Yehuwa mapulu i kau makasingkạ mal᷊awọ soal i Sie. Kawe nụe? I Sie mělẹ̌harapẹ̌ mạeng i kau makasingkạ mal᷊awọ soal u manga sipat’E, cara i Sie měkoạ taumata, dingangu apa kapulu-Ne, i kau sarung limembong mapulu mědal᷊ahapị dingang’E. Katewe, apa i kau mangimang i kitẹ botonge mědal᷊ahapị dingangu Mawu? (Basa Mazmur 25:14.) Apa wotonge koatengu tadeạu makoạ hapị’E? Alkitapẹ̌ simimbahẹ̌ manga kakiwal᷊o ene. Alkitapẹ̌ lai nělahẹ kawe nụe Yehuwa botonge makoạ hapị kapaelange su pěbawiahu.

1. Yehuwa něgausẹ̌ si kau gunang měkoạ apa?

”Pẹ̌těngkaranịe su Mawu, kụ i Sie sarung mẹ̌těngkarani si [kau].” (Yakobus 4:8) Nal᷊ahẹ, Yehuwa mapulu i kau makoạ hapị’E. Pirang katau nẹ̌pěndang masigěsạ mědal᷊ahapị dingangu Mawu ual᷊ingu tawe nakasilo si Sie. Katewe, su Hengetang’E, Alkitapẹ̌, Yehuwa nělahẹ manga sipat’E tadeạu i kitẹ botonge mẹ̌těngkarani si Sie. Su tempong i kitẹ mẹ̌basa apa niul᷊ị i Yehuwa su Alkitapẹ̌, i kitẹ sarung mědal᷊ahapị dingang’E maning i kitẹ tawe nakasilo si Sie.

2. Kawe nụe Yehuwa botonge makoạ hapị kapaelange?

Yehuwa sěbạe makěndagẹ̌ si kau, kụ tawẹ apa makasul᷊ung kakěndag’E ene. I Sie mapulu i kau mal᷊uasẹ̌ dingangu mẹ̌doa si Sie su tempong i kau membutuhkan tul᷊umang. I kau botonge ’měnarakang kěbị kaghaghěnggangu si Sie ual᷊ingu i Sie mapadul᷊i si kau’. (1 Petrus 5:7) Yehuwa sěntiniạ sadia mẹ̌tul᷊ung, měhiborẹ̌, dingangu dumaringihẹ̌ su manga hapị’E.​—Basa Mazmur 94:​18, 19.

3. Yehuwa mapulu mědal᷊ahapị dingangu taumata kerea?

Yehuwa makěndagẹ̌ su kěbị taumata, ”katewe i Sie mědẹ̌dal᷊ahapị mapia dingangu taumata naunge matul᷊idẹ̌”. (Amsal 3:​32) Yehuwa mapulu hapị’E měkoạ barang mapia dingangu mẹ̌těngkarau bọu barang dal᷊akị. Pirang katau nẹ̌pěndang i sire tawe makatol᷊e standar i Yehuwa soal u mapia dingangu dal᷊akị. Katewe, Yehuwa kai matal᷊ěntụ. I Sie mapulu mědal᷊ahapị dingangu taumata apang kahěngang-hěngang makěndagẹ̌ si Sie dingangu mětẹ̌tawakal᷊i gunang makal᷊uasẹ̌ naung’E.​—Mazmur 147:11; Kisah 10:​34, 35.

 BANGKA PAKARAL᷊UNG

4. Abraham kai hapị i Yehuwa

Běkeng Alkitapẹ̌ soal i Abraham (Abram) makatul᷊ung si kitẹ makasingkạ taumata kerea botonge makoạ hapịu Mawu. Basạe běke soal i Abraham su Kejadian 12:​1-4. Bọu ene bisarai manga kakiwal᷊o ini:

• Yehuwa nẹ̌parenta si Abraham gunang měkoạ apa?

• Apa dianding i Yehuwa si sie?

• Apa nikoạ i Abraham su apang bọu nakaringihẹ̌ parentang i Yehuwa?

5. Apa dẹ̌dorongang i Yehuwa bọu manga hapị’E?

I kitẹ biasane mělẹ̌harapẹ̌ piram baụ hal᷊ẹ̌ bọu manga hapị i kitẹ.

• Apa biasane lẹ̌harapengu bọu hapịu?

Basa 1 Yohanes 5:​3, bọu ene bisarai kakiwal᷊o ini:

• Apa lẹ̌harapeng i Yehuwa bọu manga hapị’E?

Gunang tumuhụ si Yehuwa, i kitẹ aramanung harusẹ̌ měmal᷊ui kakanoạ arau sipati kitẹ. Basa Yesaya 48:​17, 18, bọu ene bisarai kakiwal᷊o ini:

• Kawe nụe Yehuwa mědẹ̌dorong manga hapị’E gunang měkoạ pẹ̌bawal᷊ui?

 6. Apa nikoạ i Yehuwa gunang manga hapị’E?

 RINGKASAN

Yehuwa mapulu makoạ hapịu, kụ i Sie sarung mẹ̌tul᷊ung si kau mẹ̌těngkarani si Sie.

Apa seng nikaěndungangu?

• Kerea Yehuwa mẹ̌tul᷊ung manga hapị’E?

• Kawe nụe Yehuwa něngoro manga hapị’E gunang měkoạ pẹ̌bawal᷊ui?

• Tumuhụ si kau, apa Yehuwa mědẹ̌dorong tumanịu mal᷊awọ bọu manga hapị’E? Kawe nụe i kau simimbahẹ̌ kerene?