Jeová hakarak Ita atu hatene nia diʼak liután. Tanbasá? Nia espera katak kuandu Ita aprende liután kona-ba ninia hahalok, ninia dalan sira, no saida mak nia hakarak ba Ita, Ita sei hakarak liután atu sai ninia belun. Maibé Ita bele sai Jeová nia belun ka lae? (Lee Salmo 25:14.) Saida mak Ita bele halo atu sai ninia belun? Bíblia fó resposta ba pergunta sira-neʼe no hatudu tanbasá Jeová bele sai Ita-nia Belun neʼebé diʼak liu.

1. Jeová konvida Ita atu halo saida?

“Hakbesik ba Maromak, no nia sei hakbesik ba imi.” (Tiago 4:8) Liafuan neʼe katak sá? Jeová konvida Ita atu sai ninia belun. Ema balu sente susar atu sai belun ho Maromak tanba ita labele haree nia. Maibé, liuhusi ninia Liafuan Bíblia, Jeová fó sai buat hotu neʼebé ita presiza atu hatene kona-ba ninia hahalok hodi ita bele hakbesik ba nia. Bainhira ita lee Maromak nia mensajen mai ita iha Bíblia, ita-nia relasaun ho Jeová sei sai metin maski ita labele haree nia.

2. Tanbasá Jeová mak Belun neʼebé diʼak liu?

La iha ema ida mak hadomi Ita liu fali Jeová nia domin ba Ita. Nia hakarak Ita kontente no koʼalia ba nia kuandu Ita presiza ajuda. Ita bele ‘entrega Ita-nia laran-susar hotu ba nia, tanba nia hanoin Ita’. (1 Pedro 5:7) Jeová sempre prontu atu apoia, fó kmaan, no rona ba ninia belun sira.​—Lee Salmo 94:18, 19.

3. Atu bele sai Jeová nia belun, saida mak ita presiza halo?

Jeová hadomi ema hotu, maibé “nia sai belun neʼebé besik ho ema laran-loos”. (Provérbios 3:32) Jeová hakarak ninia belun sira atu halo buat neʼebé mak diʼak tuir ninia haree, no hasees an husi buat neʼebé aat tuir ninia haree. Maibé ema balu sente katak sira nunka bele halo ida-neʼe. Maski nuneʼe, Jeová komprende ita ida-idak. Nia simu ema neʼebé hadomi duni nia no hakaʼas an atu halo buat neʼebé lori kontente ba nia.​—Salmo 147:11; Apóstolu 10:34, 35.

 KEʼE KLEʼAN

4. Abraão mak Jeová nia belun

Bíblia nia istória kona-ba Abraão (ka Abram) ajuda ita komprende kona-ba sai Jeová nia belun katak sá. Lee kona-ba Abraão iha Génesis 12:1-4. Depois koʼalia hamutuk kona-ba pergunta tuirmai:

• Jeová husu Abraão atu halo saida?

• Saida mak Jeová promete ba Abraão?

• Saida mak Abraão halo?

5. Saida mak Jeová husu ba ninia belun sira atu halo

Baibain ita hakarak ita-nia belun sira atu halo buat ruma.

• Buat saida deʼit mak Ita hakarak atu Ita-nia belun halo ba Ita?

Lee 1 João 5:3, depois koʼalia hamutuk kona-ba pergunta tuirmai:

• Jeová hakarak ninia belun sira atu halo saida?

Atu halo tuir Jeová, karik ita presiza troka ita-nia hahalok balu. Lee Isaias 48:17, 18, depois koʼalia hamutuk kona-ba pergunta tuirmai:

• Tanbasá Jeová husu ninia belun sira atu halo mudansa iha sira-nia moris?

 6. Saida mak Jeová halo ba ninia belun sira

 PONTU IMPORTANTE

Jeová hakarak sai Ita-nia Belun, no nia sei ajuda Ita atu hakbesik ba nia.

Rezumu

• Oinsá mak Jeová ajuda ninia belun sira?

• Tanbasá mak Jeová husu ninia belun sira atu halo mudansa iha sira-nia moris?

• Tuir Ita-nia hanoin, susar ka lae atu sai Jeová nia belun? Tanbasá?