LESON 08
Anao Mety Hanjary Kamaradiny Jehovah
Tiany Jehovah hahay izy tsarabe anao. Fotony nan̈ino? Fotony hainy fa anao koa mahay toetrinany, fomba fan̈anovany raha ndreky fikasan̈anany, anao tihanjary kamaradinany. Mety hanjary kamaradiny Zan̈ahary marin̈y ma anao? (Vakia Salamo 25:14.) Ino raha tokotro hataonao, baka anao hanjary kamaradinany? Baiboly mamaly fan̈ontanian̈a zen̈y. Koran̈inizio ao koa fa tsisy kamarady tsara mandilatra Jehovah.
1. Mikaiky anao han̈ino Jehovah?
“Man̈aton̈a Zan̈ahary anaro, fa izy han̈aton̈o anaro.” (Jakoba 4:8) Ino ma dikanizen̈y? Tiany Jehovah anao hanjary kamaradinany. Olo sasany mivolan̈a fa sarotro hikamarady amy Zan̈ahary, fotony izy tsy hitantsika. Amy Baiboly ao, ambarany Jehovah atsika raha jiaby tokony ho haintsika momba toetrinany, baka atsika hikamarady aminany. Atsika koa mamaky raha ambarany atsika amy Baiboly ao, hahaihitombo fo fitiavantsika izy, nata izy tsy hitantsika.
2. Nan̈ino ma tsisy kamarady tsara mandilatra Jehovah?
Tsisy olo tia anao mandilatra Jehovah. Anao tiany ho sambatra, avio tiany anao hikoran̈a aminany isaka misy raha hitavandranao izy. ‘Apitraha aminany koa raha jiaby mampiasaloha anao, fotony izy mikarakara anao.’ (1 Petera 5:7) Jehovah von̈ono fo hanohan̈a anao, hankahery anao, ndreky hitandren̈y anao.—Vakia Salamo 94:18, 19.
3. Ino raha irahiny Jehovah ataonolo tihikamarady aminany?
Jehovah tia olo jiaby, fa ‘olo man̈ano ny marin̈y fo ten̈a kamaradinany.’ (Ohabolana 3:32) Tiany Jehovah koa izikoa olo mikamarady aminany man̈ano raha volan̈iny fa tsara, ndreky tsy man̈ano raha volan̈iny fa ratsy. Misy olo mivolan̈a fa tsisy olo mahavita man̈ano zen̈y. Fa kanefa, hainy Jehovah raha mety vitantsika. Ikeny lan̈iany olo ten̈a tia izy ndreky mifen̈y man̈ano raha mamparavoravo izy.—Salamo 147:11; Asan’ny Apostoly 10:34, 35.
ALEVA ONON̈O
Ianara ino raha mila ataonao baka anao hanjary kamaradiny Jehovah, baka io diniha nan̈ino izy ten̈a tsara atao Kamarady ankitin̈y.
4. Abrahama kamaradiny Jehovah
Tantarany Abrahama (na Abrama) amy Baiboly ao man̈ampy atsika hahay, karakory ma olo kamaradiny Zan̈ahary zen̈y. Vakia raha momba Abrahama amy Genesisy 12:1-4. Avio iaraha dinihin̈y fan̈ontanian̈a aby ty:
-
Nirahiny Jehovah nan̈ino Abrahama?
-
Ino raha nampan̈antinainy Jehovah izy?
-
Narehany Abrahama ma volan̈a Jehovah?
5. Irahiny Jehovah han̈ino kamaradinany?
Ndraikindraiky atsika man̈anten̈a raha aminolo ataontsika kamarady.
-
Ino aby raha tianao hataony kamaradinao aminao?
Vakia 1 Jaona 5:3, avio iaraha dinihin̈y fan̈ontanian̈a ty:
-
Tiany Jehovah han̈ino kamaradinany?
Izikoa tiantsika han̈araka volan̈a Jehovah, atsika mila miala amy raha ratsy nahazatra atsika ndreky toetry ratsintsika. Vakia Isaia 48:17, 18, avio iaraha dinihin̈y fan̈ontanian̈a ty:
-
Nan̈ino Jehovah man̈iraka kamaradinany hiova?
Kamarady tsara zen̈y miaro atsika ndreky mizaha raha hahatsara atsika. Karaha zen̈y ataony Jehovah amy kamaradinany
6. Akory ataony Jehovah man̈ampy kamaradinany?
Jehovah man̈ampy kamaradinany sahiran̈a. Alifasa VIDEO io, avio iaraha dinihin̈y fan̈ontanian̈a ambany io.
-
Akory nan̈ampiany Jehovah man̈angy tamy video in̈y, izy koa fa nahatsiaro kivy?
Vakia Isaia 41:10, 13, avio iaraha dinihin̈y fan̈ontanian̈a aby ty:
-
Ino raha nampan̈antinainy Jehovah fa hataony amy kamaradinany jiaby?
-
Fahitanao izy, Jehovah ma ten̈a kamarady tsara ankitin̈y? Nan̈ino?
Olo koa kamaradinao mare, izy man̈ampy anao izikoa anao sahiran̈a. Mira zen̈y koa hataony Jehovah aminao
7. Atsika tiany Jehovah mikoran̈a aminany ndreky mitandren̈y izy
Olo kamarady koa mikoran̈a matetiky, iro hanjary kamarady mare. Vakia Salamo 86:6, 11, avio iaraha dinihin̈y fan̈ontanian̈a aby ty:
-
Akory hikoran̈antsika amy Jehovah?
-
Akory ikoran̈any Jehovah amintsika?
Mikoran̈a amy Jehovah atsika lera mivavaka; baka amy Baiboly ndraiky Jehovah mikoran̈a amintsika
MISY OLO MIVOLAN̈A: “Tsy marin̈y olo mety hanjary kamaradiny Zan̈ahary zen̈y.”
-
Ino toko sy andininy mety hampiasainao, han̈aboahanao fa atsika mety hanjary kamaradiny Zan̈ahary?
INO RAHA NIANARANAO TATO?
Tiany Jehovah hanjary kamaradinany anao, avio izy han̈ampy anao baka anaro ho kamarady mare.
Fan̈ontanian̈a Fameren̈ana
-
Karakory ataony Jehovah man̈ampy kamaradinany?
-
Nan̈ino olo ataony Jehovah kamarady irahiny miala amy raha ratsy?
-
Hitanao sarotro loatra ma raha ampan̈anoviny Jehovah kamaradinany? Nan̈ino?
ZAHAVA
Ino mahatsara anao mikamarady amy Jehovah?
“Ino Mahatsara Atsika Mahay Jehovah?” (Tilikambo Fiambesan̈a 15 Fevrie 2003)
Zahava karakory atao mikamarady amy Zan̈ahary.
Zahava fa nankatsara fiain̈anany man̈angy araiky zay fikamaradianany amy Jehovah.
Tandrin̈esa iro tanora aby io mitantara raha an̈aty fôndro momba Jehovah.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
