Jeoba uékasïndi eskajtsï chá sánderu sési míteaka. ¿Andi? Jimboka ima mintsikasïnga eska chá uékaaka imeeri amigueni engajtsï niáraaka sési míteani imeeri kualidadichani, na enga újka ambe ma ka ambe enga eratsetini jaka úni chánksïni jimbo. ¿Peru ma meru úsïni imeeri amigueni? (Arhinta je Salmo 25:14). ¿Ambejtsï uaa úni chá parajtsï niárani Tata Diosïri amigueni? Bibliajtsïni mókuchiantasïndi ini kurhamarhikuechani ka aiangusïndijtsïni andisï Tata Diosïri pájperakua sánderu jukaparhakue ka eska ambe uéjkini engajtsï chá uaaka jatsini.

1. ¿Ambeksïni aiachisïni Jeoba chánksïni?

“Andarhiera je [Tata] Diosïni, ka imajtuksïni andarhieraati chánksïni” (Santiagu 4:8). ¿Ambe arhikuekasïni i ambe? Eska Jeoba uékasïnga chaari amigueni. Jamberiksï máru úkua jukanchajti eratseni eskaksï uaaka Tata Diosïri amigueni jimbokaksï no úsïnga exeni. Peru imeeri Karakatarhu, Jeobajtsïni aiangusïndi ambe engachi jatsika para míteni imeeri ambe, komueska na enga jásïika parachi úni andarhierani imani. Engachi arhintajka Bibliarhu ambe engajtsïni Tata Diosï uéjka aianguni, sánderuchi ambakiti pájperakua ma jatsisïnga Jeobani jingoni, nájkirukachi no újka exeni.

2. ¿Andisï Jeoba jindee sánderu ambakiti amigu engajtsï chá uaaka jatsini?

Jeobaksïni sánderu uékasïndi eska né uéjki. Ima uékasïndi eska chá tsípikua jingoni irekaaka ka eskajtsï kómarhiaka méntkisï engajtsï uétarhinchani jauaka jarhuajperata. Uaakajtsï jurajkuani “iámindu chaari pendientichani [o uandanhiatechani] imani jingoni, jimboka ima pendienti pásïnga chánksïni jimbo” (1 Pedru 5:7). Jeoba méntkisï listu jarhasïndi para jarhuajpeni, sési pʼikuastpintani ka para kurhajchaani imeeri amiguechani (arhinta je Salmo 94:18, 19).

3. ¿Ambechi jatsiski para úni parachi niárani Jeobaeri amigueni?

Jeoba xénchaasïndi iámindu kʼuiripuechani, joperu “ambakiti pájperakua ma jatsisti imeecha jingoni engaksï jurhimbitku jámajka” (Proverbios 3:32). Jeoba uékasïndi eskaksï imeeri amiguecha jánguarhintaaka imani ambe úni enga ima uandajka eska sési jarhaska ka eskaksï no uaaka imani ambe enga ima uandajka eska no sési jarhaska. Jamberiksï máru eratsejti eskaksï no méni uaaka imani ambe úni enga Jeoba uéjka ka no úni imani ambe enga no sési jaka. Joperujtsïni Jeoba kurhanguchisïndi ka jiókuarhiasïndi iáminduechani engaksï xénchajka ka engaksï kánikua jánguarhintajka imani ambe úni enga ima jaiapanhintajka (Salmo 147:11; Ukuecha 10:34, 35).

 JORHENGUARHI JE SÁNDERU AMBE

4. Abraáni Jeobaeri amiguespti

Bibliarhu anapu istoria Abraániri (enga ístu arhinhapka Abráni) jarhuatasïndijtsïni kurhanguni ambe enga arhikuekajka Tata Diosïri amigueni. Arhinta je Abraániri ambe ixú Génesis 12:1-4 ka uandontskuarhi je íri ambe:

• ¿Ambe arhispti Jeoba Abraánini eska úpiringa?

• ¿Ambe aiakuspi Jeoba Abraánini?

• ¿Ambe úspi Abraáni jiáni enga Jeoba arhipka ambe enga úpiringa?

5. Ambe enga Jeoba uéjka eskaksï uaaka imeeri amiguecha

Sáno méntkisï uékasïngachi eskaksï juchaari amiguecha uaaka ambe ma juchantsïni jimbo.

• ¿Chá ambe erokuarhisïni eskaksï uaaka chaari amiguecha chánksïni jimbo?

Arhinta je 1 Juanu 5:3 ka uandontskuarhi je íri ambe:

• ¿Ambe uékasïni Jeoba eskaksï uaaka imeeri amiguecha?

Parachi kurhajchani Jeobani, jamberichi jatsiaka para mójtakuni máru ambe engachi újka o na engachi jásïika. Arhinta je Isaías 48:17, 18 ka uandontskuarhi je íri ambe:

• ¿Andisï Jeoba arhiajki imeeri amiguechani eskaksï mójtakurhiaka?

 6. Ambe enga Jeoba újka imeeri amiguecha jimbo

 AMBE ENGACHI JORHENGUARHIKA

Jeoba uékasïndi chaari amigueni ka jarhuataatiksïni parajtsï úni andarhierani.

Ambejtsï jorhenguarhiski

• ¿Néna jarhuataasïni Jeoba imeeri amiguechani?

• ¿Andisï Jeoba arhiajki imeeri amiguechani eskaksï mójtakuaka máru ambe?

• ¿Chá ísï exesïni eska kánikua úkua jukaska Jeobaeri amigu úkuarhini? ¿Andijtsïsï ísï eratsejki?