YOOSOMA 08
Nyuwo Nnoowerya Okhala Nxirikha a Yehova
Nyuwo mwaatthunaka okhala nxirikha a ntthu, nhaana ondhuwela toko-toko. Emodha-modharu ni Yehova. Owo ontthuna wiira akhale nxirikha nnyu. Tivondho, owo ontthuna wiira ndhuwele mikhalelo-dhe. Nitho Yehova ontthuna wiira ndhuwele moopora owo onpaka iye itthu ni nlipelelo noohakalaliha na nhoolo ontthuna iye woovahani. Vaavo muntepa nnyu ondhuwela Yehova, elo enoowiirihani otthuna okhala nxirikha a Yehova. Niire onniweryaneya okhala nxirikha a Muluku? (Nsome Esalimo 25:14.) Eseeni munreerela nnyu opaka wiira nkhale nxirikha a Yehova? Biibiliya onnaakhula makoho ala. Nitho onnoonihera wiira okhala nxirikha a Yehova etthu yootepa ootthuneya mweekumini mwihu.
1. Nlaleyo seeni Yehova onoovahaiyeni?
Biibiliya onlotta wiira: “Mmwaattameleke Muluku, vano owo onoowaattamelani.” (Yakobo 4:8) Ndho elo entaphulelani? Entaphulela wiira Yehova onnoolaleyani wiira nkhale nxirikha-ye. Woonawene atthu akinaku annuupuwela wiira: ‘Kin’ya owerya dhai okhala nxirikha a Muluku kihimoonaka?’ Biibiliya onnilotta itthu dhootheene dhin’ya onikhalihera ondhuwela ni omwaattamela Yehova. Vaavo nininsoma nhu Biibiliya waatana wihu ni Yehova onnitepa olipa hata nihiweryaka omoona.
2. Seeni muntthuneya nnyu okhala nxirikha a Yehova?
Khaavo onoophetani vawaatta onxira Yehova. Owo ontthuna wiira nhakalale ni munvekele nikhalihero khuta okathi muntthuna nnyu. Nnoowerya ‘onvaherera mixankiho dhinyu dhootheene Muluku, okhala wiira owo onnookhapelelani.’ (1 Pedru 5:7) Yehova ori oolikana ene wiira aakhalihere, aamaalihe ni waawiriyana axirikha-ye.—Nsome Esalimo 94:18, 19.
3. Eseeni Yehova Onlipelela wiira axirikha-ye epake?
Yehova onnaapheta atthu ootheene, masi ‘onnaatana ni atthu ooloka.’ (Miruku 3:32) Yehova ontthuna wiira axirikha-ye yiilipihere opaka itthu onoona iye okhala dhooreera ni exake opaka itthu dhootakhala. Atthu akinaku anuupuwela wiira: ‘Miyo nkinwerya opaka itthu dhootheene Muluku onvekela iye.’ Masi Yehova onninidhuwela. Atthu ootheene animpheta ni ampaka itthu dhooreera wiira endhivelihe anoowerya okhala axirikha-ye.—Esalimo 147:11; Miteko 10:34, 35.
NHUDHE ITTHU DHIKINA
Moone moopora mun’ya nnyu okhala nxirikha a Yehova ni moopora owo oraiye nxirikha munreerela nnyu okhalana.
4. Abrahaamu aari nxirikha a Yehova
Ele Biibiliya onlotta iye voohima dha Abrahaamu (yoowo-tho aaitthaniwa Abraamu) Enninihudhiha ele entaphulela awa okhala nxirikha a Muluku. Nsome voohima dha Abrahaamu va Maphattuwelo 12:1-4. Nuuvinya mwaakhule makoho anttharelana:
-
Eseeni Yehova aanvekenle iye Abrahaamu?
-
Eseeni Yehova aanlaihenre iye Abrahaamu?
-
Ndho etthu seeni Abrahaamu aapanke iye?
5. Etthu Yehova onaavekela iye axirikha-ye opaka
Okhala wene, dhookhala itthu ninlipelela nhu wiira axirikha nhu epake.
-
Itthu seeni muntthuna nnyu wiireliwa ni axirikha nnyu?
Munsome 1 Yohani 5:3, nuuvinya mwaakhule nikoho ninttharelana:
-
Eseeni Yehova onaavekela iye axirikha-ye opaka?
Wiira nimwiiwelele Yehova, hiyo nihaana orukunsa muupuwelo nhu ni makhalelo nhu. Munsome Yesaya 48:17, 18, nuuvinya mwaakhule nikoho nittharelana:
-
Seeni Yehova onaavekela iye axirikha-ye opaka marukunuso mweekumini-mwa?
Nxirikha eekhweeli oninikhalihera anivahaka miruku dhooreera dhin’ya onikhalihera. Yehova onnipaka etthu emodharu para axirikha-ye
6. Itthu Yehova onapakela iye axirikha iye
Yehova onnaakhalihera axirikha-ye ovilela mixankiho. Moone EVIIDIYU, nuuvinya mwaakhule nikoho ninttharelana.
-
Nkhama moonne nnyu eviidiyu, nthiyana ole aanihawa mwaha wa miyuupuwelo ni miyoonelo dhoohiloka. Masi Yehova onkhalihenre dhai?
Munsome Yesaya 41:10, 13, nuuvinya mwaakhule makoho anttharelana:
-
Eseeni Yehova onaalaihera iye axirikha-ye ootheene?
-
Nyuwo nnoona wiira Yehova nxirikha ooreerela? Eseeni enwiirihani wuupuwela dhiidho?
Axirikha ekhweeli annikhaliherana okathi wootheene. Tivondho Yehova onawookhaliherani
7. Wiira nikhale nxirikha a Yehova nihaana olotta ni yena ni wiiwelela ele onlotta iye
Axirikha aili yaalottihanaka ivaara dhawaatta oxirikha owo onnitepa olipa. Nsome Esalimo 86:6, 11, nuuvinya mwaakhule makoho anttharelana:
-
Nin’ya owerya dhai olotta ni Yehova?
-
Yehova onlotta dhai ni hiyo?
Vaavo ninvekela nhu, hiyo ninloota ni Yehova. Naansomaka Biibiliya Yehova onlotta ni hiyo
ATTHU AKINAKU ANLOTTA WIIRA: “Khonweryaneya okhala nxirikha a Muluku.”
-
Etestu seeni ya mBiibiliyani mwaaya nnyu orumela wiira moonihere wiira onniweryaneya okhala nxirikha a Muluku?
WUULUULA
Yehova ontthuna wiira nkhale nxirikha-ye ni owo onawookhaliherani wiira ntepe omwaattamela.
Ipontu dhuulupale
-
Yehova onaakhalihera dhai axirikha-ye?
-
Seeni Yehova onavekela iye axirikha-ye opaka marukunuso mweekumini?
-
Nnoona wiira etthu yoolipa okhala nxirikha a Yehova? Seeni nnuupuwela nnyu dhiidho?
NTHOKODHE ITHHU DHIKINA
Okhala nxirikha a Muluku on’ya wookhaliherani dhai mweekumi mwinyu?
“Yehova Muluku Ninreerela nhu Ondhuwela” (A Sentinela, 15 de fevereiro de 2003)
Moone etthu en’ya wookhaliherani okhala nxirikha a Muluku.
Moone moopora waatana ni Yehova wooponle awa ekumi ya nthiyana mmodha.
Eviidiyu ela, marapasi makina annilotta moopora ammoonela awa Yehova.
