Teani-Jehovah hahay azy soa iha. Ino ty antony? Satria manjary ta hinama aminy iha lafa mahay soa ty toetsiny, ty fomba fanaovany raha, noho ty raha teany hatao. Tena afaky ho nama-Ndranahary vatany va iha? (Vakio Salamo 25:14.) Ino ty azonao atao mba ho namany? Mamaly ani-fanontanea reo ty Baiboly, le resahiny ao koa hoe manino Jehovah ro nama farani-ze soa ho anao.

1. Ino ty raha ampirisihini-Jehovah hataonao?

“Mamonjea a-Ndranahary, le hamonjy anareo ie.” (Jakoba 4:8) Ino ty dikani-zay? Mitao anao hinama aminy Jehovah. Mieritseritsy ty olo sisany hoe sarotsy ty hinamà amy Ndranahary satria tsy hita maso ie. Fe ambarani-Jehovah antsika amy Baiboly ao ty toetsiny mba hahafahantsika hamonjy azy. Lafa mamaky ty Safà-Ndranahary tsika, le vomaiky hihamarìny azy ndre tsy hitantsika maso aza ie.

2. Manino Jehovah ro Nama farani-ze soa ho anao?

Tsy misy olo tea anao marè mandilatsy ani-Jehovah. Teany ho sambatsy iha sady teany hiresaky aminy lafa mila fanampea. Azonao ‘apetraky aminy iaby ze raha mampiasa loha anao, satria midary anao ie.’ (1 Petera 5:7) Tozoro parè hanampy, hampahery, noho hijanjy ty namany avao Jehovah.​—Vakio Salamo 94:18, 19.

3. Teani-Jehovah hanao ino ty namany?

Teani-Jehovah ty olo iaby, fe ‘ty olo mahity ro mana fifandrambesa marìny aminy.’ (Ohabolana 3:32) Teani-Jehovah ty namany laha miezaky hanao raha soa mifanaraky amy ty sitrapony, sady miala amy ze raha raty halany. Mieritseritsy ty olo sisany hoe tsy ho vita mihintsy ty hanao ani-zay. Fe haini-Jehovah ty raha tsapantsika, ka ekeny ho namany ze olo tena tea azy noho miezaky mafy mampifalifaly azy.​—Salamo 147:11; Asan’ny Apostoly 10:34, 35.

 DINIHO LALIKY

4. Namani-Jehovah Abrahama

Manjary azontsika soa ty dikani-hoe nama-Ndranahary lafa mamaky ty tantarani-Abrahama (na Abrama) tsika. Vakio Genesisy 12:1-4, bakeo iaraho midiniky fanontanea retoa:

• Ino ty raha nampanaovini-Jehovah ani-Abrahama?

• Ino ty raha nampitamanini-Jehovah azy?

• Ino ty nataoni-Abrahama lafa nisy raha nampanaovini-Jehovah azy?

5. Misy raha teani-Jehovah hataoni-namany

Misy raha sisany matetiky teantsika laha atao ty namantsika amintsika.

• Ino zao ty raha teanao hatao ty namanao aminao?

Vakio 1 Jaona 5:3, bakeo iaraho midiniky fanontanea retoa:

• Ino ty teani-Jehovah hatao ty namany?

Mety mila manova ty toetsintsika noho ty fandaisam-batansika tsika mba hanoriha ty safàni-Jehovah. Vakio Isaia 48:17, 18, bakeo iaraho midiniky fanontanea toy:

• Manino ro teani-Jehovah hiova ty namany?

 6. Ty fomba anampeani-Jehovah ty namany

 FAMINTINA

Teani-Jehovah ty ho namanao, le hampeany iha mba hanjary namany.

Famerena

• Akory ty anampeani-Jehovah ty namany?

• Manino ro ampirisihini-Jehovah hiova ty namany?

• Akory ty hevitsinao, mitaky raha sarotsy marè amy ty namany va Jehovah? Ino ty antony?