NGUDO 08
Ni Nga Vha Khonani Ya Yehova
Yehova u ṱoḓa uri ni mu ḓivhe khwine. Ndi ngani? U fhulufhela uri ni ḓo ṱoḓa u vha khonani yawe ya tsini musi ni tshi ḓivha zwo engedzeaho nga ha zwine a vha zwone, nḓila ine a fara ngayo vhathu na zwine a zwi ṱoḓa kha inwi. Ni vhona u nga zwi a konadzea u vha khonani ya Mudzimu? (Vhalani Phisalema 25:14.) Ni nga ita mini uri ni vhe khonani yawe? Bivhili i fhindula dzenedzi mbudziso nahone i dzumbulula uri ndi ngani u vha khonani ya Yehova zwi zwa ndeme u fhira u vha khonani ya muthu naho e ufhio.
1. Yehova u ni humbela uri ni ite mini?
“Sendelani tsini na Mudzimu na ene u ḓo sendela tsini na inwi.” (Yakobo 4:8) Zwenezwi zwi amba mini? Yehova u khou ni humbela uri ni vhe khonani yawe. Vhaṅwe vha wana zwi tshi vha konḓela u tenda uri vha nga vha khonani dza Mudzimu nga nṱhani ha uri a vha koni u mu vhona. Fhedzi Bivhilini, Yehova u dzumbulula zwoṱhe zwine ra ṱoḓa u zwi ḓivha nga ha zwine a vha zwone u itela uri ri sendele tsini nae. Musi ri tshi vhala zwe Yehova Mudzimu a ri ṅwalela zwone Bivhilini, vhukonani hashu nae vhu a khwaṱha naho ri sa athu u vhuya ra mu vhona.
2. Ndi ngani Yehova e Khonani ya khwinesa u fhira vhoṱhe?
A hu na muthu ane a ni funa u fana Yehova. U ṱoḓa ni tshi takala na uri ni ambe nae tshifhinga tshiṅwe na tshiṅwe musi ni tshi ṱoḓa thuso. Ni mu “kumedzele mbilaelo dzaṋu dzoṱhe, ngauri u na ndavha na inwi.” (1 Petro 5:7) Yehova u dzula o lugela u tikedza, u khuthadza na u thetshelesa khonani dzawe.—Vhalani Phisalema 94:18, 19.
3. Yehova u ṱoḓa ri tshi ita mini uri ri vhe khonani dzawe?
Yehova u funa vhathu vhoṱhe, “fhedzi U vha khonani ya tsini-tsini na o lugaho.” (Mirero 3:32) Yehova u lavhelela uri khonani dzawe dzi lingedze u ita zwithu zwo lugaho na u iledza u ita zwithu zwi songo lugaho. Vhaṅwe vha vhona u nga a zwi konadzei u ita zwoṱhe zwine Yehova a zwi ṱoḓa na u iledza zwithu zwoṱhe zwi songo lugaho. Fhedzi Yehova u a pfesesa. U ṱanganedza muṅwe na muṅwe ane a mu funa nga mbilu yoṱhe na ane a lingedza u ita zwoṱhe zwine a nga kona u itela u Mu takadza.—Phisalema 147:11; Mishumo 10:34, 35.
GUDANI ZWO ENGEDZEAHO
Gudani uri ni nga vha hani khonani ya Yehova na uri ndi ngani e khonani ya khwinesa u fhira vhoṱhe.
4. Abrahamu o vha e khonani ya Yehova
Mafhungo a re Bivhilini a a ambaho nga ha Abrahamu (u dovha a vhidzwa Abramu,) a ri thusa u pfesesa uri ndi mini zwine muthu a nga zwi ita u itela uri a vhe khonani ya Mudzimu. Vhalani nga ha Abrahamu kha Genesi 12:1-4. Ni kone u fhindula mbudziso dzi tevhelaho:
-
Yehova o humbela Abrahamu uri a ite mini?
