiinanni? (Faarso 25:14 nabbawi.) Maganu jaala ikkate maa assa dandaatto? Qullaawu Maxaafi kuri xaˈmuwara dawaro qolanno; qoleno Yihowa gedee jaali dino yineemmohu mayiraatiro kulanno.

1. Yihowa ma assatto gede koyisinohe?

“Maganunniwa shiqqi yiiyye; isino kiˈnewa shiqqi yaanno.” (Yaiqoobi 4:8) Hatto yaa mayyaate? Yihowa jaalasi ikkattora koyisinohe yaate. Mitu manni Magano laˈˈa dandiineemmokki daafira jaalasi ikka didandiineemmo yee hedanno. Ikkirono, Yihowa Qaalisi giddo isiwa shiqate isi daafira afa hasiissannonkere baalankare kulinonke. Qullaawu Maxaafi giddo noota Maganu sokka nabbambeemmoha ikkiro, Yihowa illetenni laˈˈa dandiineemmokkiha ikkirono isi ledo noonke jaaloomi lexxanni haˈranno.

2. Yihowa gedee jaali dino yineemmohu mayiraati?

Yihowa geeshsha baxannohehu dino. Isi hagiirraamo ikkattoranna qarru amadannohe woyite hasaaphattosira hasiˈranno. ‘Atere malannohu iso ikkino daafira, qarrisinohere baala isi aana tuqqa’ dandaatto. (1 Pheexiroosi 5:7) Yihowa woˈmanka woyite jaallasi irkisate, sheshifachishatenna kuˈlitannore macciishshate qixxaawinoho.—Faarso 94:18, 19 nabbawi.

3. Yihowa jaala ikkate maa assa hasiissannonke?

Yihowa baalanka manna baxannoha ikkirono, “suwashshu wodanirira kayinni wodanisire kulanno.” (Lawishsha 3:32) Yihowa jaallasi isi danchareeti yiinore assitaranna bushaho yiinore kayinni gibbara hasiˈranno. Mitu manni, Yihowa asse yaannore baala assanna agurre yaannore baala agura qarrissanno yee hedanno. Ikkollana Yihowa shooshaqa Maganooti. Isi godowinta baxxannosirenna iso hagiirsiisate dandiiture baala assitannore baxannonsa.—Faarso 147:11; Soqqamaasinete Looso 10:34, 35.

 LEDDE XIINXALLI

4. Abirihaami Yihowa jaalaati

Abirihaami (Abiraamino yinannisi) daafira kultannoti Qullaawu Maxaafi xagge, Yihowa jaala ikkate yaa mayyaatero huwatate kaaˈlitannonke. Abirihaami daafira Kalaqama 12:1-4 nabbabbe. Hakkiinni aante noo xaˈmuwa hasaabbe:

• Yihowa Abirihaami maa assi yiinosi?

• Yihowa isira mayyee hexxo uyinosi?

• Abirihaami ma assiyya?

5. Yihowa jaallasi assitara hasiˈrannore

Duucha woyite jaallanke assitankera hasiˈneemmori heeˈranno.

• Ati jaallakki maa maa assitahera hasiˈratto?

Umi Yohaannisi 5:3 nabbabbe; hakkiinni aante noo xaˈmo hasaabbe:

• Yihowa jaallasi maa assitara hasiˈranno?

Yihowara hajajamate, amanyootenkenna akatanke biddi assiˈra hasiissannonkeha ikkara dandaanno. Isayaasi 48:17, 18 nabbabbe; hakkiinni aante noo xaˈmo hasaabbe:

• Yihowa jaallasi heeshshonsa biddi assidhara hasiˈrannohu mayiraati?

 6. Yihowa jaallasira assannore

 XAPHISHSHA

Yihowa Jaalakki ikka hasiˈranno; qoleno isiwa shiqatto gede kaaˈlannohe.

Kageeshsha Rosoottore

• Yihowa jaallasi kaaˈlannohu hiittoonniiti?

• Yihowa jaallasi heeshshonsa biddi assidhara hasiˈrannohu mayiraati?

• Yihowa jaallasi wolqansara aleenni ikkinore asse yaannoha lawannohe? Mayira?