WEKELO 08
Wɛ koka monga ɔngɛnyi waki Jehowa
Jehowa nangaka dia wɛ mbeeya dimɛna. Lande na? Nde nongamɛka dia lam’ayotalekaka mbeya lonto lande, mboka yande ndo asangwelo ande, mbayoyotalekaka nkombola monga ɔngɛnyi ande. Onde wɛ koka mɛtɛ monga ɔngɛnyi waki Nzambi? (Adia Osambo 25:14.) Kakɔna kakokayɛ nsala dia wɛ nkoma ɔngɛnyi ande? Bible kadimolaka ambola asɔ ndo mɛnyaka lande na kele lɔngɛnyi lasayɛ la Jehowa mbele lɔngɛnyi loleki ohomba.
1. Kakɔna kakɔlɔmba Jehowa dia nsala?
“Nyoyasukanya la Nzambi, ko nde ayoyasukanya la nyu.” (Jakɔba 4:8) Kakɔna kalembetshiya dui sɔ? Jehowa kɔlɔmbaka dia wɛ nkoma ɔngɛnyi ande. Anto amɔtshi koka monga l’okakatanu dia mbetawɔ dia vɔ kokaka nkoma angɛnyi waki Nzambi, lam’ele hawokoke mbɛna. Koko lo Ɔtɛkɛta ande, Bible, Jehowa tosholɛka dui tshɛ diahombaso mbeya lo kɛnɛ kendana la lonto lande dia sho ndjasukanya la nde. Etena kadiaso losango laki Nzambi lele lo Bible, lɔngɛnyi lasaso la nde keketalaka kaanga mbele tatawɛnaka ndooko lushi.
2. Lande na kele Jehowa Ɔngɛnyi woleki dimɛna?
Ndooko onto layokoka ngandji ko mbɛdima la Jehowa. Nde nangaka wɛ monga l’ɔngɛnɔngɛnɔ ndo dia wɛ mbɔlɔmbaka etena tshɛ keyɛ l’ohomba w’ekimanyielo. Wɛ koka ‘nkitsha ekiyanu ayɛ tshɛ le nde, nɛ dia nde ndjakiyanyaka dikambo diayɛ.’ (1 Petero 5:7) Jehowa ekɔ nshi tshɛ suke dia nsukɛ, nkeketsha ndo mpokamɛ angɛnyi ande.—Adia Osambo 94:18, 19.
3. Kakɔna kalongamɛ Jehowa oma le angɛnyi ande?
Jehowa mbokaka anto tshɛ ngandji, “koko nde ekɔ ɔngɛnyi wa ma ma la anto wosembwe.” (Tokedi 3:32) Jehowa nongamɛka di’angɛnyi ande nsala akambo wɔsande dia wekɔ ɔlɔlɔ ndo dia vɔ mbewɔ nsala akambo wɔsande dia wekɔ kɔlɔ. Anto amɔtshi mbeyaka mfɔnya dia hawokokaki pondjo nsɛna lo yoho yɔtɔnɛ l’atɔndɔ wa Jehowa wendana la ɔlɔlɔ la kɔlɔ. Koko, Jehowa ekɔ lokana kɛtshi. Nde mbetawɔka onto tshɛ lawoka mɛtɛ ngandji ndo lasala tshɛ dia mbɔngɛnyangɛnya.—Osambo 147:11; Etsha 10:34, 35.
NYOMOTSHIMOLA
Eka awui efula wendana la woho wakokayɛ nkoma ɔngɛnyi waki Jehowa, ndo shola lande na kende Ɔngɛnyi woleki dimɛna wakokayɛ nkondja.
4. Abrahama aki ɔngɛnyi waki Jehowa
Ɔkɔndɔ wa lo Bible wendana la Abrahama (lelamɛ nto Abrama) tokimanyiyaka dia nshihodia kɛnɛ kalembetshiya monga ɔngɛnyi waki Nzambi. Nyadia awui wendana la Abrahama lo Etatelo 12:1-4. Ndo oma laasɔ, nyɔkɛtshanya ambola anɛ:
-
Kakɔna kakalɔmbɛ Jehowa Abrahama dia nsala?
-
Kakɔna kakolake Jehowa?
