Karuyag ni Jehova nga mas makilala mo pa hiya. Kay ano? Naglalaom hiya nga kon mas damu an imo mahibabaroan mahitungod ha iya personalidad, ha iya mga pamaagi, ngan ha iya katuyoan, mas maruruyag ka nga magin sangkay niya. Puydi ka gud ba magin sangkay han Dios? (Basaha an Salmo 25:14.) Ano an imo puydi buhaton basi magin sangkay niya? Ginbabaton han Biblia ito nga mga pakiana ngan iginsusumat hito kon kay ano nga an pakigsangkay kan Jehova amo an pinakaimportante nga pakigsangkay.

1. Ano an igin-aaghat ni Jehova nga buhaton mo?

“Magin duok ha Dios, ngan magigin duok hiya ha iyo.” (Santiago 4:8) Ano an iginpapasabot hini? Karuyag ni Jehova nga magin sangkay ka niya. An iba bangin diri makatoo nga puydi nira magin sangkay an Dios kay diri man nira hiya nakikita. Pero ha iya Pulong, an Biblia, iginsusumat ni Jehova an ngatanan nga puydi naton mahibaroan mahitungod ha iya personalidad basi magin duok kita ha iya. Kon ginbabasa naton an mensahe han Dios ha aton dida ha Biblia, magigin duok naton nga sangkay hi Jehova bisan kon waray pa gud naton hiya makita.

2. Kay ano nga hi Jehova an pinakamaopay mo nga Sangkay?

Hinigugma ka gud ni Jehova labaw kay han paghigugma ha imo han bisan hin-o. Karuyag niya nga magin malipayon ka ngan dumaop ka ha iya ha bisan san-o nga kinahanglan mo hin bulig. Puydi mo ‘ipasa ha iya an ngatanan mo nga kabaraka, kay nagtatagad hiya ha imo.’ (1 Pedro 5:7) Hi Jehova andam pirme ha pagbulig, pagliaw, ngan pagpamati ha iya mga sangkay.—Basaha an Salmo 94:18, 19.

3. Ano an ginlalaoman ni Jehova ha iya mga sangkay?

Hinigugma ni Jehova an ngatanan, “pero duok Hiya nga sangkay han magtadong.” (Proberbios 3:32) Naglalaom hi Jehova nga mangangalimbasog an iya mga sangkay nga buhaton an mga butang nga gintatagad niya nga maopay ngan likayan adton gintatagad niya nga maraot. Bangin abaton han iba nga diri gud nira kaya sundon an mga suruklan ni Jehova han maopay ngan maraot. Pero masinabuton hi Jehova. Ginkakarawat niya an ngatanan nga tinuod nga nahigugma ha iya ngan nagbubuhat han ira pinakamaopay basi mapalipay hiya.—Salmo 147:11; Buhat 10:34, 35.

 DUGANG NGA USISAHA

4. Hi Abraham sangkay ni Jehova

An asoy han Biblia mahitungod kan Abraham (gintatawag liwat nga Abram) nabulig ha aton nga masabtan kon ano an karuyag sidngon han pagin sangkay han Dios. Basaha an mahitungod kan Abraham ha Genesis 12:1-4. Katapos, hisguti niyo ini nga mga pakiana:

• Ano an iginsugo ni Jehova kan Abraham?

• Ano an iginsaad ni Jehova ha iya?

• Ano an ginbuhat ni Abraham han ginsugo hiya ni Jehova?

5. Kon ano an karuyag ni Jehova nga buhaton han iya mga sangkay

Kasagaran na nga naglalaom kita nga may bubuhaton an aton mga sangkay para ha aton.

• Ano an pipira nga butang nga karuyag mo buhaton han imo mga sangkay para ha imo?

Basaha an 1 Juan 5:3, katapos, hisguti niyo ini nga pakiana:

• Ano an ginlalaoman ni Jehova ha iya mga sangkay?

Basi masugot hi Jehova, bangin kinahanglan naton bag-uhon an aton panggawi o an aton personalidad. Basaha an Isaias 48:17, 18, katapos, hisguti niyo ini nga pakiana:

• Kay ano nga karuyag ni Jehova nga an iya mga sangkay maghimo hin mga pagbag-o?

 6. Kon ano an ginbubuhat ni Jehova para ha iya mga sangkay

 SUMARYO

Karuyag ni Jehova nga magin Sangkay mo hiya, ngan bubuligan ka niya nga magin duok ha iya.

Repaso

• Paonan-o ginbubuligan ni Jehova an iya mga sangkay?

• Kay ano nga ginsusugo ni Jehova an iya mga sangkay nga maghimo hin mga pagbag-o?

• Para ha imo, sobra ba an ginlalaoman ni Jehova ha iya mga sangkay? Kay ano?