-
Yehova o mu fhulufhedzisa mini?
-
Abrahamu o ita mini?
5. Yehova u lavhelela mini kha khonani dzawe?
Kanzhi ri lavhelela zwiṅwe zwithu kha khonani dzashu.
-
Ni nga lavhelela khonani dzaṋu dzi tshi ni itela mini?
Vhalani 1 Yohane 5:3, ni kone u fhindula mbudziso i tevhelaho:
-
Yehova u lavhelela mini kha khonani dzawe?
Ri nga tea u shandula nḓila ine ra humbula ngayo na zwine ra vha zwone u itela u thetshelesa Yehova. Vhalani Yesaya 48:17, 18, ni kone u fhindula mbudziso i tevhelaho:
-
Ndi ngani Yehova a tshi lavhelela uri khonani dzawe dzi ite tshanduko?
Khonani yavhuḓi i ri vhudza zwine zwa nga ri tsireledza na u ri vhuyedza. Yehova u ita zwi fanaho kha khonani dzawe
6. Zwine Yehova a zwi ita u itela u thusa khonani dzawe
Yehova u thusa khonani dzawe uri dzi kone u tandulula thaidzo. Ṱalelani VIDIO, ni kone u fhindula mbudziso i tevhelaho.
-
Kha vidio, Yehova o thusa hani mufumakadzi we a vha a tshi vhilaedziswa nga u humbula zwithu zwi si zwavhuḓi?
Vhalani Yesaya 41:10, 13, ni kone u fhindula mbudziso dzi tevhelaho:
-
Yehova u fhulufhedzisa mini khonani dzawe dzoṱhe?
-
Naa ni vhona u nga Yehova a nga vha khonani yavhuḓi? Ndi ngani?
Khonani dza tsini dzi a ni thusa musi ni tshi ṱoḓa thuso. Na Yehova u ḓo ni thusa
7. U itela u vha khonani ya Yehova, ri tea u amba nae na u mu thetshelesa
Vhukonani vhu a khwaṱha arali khonani dzi tshi amba dzoṱhe. Vhalani Phisalema 86:6, 11, ni kone u fhindula mbudziso dzi tevhelaho:
-
Ri nga amba hani na Yehova?
-
Yehova u amba hani na riṋe?
Ri amba na Yehova nga u rabela, Yehova u amba na riṋe a tshi shumisa Bivhili
VHAṄWE VHATHU VHA AMBA URI: “A zwi konadzei u vha khonani ya Mudzimu.”
-
Ni nga shumisa luṅwalo lufhio u itela u sumbedza uri zwi a konadzea u vha khonani ya Yehova?
NO GUDA MINI?
Yehova u ṱoḓa ni tshi vha Khonani yawe, nahone u ḓo ni thusa uri ni vhe na vhushaka ha tsini nae.
Ni Kha Ḓi Zwi Humbula?
-
Yehova u thusa hani khonani dzawe?
-
Ndi ngani Yehova a tshi vhudza khonani dzawe uri dzi ite tshanduko?
-
Naa ni vhona u nga zwi a konḓa u vha khonani ya Yehova? Ndi ngani ni tshi ralo?
WANANI ZWO ENGEDZEAHO
U vha khonani ya Mudzimu zwi nga ni vhuyedza hani?
“Yehova—Mudzimu Ane A Tea U Ḓivhiwa” (Tshiingamo, 15 February 2003)
Gudani uri ni nga vha hani khonani ya Mudzimu.
“Ndi Nga Vha Hani Khonani Ya Mudzimu?” (Mbudziso Dzine Vhaswa Vha Dzi Vhudzisa—Phindulo Dzi Shumaho, Volumu 2, ndima 35)
Gudani uri ndi ngani muṅwe mufumakadzi a tshi vhona uri u vha khonani ya Yehova zwo ita uri vhutshilo hawe vhu vhe khwine.
Ipfani uri vhaswa vha ḓipfa hani nga ha Yehova.