LESONA 08
E Mafai Ona Avea Oe ma Uō a Ieova
E finagalo Ieova ia e iloa lelei o ia. Aiseā? O le tele lava o lou iloa e faatatau i ona uiga, o le auala e feutagaʻi ai ma tagata, ma lona finagalo, o le tele foʻi lenā o lou manaʻo e faauō iā te ia. Pe mafai moni lava ona avea oe ma uō a le Atua? (Faitau le Salamo 25:14.) O le ā e mafai ona e faia ina ia avea ai oe ma ana uō? O loo tali e le Tusi Paia na fesili, ma faailoa mai ai pe aiseā e sili atu ai ona tāua le lua faauōga ma Ieova, na i lo se isi lava faiā.
1. O le ā o loo valaaulia oe e Ieova e fai?
“Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) O le ā le uiga o lenā manatu? O loo valaaulia oe e Ieova ina ia avea ma ana uō. Atonu e faigatā ona talitonu nisi e mafai ona avea i latou ma uō a le Atua, ona e lē mafai ona vaai atu i ai. Ae i lana Afioga le Tusi Paia, o loo faailoa mai ai e Ieova mea uma e tatau ona tatou iloa e faatatau iā te ia, ina ia mafai ai ona tatou faalatalata atu iā te ia. Pe a faitau i le Tusi Paia, o le a faamalosia ai la tatou faauōga ma Ieova e ui e lē vaaia o ia.
2. Aiseā e avea ai Ieova o sau Uō e sili ona lelei?
E leai se tasi e sili atu ona alofa iā te oe na i lo Ieova. E finagalo ia e fiafia ma ia e talanoa atu iā te ia i soo se taimi e te manaʻomia ai lana fesoasoani. E mafai ona e ʻlafo atu ou popolega uma iā te ia, auā o loo manatu mamafa mai o ia iā te oe.’ (1 Peteru 5:7) E nofosauni Ieova i taimi uma e lagolagosua, faalaeiau ma faalogologo i ana uō.—Faitau le Salamo 94:18, 19.
3. O le ā e faatalitalia e Ieova mai ana uō?
E alofa Ieova i tagata uma, “ae e mafuta vavalalata atu o Ia i ē ua amio saʻo.” (Faataoto 3:32) E faatalitalia e Ieova ana uō e taumafai e fai mea e ōgatusa ma lona finagalo, ae ʻalofia mea e na te inosia. E manatu nisi e lē mafai ona latou tausia tapulaa a Ieova e faatatau i mea lelei ma mea leaga. Ae e alofa mutimutivale Ieova, ma e na te talia i latou uma e alolofa moni iā te Ia ma fai le mea sili e faafiafia ai o Ia.—Salamo 147:11; Galuega 10:34, 35.
SAʻILIʻILI ATILI
Iloilo pe faapefea ona avea oe ma uō a Ieova, ma pe aiseā e avea ai o ia o se Uō e sili ona lelei.
4. Na avea Aperaamo ma uō a Ieova
O le tala a le Tusi Paia iā Aperaamo, (lea sa igoa foʻi o Aperamo) e fesoasoani iā i tatou e malamalama ai i le avea ma uō a le Atua. Faitau e faatatau iā Aperaamo i le Kenese 12:1-4, ona talanoa lea i fesili nei:
-
O le ā na taʻu atu e Ieova iā Aperaamo e fai?
-
O le ā na folafola atu e Ieova iā te ia?
-
Na faapefea ona tali atu Aperaamo i faatonuga a Ieova?
5. O le ā e faatalitalia e Ieova mai ana uō?
E masani lava e tatou te faatalitalia ni mea patino mai i a tatou uō.
-
O ā ni mea e te manaʻo e fai mai e au uō mo oe?
Faitau le 1 Ioane 5:3, ona talanoa lea o le fesili lenei:
-
O le ā e faatalitalia e Ieova mai ana uō?
Ina ia usiusitaʻi iā Ieova, e ono manaʻomia ona suia a tatou amioga po o uiga. Faitau le Isaia 48:17, 18, ona talanoa lea i le fesili lenei:
-
Aiseā e faatalitalia ai e Ieova ana uō e fai suiga?
O se uō lelei e mafai ona ia faamanatu mai mea e aogā ma puipuia ai i tatou. E faia faapena e Ieova i ana uō
6. O le ā e faia e Ieova mo ana uō?
E fesoasoani Ieova i ana uō e onosaia faafitauli. Faaali le VITIŌ, ona talanoa lea i le fesili lenei:
-
Na faapefea ona fesoasoani Ieova i le fafine i le vitiō, ina ia manumalo mai ona mafaufauga sesē ma le lotovaivai?
Faitau le Isaia 41:10, 13, ona talanoa lea i fesili nei:
-
O le ā o loo folafola mai e Ieova e na te faia mo ana uō uma?
-
Pe e te manatu o Ieova o se Uō e sili ona lelei? Aiseā?
E maua mai i au uō vavalalata le fesoasoani pe a e manaʻomia. O le a faia foʻi faapena e Ieova iā te oe
7. O le faauōga ma Ieova e manaʻomia ai fesootaʻiga
O fesootaʻiga e mafai ona faamalosia ai se faauōga. Faitau le Salamo 86:6, 11, ona talanoa lea i fesili nei:
-
E faapefea ona tatou fesootaʻi atu iā Ieova?
-
E faapefea ona fesootaʻi mai Ieova iā i tatou?
E tatou te talanoa atu iā Ieova i le tatalo; ae talanoa mai o ia iā i tatou e ala mai i le Tusi Paia
UA FAAPEA MAI NISI: “E lē mafai ona avea se tasi ma uō a le Atua.”
-
O le ā se mau e faamaonia ai, e mafai ona avea i tatou ma uō a Ieova?
AOTELEGA
E finagalo Ieova e avea oe ma ana Uō, ma o le a ia fesoasoani iā te oe e faalatalata atu iā te ia.
Fesili Autalu
-
E faapefea ona fesoasoani Ieova i ana uō?
-
Aiseā e faatalitalia ai e Ieova ana uō e faia suiga?
-
Pe e te manatu e faigatā tele ona avea oe ma uō a Ieova? Aiseā?
MANATU FAAOPOOPO
E faapefea i lau faauōga ma le Atua ona e maua ai aogā i lou olaga?
“O Ieova—O le Atua e Tatau Ona Iloa Lelei” (Le Olomatamata, Fepuari 15, 2003)
E faapefea ona atiaʻe se lua faauōga ma le Atua?
Vaai pe na faapefea ona faaleleia le olaga o se fafine ona o lana faauōga ma Ieova.
Faalogo atu i talavou a o faamatala mai o latou faalogona e faatatau iā Ieova.