Yehovha u lava u n’wi tiva kahle. Hikwalaho ka yini? Yehovha wa swi tiva leswaku loko u ya u dyondza hi vumunhu bya yena, tindlela ta yena ni hi xikongomelo xakwe, u ta ya emahlweni u lava ku va munghana wa yena. U vona onge u nga swi kota ku va munghana wa Xikwembu? (Hlaya Pisalema 25:14.) I yini leswi u nga swi endlaka leswaku u va munghana wa xona? Bibele yi na tona tinhlamulo ta swivutiso leswi naswona yi tlhela yi hi byela leswaku hikwalaho ka yini swi ri swa nkoka ngopfu ku va munghana wa Yehovha.

1. Yehovha u lava u endla yini?

“Tshinelani eka Xikwembu, kutani xi ta tshinela eka n’wina.” (Yakobo 4:8) Sweswo swi vula yini? Yehovha u lava leswaku u va munghana wakwe. Van’wana va ehleketa leswaku a swi koteki ku va munghana wa Xikwembu hikuva a va koti ku xi vona. Kambe eRitweni rakwe ku nga Bibele, Yehovha u hi hlamusela hi vumunhu byakwe leswaku hi ta kota ku va vanghana vakwe. Loko hi hlaya Bibele kutani hi tiva leswi Yehovha a swi lavaka eka hina, vunghana bya hina na yena byi ya byi kula hambiloko hi nga si tshama hi n’wi vona.

2. Hikwalaho ka yini Yehovha a ri Munghana lonene ku tlula hinkwavo?

Yehovha u ku rhandza ku tlula ndlela leyi munhu un’wana ni un’wana a ku rhandzaka ha yona. U lava leswaku u tsaka ni ku n’wi byela loko u lava ku pfuniwa. U nga ‘lahlela ku vilela ka wena hinkwako eka yena, hikuva wa khathala hi wena.’ (1 Petro 5:7) Yehovha u tshama a lunghekele ku pfuna, ku chavelela ni ku yingisa vanghana vakwe.—Hlaya Pisalema 94:18, 19.

3. Yehovha u lava leswaku vanghana vakwe va endla yini?

Yehovha u rhandza vanhu hinkwavo, “kambe i munghana lonkulu wa lavo lulama.” (Swivuriso 3:32) Yehovha u lava leswaku vanghana vakwe va ringeta ku endla swilo leswinene va papalata leswo biha. Van’wana va vona onge a va nge swi koti ku hanya hi milawu ya Yehovha. Hambiswiritano, Yehovha u ni ntwelavusiwana. U rhandza lava N’wi rhandzaka ni lava tikarhatelaka ku N’wi tsakisa.—Pisalema 147:11; Mitirho 10:34, 35.

 ANAKANYISISA

4. Abrahama a a ri munghana wa Yehovha

EBibeleni mhaka ya Abrahama (loyi nakambe a a vitaniwa Abrama) yi hi pfuna ku twisisa leswi vulaka swona ku va munghana wa Xikwembu. Hlaya hi mhaka ya Abrahama eka Genesa 12:1-4, ivi mi bula hi swivutiso leswi:

• Yehovha u byele Abrahama leswaku a endla yini?

• Yehovha u n’wi tshembise yini?

• Abrahama u endle yini loko Yehovha a n’wi rhuma?

5. Leswi Yehovha a lavaka vanghana vakwe va swi endla

Hi ntolovelo hi langutele leswaku vanghana va hina va endla swo karhi.

• Hi swihi swilo swin’wana leswi u lavaka leswaku vanghana va wena va ku endlela swona?

Hlaya 1 Yohane 5:3, ivi mi bula hi xivutiso lexi:

• Yehovha u lava leswaku vanghana vakwe va endla yini?

Leswaku hi yingisa Yehovha, swi nga ha lava hi cinca mahanyelo ni vumunhu bya hina. Hlaya Esaya 48:17, 18, ivi mi bula hi xivutiso lexi:

• Hikwalaho ka yini Yehovha a lava leswaku vanghana vakwe va n’wi yingisa?

 6. Leswi Yehovha a swi endlelaka vanghana vakwe

 NKATSAKANYO

Yehovha u lava ku va Munghana wa wena naswona u ta ku pfuna u va munghana wakwe.

Mpfuxeto

• Yehovha u va pfuna njhani vanghana vakwe?

• Hikwalaho ka yini Yehovha a lava leswaku vanghana vakwe va cinca mahanyelo?

• Xana u ehleketa leswaku Yehovha u langutele leswaku vanghana vakwe va endla leswi va nga swi kotiki ku swi endla? Hikwalaho ka yini u vula tano?