Jehova ufuna kutsi umati kancono. Leni? Ngobe unelitsemba lekutsi nawati buntfu bakhe, indlela lenta ngayo tintfo nobe indlela laphatsa ngayo bantfu, kanye naloko lakufunela kona, utawufuna kuba ngumngani wakhe. Uyakholwa yini kutsi ungaba ngumngani waNkulunkulu? (Fundza Tihlabelelo 25:14.) Yini longayenta kute ube ngumngani wakhe? LiBhayibheli liyayiphendvula lemibuto, liphindze livete kutsi kuba ngumngani waJehova kubaluleke kakhulu kwendlula nobe ngabe ngubuphi buhlobo lesingaba nabo nalabanye bantfu.

1. Jehova ukumema kutsi wenteni?

“Sondzelani kuNkulunkulu, naye utawusondzela kini.” (Jakobe 4:8) Kusho kutsini loko? Jehova ukumema kutsi ube ngumngani wakhe. Labanye bantfu abakholwa kutsi bangaba bangani baNkulunkulu, ngobe abamboni. Nobe kunjalo, eVini lakhe liBhayibheli, Jehova usitjela konkhe lokudzingeka sikwati ngebuntfu bakhe kuze sisondzele kuye. Nasifundza umlayeto Nkulunkulu lasibhalele wona eBhayibhelini, bungani betfu naye buyakhula ngisho nobe singazange sesimbone.

2. Kungani Jehova angumngani lokahle kakhulu longaba naye?

Jehova ukutsandza kwendlula nobe ngabe ngumuphi lomunye umuntfu. Ufuna kutsi ujabule futsi ukhulume naye nawudzinga lusito. Ungaphonsa ‘konkhe kukhatsateka kwakho kuye ngoba uyakukhatsalela.’ (1 Phetro 5:7) Jehova uhlale akulungele kusekela bangani bakhe, kubadvudvuta kanye nekubalalela.—Fundza Tihlabelelo 94:18, 19.

3. Yini Jehova lalindzele kutsi bangani bakhe bayente?

Jehova ubatsandza bonkhe bantfu, “kodvwa ungumngani lomkhulu webantfu labalungile.” (Taga 3:32) Jehova ulindzele kutsi bangani bakhe betame kwenta tintfo letilungile futsi bangatenti tintfo timbi. Labanye beva ungatsi angeke bakhone kwenta tonkhe tintfo Jehova lalindzele kutsi batente. Nobe kunjalo, Jehova uyacabangela. Ubemukela bonkhe labamtsandza mbamba futsi labetama kumjabulisa.—Tihlabelelo 147:11; Imisebenti 10:34, 35.

 CHUBEKA UFUNISISA

4. Abrahama bekangumngani waJehova

Loko lokushiwo liBhayibheli nga-Abrahama (lophindze abitwe ngekutsi ngu-Abrama) kusisita sibone kutsi kusho kutsini kuba ngumngani waNkulunkulu. Fundza nga-Abrahama kuGenesisi 12:1-4, bese nicoca ngalemibuto:

• Jehova watjela Abrahama kutsi enteni?

• Yini Jehova lametsembisa yona?

• Abrahama wenta njani kuloko Jehova bekamtjele kutsi akwente?

5. Loko Jehova lalindzele kutsi bangani bakhe bakwente

Ngalokuvamile natsi silindzele kutsi bangani betfu basentele lokutsite.

• Ngutiphi tintfo lotsandza kutsi bangani bakho bakwentele tona?

Fundza 1 Johane 5:3, bese nicoca ngalombuto:

• Yini Jehova lalindzele kutsi yentiwe bangani bakhe?

Kuze silalele Jehova, kungadzingeka kutsi sishintje indlela lesitiphatsa ngayo kanye nemikhuba lesiyentako. Fundza Isaya 48:17, 18, bese nicoca ngalombuto:

• Kungani Jehova acela bangani bakhe kutsi bente lushintjo ekuphileni kwabo?

 6. Indlela Jehova labasita ngayo bangani bakhe

 LOKO LESICOCE NGAKO

Jehova ufuna kuba nguMngani wakho, futsi utakusita kutsi usondzele kuye.

Yini Loyifundzile?

• Jehova ubasita njani bangani bakhe?

• Kungani Jehova afuna kutsi bangani bakhe bente lushintjo ekuphileni kwabo?

• Ucabanga kutsi kulukhuni yini loko Jehova lalindzele bangani bakhe kutsi bakwente? Kungani utsi yebo, nobe utsi cha?