-
Kakɔna kakasale Abrahama lo kɛnɛ kakɔlɔmbɛ Jehowa dia nsala?
5. Kɛnɛ kalongamɛ Jehowa oma le angɛnyi ande
Mbala tshɛ sho nongamɛka akambo amɔtshi oma le angɛnyi aso.
-
Naa akambo amɔtshi watoyolongamɛka di’angɛnyi ayɛ kosalɛ?
Nyadia 1 Joani 5:3, ndo oma laasɔ, nyɔkɛtshanya dimbola nɛ:
-
Kakɔna kalongamɛ Jehowa oma le angɛnyi ande?
Dia nkitanyiya Jehowa, mbeyaka monga ohomba sho ntshikitanya lɔkɛwɔ laso kana lonto laso. Nyadia Isaya 48:17, 18, ndo oma laasɔ, nyɔkɛtshanya dimbola nɛ:
-
Lande na kalɔmba Jehowa angɛnyi ande dia nsala etshikitanu?
Ɔngɛnyi w’oshika ayotohola akambo wakoka tokokɛ ndo wele la wahɔ le so. Jehowa salaka woho akɔ waamɛ otsha le angɛnyi ande
6. Kɛnɛ kasalɛ Jehowa angɛnyi ande
Jehowa kimanyiyaka ekambi ande dia ndɔshana l’ekakatanu. Nyende VIDƐO, ndo oma laasɔ, nyɔkɛtshanya dimbola nɛ:
-
Ngande wakakimanyiya Jehowa womoto la lo vidɛo nyɛ dia ndɔshana la tokanyi ta kɔlɔ ndo la ekakatanu?
Nyadia Isaya 41:10, 13, ndo oma laasɔ, nyɔkɛtshanya ambola anɛ:
-
Kakɔna kalaka Jehowa dia salɛ angɛnyi ande tshɛ?
-
Onde wɛ fɔnyaka dia Jehowa ayonga ɔngɛnyi w’oshika? Lande na?
Angɛnyi wa ma ma toshaka ekimanyielo etena keso la tɔ ohomba. Jehowa lawɔ ayokokimanyiya
7. Dia monga ɔngɛnyi waki Jehowa, sho pombaka sawolaka la nde ndo mbohokamɛka
Sawo keketshaka lɔngɛnyi. Nyadia Osambo 86:6, 11, ndo oma laasɔ, nyɔkɛtshanya ambola anɛ:
-
Ngande wakokaso nsawola la Jehowa?
-
Ngande wasawola Jehowa la so?
Sho tɛkɛtaka la Jehowa oma lo tshimbo ya dɔmbɛlɔ ndo nde tɛkɛtaka la so oma lo tshimbo ya Bible
ANTO AMƆTSHI MBUTAKA ƆNƐ: “Onto hakoke ndjasukanya la Nzambi.”
-
Naa divɛsa diayokamba la yɛ dia mbaɛnya dia sho koka monga angɛnyi waki Jehowa?
LO TSHENA PE
Jehowa nangaka monga ɔngɛnyi ayɛ, ndo nde ayokokimanyiya dia wɛ ndjasukanya la nde.
Ovuswelo
-
Ngande wakimanyiya Jehowa angɛnyi ande?
-
Lande na kalɔmba Jehowa angɛnyi ande dia nsala etshikitanu?
-
Onde wɛ fɔnyaka dia ekɔ dui dia wolo dia nkoma ɔngɛnyi waki Jehowa? Lande na?
SALA EYANGELO
Ngande wakoka lɔngɛnyi lele lam’asayɛ la Nzambi ntshikitanya lɔsɛnɔ layɛ?
“Jehowa ekɔ Nzambi kasungana sho mbeeya” (Tshoto y’Etangelo, Ngɔndɔ ka hende 15, 2003)
Eka woho wa nkoma ɔngɛnyi waki Nzambi.
Shola lande na ketawɔ womoto ɔmɔtshi dia diɔtɔnganelo diasande la Jehowa mbakoshimbɛ.
Hokamɛ kɛnɛ kata ɛlɔngɔlɔngɔ la esekaseka lo woho wayaokawɔ lo dikambo dia Jehowa.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
