Tea i Jehovah hahafantatse aze soa rehe. Ino ty anto’e? Mitamà reke fa arakarake ty ianara’o ty toetse’e, ty hilala’e naho ty raha safirie’e ty hahavy azo hagniry ho nama’e. Faie afake minamagne aman’Andrianagnahare vata’e vao rehe? (Vakio ty Salamo 25:14.) Akore ty hahavy azo ho nama’e? Mamale o fagnonteneagne rehoe ty Baiboly. Trea ao ka fa i Jehovah ty namagne fara’e fanjaka.

1. Mandrisike azo hanao ino ty Jehovah?

“Magnarinea an’Andrianagnahare, le hagnarine anareo reke.” (Jakoba 4:8) Ino ty dika izay? Mandrisike azo mba hinamagne ama’e ty Jehovah. Faie tsy trea maso reke. Mieretseretse areke ty ndaty ila’e fa sarotse ty hinamagne ama’e. Ndra tie eo zay, le ampahafantare i Jehovah antikagne amy Baiboly ao ty toetse’e, mba hahavy antikagne hagnarine aze. Hinamagne amy i Jehovah areke tika naho mamaky ty raha saontsie’e ao ndra tie tsy treantikagne maso aza reke.

2. Nagnino ty Jehovah ro namagne tsy misy hoe’e?

Tsy misy mitovy ama’e ty hatea i Jehovah azo. Tea i Jehovah hirehake ama’e rehe naho fa misy raha manahiragne azo sady irie’e ho sambatse ka rehe. ‘Ankigno ama’e ze raha mampinekoneko azo satria mikarakara azo reke.’ (1 Petera 5:7) Vognogne hanohagne naho hampahery vaho hijanjigne ze nama’e ty Jehovah.​—Vakio ty Salamo 94:18, 19.

3. Ino ty raha také i Jehovah amy ze nama’e?

Tea i Jehovah iaby ze kila ndaty “faie ty ndaty maregne ro managne fifandrambesagne marine ama’e.” (Ohabolana 3:32) Fale ty Jehovah naho fa tea ze raha tea’e sady magnalavitse ze raha heje’e ty nama’e. Misy ty mihevetse fa tsy ho vita’e ty hagnorike ty fitsipy i Jehovah miomba ty soa naho ty raty. Faie mahafantatse ty fetra ty raha vitantikagne ty Jehovah. Eké’e ho nama’e ze ndaty tena tea Aze sady manao ze fara heri’e mba hampifaleagne Aze.​—Salamo 147:11; Asan’ny Apostoly 10:34, 35.

 ANDAO HANDINEKE TY PITSOPITSO’E

4. Nama i Jehovah ty Abrahama

Magnampe antikagne hahafantatse ty atao tihoe naman’Andrianagnahare ty tantara i Abrahama (ndra Abrama) amy Baiboly ao. Vakio amy Genesisy 12:1-4 ao ty miomba i Abrahama, le iharò midineke ty fagnonteneagne retoa:

• Ino ty raha nampanoe i Jehovah i Abrahama?

• Ino ty raha nampitamae i Jehovah aze?

• Akore ty natao i Abrahama amy i raha nampanoe i Jehovah aze rey?

5. Ino ty raha tea i Jehovah hatao ty nama’e?

Teantikagne naho manao raha ho antika ty namantikagne.

• Ino iaby ty raha tea’o hatao ty nama’o ama’o?

Vakio ty 1 Jaona 5:3, sady iharò midineke ty fagnonteneagne toy:

• Ino ty raha tea i Jehovah hatao ty nama’e?

Toko’e hagnova ty findesam-batantikagne naho ty toetsentikagne ila’e tika naho te ho nama i Jehovah. Vakio ty Isaia 48:17, 18, sady iharò midineke ty fagnonteneagne toy:

• Nagnino ty nama i Jehovah ro tea’e hanao fagnovàgne amy ty fomba fiaigna’e?

 6. Ino ty atao i Jehovah mba hagnampeagne ty nama’e?

 FAMINTIGNAGNE

Te hinamagne amantikagne ty Jehovah sady ampea’e ka tikagne mba hinamagne ama’e.

Fameregnagne

• Akore ty agnampea i Jehovah ty nama’e?

• Nagnino ty nama i Jehovah ro tea’e hagnova ty fomba fiaigna’e?

• Naho ty heve’o, sarotse vao ty raha také i Jehovah amy ty nama’e? Hazavao.