Yehovha a lava swaku u mu tiva kahle. Hi mhaka muni? Hi mhaka wa swi tiva swaku loko u tiva wumunhu la yena ni ndlela leyi a yentxaka minchumu hi yona ni leswaku a lava u va ni wutomi la ku tsakisa, u ta navela ku va munghanu wa yena. Kambe swa koteka ku va munghanu wa Xikwembu? (Lerha Tipisalema 25:14.) U fanele u yentxa yini swaku u va munghanu wa Xikwembu? Bibele li na tona tinhlamulu ta swivutiso leswi, li tlhela li vula swaku ku va munghanu wa Yehovha i nchumu wa lisima ku tlula minchumu hinkwayu leyi u nga ha vaka na yona ka wutomi la wena.

1. Yehovha a ku rhamba swaku u yentxa yini?

Bibele li li: “Tshinelani ka Xikwembu kutani na xona xi ta tshinela ka n’wina.” (Yakobo 4:8) Swi lava ku vula yini leswo? Swi lava ku vula swaku Yehovha wa ku rhamba swaku u va munghanu wa yena. Van’wana va li: Ni nga swi kotisa ku yini ku va munghanu wa Xikwembu na ni nga swi koti ku xi vona. Ka Bibele, Yehovha a hi byela leswi hi faneleke hi swi tiva hi yena. Hi mhaka leyo, hi nga swi kota ku va vanghanu va yena. Loko hi lerha Bibele, wunghanu la hina na Yehovha li ya li kula hambileswi hi kalaka hi nga swi koti ku mu vona.

2. Hi mhaka muni Yehovha a li munghanu wa lisima ku tlula hinkwavu?

Phela a ku na munhu lweyi a ku rhandzaka ku tlula Yehovha. A lava swaku u va ni wutomi la ku tsakisa u tlhela u kombela ku pfuniwa hi yena loko u lava ku pfuniwa. ‘Rhula ku vilela ka wena hinkwaku ka xona hikusa xa ku hlayisa.’ (1 Pedru 5:7) Yehovha a tshama a lunghile swaku a pfuna vanghanu va yena, a va tiyisa ni ku va yingisela. — Lerha Tipisalema 94:18, 19.

3. Yehovha a lava swaku vanghanu va yena va yentxa yini?

Yehovha a rhandza vanhu hinkwavu, “kambe a ni wunghanu la likulu ni wa ku lulama.” (Swivuriso 3:32) Yehovha a lava swaku vanghanu va yena va tikarhata swaku va yentxa minchumu ya yinene. Van’wana va pimisa swaku a va nge tshuki va swi kotile ku yentxa leswi Xikwembu xi swi lavaka kambe Yehovha wa swi twisisa. Hinkwavu lava va mu rhandzaka hikakunene naswona va lavaka ku mu tsakisa, va nga swi kota ku va vanghanu va yena. — Tipisalema 147:11; Mintirho 10:34, 35.

 DJONDZA SWIN’WANA

4. Abrahamu a ve munghanu wa Yehovha

Leswi Bibele li swi vulaka hi Abrahamu (lweyi a tlhelaka a vitaniwa Abramu) swi hi pfuna ku twisisa swaku swi vula yini ku va munghanu wa Xikwembu. Lerhani hi Abrahamu ka Genesa 12:1-4. Mi gama mi bula hi swivutiso leswi landzelaka:

• Yehovha a kombele Abrahamu swaku a yentxa yini?

• I mpsini leswi Yehovha a nga tshembisa Abrahamu?

• Naswona Abrahamu a yentxe yini?

5. Leswi Yehovha a lavaka swaku vanghanu va yena va swi yentxa

Hi ntolovelo ku ni leswi hi lavaka swaku vanghanu va hina va hi yentxela swona.

• I yini leswi u rhandzaka swaku vanghanu va wena va ku yentxela swona?

Lerhani 1 Yohani 5:3, mi gama mi bula hi xivutiso lexi landzelaka:

• Yehovha a nyimele yini ka vanghanu va yena?

Leswaku hi va vanghanu va Yehovha, swi nga ha lava hi txintxa ndlela leyi hi yentxaka hi yona minchumu ni wumunhu la hina. Lerhani Esaya 48:17, 18, mi gama mi bula hi xivutiso lexi xi landzelaka:

• Hi mhaka muni Yehovha a kombela swaku vanghanu va yena va txintxa mahanyelo ya vona?

 6. Leswi Yehovha a swi yentxelaka vanghanu va yena

 LESWI HI NGA SWI DJONDZA

Yehovha a lava swaku u va munghanu wa yena, naswona a nga ku pfuna swaku u tshinela ka yena.

Ku kambela leswi hi nga swi djondza

• Yehovha a va pfunisa ku yini vanghanu va yena?

• Hi mhaka muni Yehovha a kombela swaku vanghanu va yena va txintxa wutomi la vona?

• U pimisa swaku swa karhata ku va munghanu wa Yehovha? Loko u pimisa leswo, hi mhaka muni?