YOOSOMA 08
Nyuwo munoowera okhala nthamwene a Yehova
Nyuwo nthamwenaanyu mutthu yoole paahi mmusuwenlaanyu. Etthu emoharu eneereya ni Yehova. Owo ontthuna okhala nthamwene anyu. Mwa yeeyo owo ontthuna weera musuwele mikhalelo sawe. Ni-tho owo ontthuna weera musuwele moota owo ompakaawe itthu ni woovahani yooweherera yooreera ya muhoolo. Yehova onweherera weera nyuwo mmusuwele ni ontthuna okhala nthamwene anyu. Neereke vannoowereya tthiri okhala nthamwene a Muluku? (Musome Nsalmu 25:14.) Munaapake heeni weera mukhale nthamwene a Yehova? Biblya onnaakhula makoho awo. Owo-tho, onnahima weera tiwootthuneya okhala nthamwene a Yehova.
1. Nwopelo heeni Yehova onoowopelaaweni?
Biblya oneera: “Mmwàttameleke Muluku, ni yowo anawàttameleni nyuwo.” (Yakobe 4:8) Eyo entaphulela eheeni? Entaphulela weera Yehova onnoowopani okhala nthamwene awe. Atthu akina pooti wuupuwela ha: ‘kinkela okhala hayi nthamwene a Muluku kiriki kihimoonaka?’ Mene nto, mBiblyani Yehova onnanleela itthu sawe nintthuyaahu osuwela. Nto namusomaka Biblya, nnoowera omwaattamela. Emaara nimmusomaahu Biblya onthamwene ahu ni yoowo onnalipa, pooti nihimoonaka.
2. Mwaha wa heeni Yehova oneeraawe akhale nthamwene anyu ootepa otthuneya?
Khaavo-tho onoosivelani nyuwo ompwaha Yehova. Owo ontthuna weera muhakalaleke ni waasaasa nikhavihero nenno muntthunaanyu. Nyuwo pooti “ovelelaka wa yowo sovalaveliha sanyu sothene, wona wi ti yowo onosamaryani.” (1 Pedru 5:7) Yehova ori oolikaneene weera aakhavihere, aamaalihe, ni awiiwe asinthamwene awe.—Musome Nsalmu 94:18, 19.
3. Yehova onweherera heeni wa asinthamwene awe?
Yehova onnaasivela atthu ootheene ni “onthamwen’awe ti wa anaxariya,” naari neere, yaale aneettela malamulo awe. (Miruku 3:32) Yehova ontthuna weera asinthamwene awe yiilipihereke opaka itthu sooreera ni ohiya soonanara. Akina anuupuwela há: ‘nkinwera opaka itthu sootheene Muluku onvekelaawe.’ Mene Yehova onnoona eyo. Ootheene ale enamusivela mweekhaikhai ni aniilipihera anoowera okhala asinthamwene awe.—Nsalmu 147:11; Mit. 10:34, 35..
WEERA MUXETTERE SINTXIPALE
Moone moota nyuwo muneeraanyu mukhale nthamwene a Yehova, ni moonelele moota owo aneeraawe akhale nthamwene anyu ooreerela.
4. Abrahamu ari nthamwene a Yehova
Biblya onnahima sa Abrahamu (yowo eriwa-tho Abramu). Eyo ennanikhavihera osuwela ele entaphulelaaya okhala nthamwene a Muluku. Musome voohima sa Abrahamu va Ephattuwelo 12:1-4. Avinyaka mutthekule ni ipontu sinttharelana:
-
Eheeni Yehova anvekenlaawe Abrahamu weera apake?
-
Eheeni Yehova aamuroromelinhaawe Abrahamu?
-
Ni eheeni Abrahamu aapankaawe?
5. Yehova onweherera eheeni wa ale ari asinthamwene awe
Mweekhaikhai sookhala itthu ninwehereraahu weera asinthamwene ahu epake.
-
Itthu heeni ikina muntthunaanyu weera asinthamwene anyu epakeke?
Mmusome 1 Yohani 5:3, avinyaka mutthekule ni epontu enttharelana:
-
Yehova onweherera eheeni wa asinthamwene awe?
Weera nimwiiwelele Yehova, apaale ontthuneya otxentxa mikhalelo sa omutthu ahu. Mmusome Yesaya 48:17, 18, avinyaka mutthekule ni epontu enttharelana:
-
Mwaha wa heeni Yehova onaavekelaawe asinthamwene awe opaka matxentxo a mweekumini?
Nthamwene eekhaikhai onnatthuna onikhavihera, ni mwa yeeyo onnanivaha miruku sooreera. Yehova ompaka etthu emoharu wa asinthamwene awe
6. Yehova ompaka heeni wa asinthamwene awe
Yehova onnaakhavihera asinthamwene awe oviriha maxupo aya Moone EVIIDIYU, avinyaka mutthekule ni epontu enttharelana.
-
Muthiyana a nviidiyuni onnakhalano muupuwelo ni moonelo woohireerela. Yehova amukhavihenre hayi muthiyana ole?
Mmusome Yesaya 41:10, 13, avinyaka mutthekule ni epontu enttharelana:
-
Ti eheeni Yehova onaaroromelihawe asinthamwene awe?
-
Neereke weera Yehova onnapakiwa onthamwene? Mwaha wa heeni munuupuwelaanyu hiiho?
Asinthamwene eekhaikhai animookhaviherani ehuhu muneeraanyu mutthuneke nikhavihero. Yehova tho onoorowa wookhaviherani
7. Weera nikhale nthamwene a Yehova ontthuneya otthekulano ni owiriyana ele owo onhimaawe
Vaavo asinthamwene eeli entthekulaaya, onthamwene aya onnalipa. Musome Nsalmu 86:6, 11, avinyaka mutthekule ni ipontu sinttharelana:
-
Ninkela otthekula hayi ni Yehova?
-
Yehova onkela otthekula hayi ni hiiva?
Hiyo ninnuuluma ni Yehova nanvekelaka vale. Owo onnuuluma ni hiyo naamusomaka vale Biblya
ATTHU AKINA ANEERA: “Khavanwereya opaka onthamwene ni Muluku.”
-
Yoolepa heeni ya mBiblyani mweeraanyu nvarihele muteko weera moonihere weera Yehova onnipakiwa onthamwene?
NYAHA SOOTTHUNEYA
Yehova ontthuna opaka onthamwene ni nyuwo, ni onimookhaviheni weera mukhaleke vakhiviru ni yoowo.
Wuuluula
-
Yehova onaakhavihera moota heeni asinthamwene awe?
-
Mwaha wa heeni Yehova onaavekelaawe asinthamwene awe weera epakeke matxentxo a mweekumini?
-
Munnoona oxupa okhala nthamwene a Yehova? Mwaha wa heeni munoonelaanyu hiiho?
WEERA MUSUWELE ITTHU SINTXIPALE
Okhala nthamwene a Muluku onkela otxentxa hayi ekumi anyu?
“Yehova Muluku onreerela omusuwela” (A Sentinela, a 15 a fevereiro a 2003)
Moone moota wookhala nthamwene a Muluku.
Moone moota onthamwene aakhanlaaweno muthiyana ni Yehova, ovuluxaawe ekumi awe.
Entrevisteene yeela, amiravo annathaliha moota animoonelaaya Yehova.
