Yehova katidi tun’zaba. Bila mbi? Bila niandi widi na vuvu, bobuawu wunluta zabila bumutu buandi, phil’andi keta vangila mambu ayi zikhanu ziandi, buawu wela luta bela phuila yi ba nkundi’andi. Vayi bukiedika tulenda ba bakundi ba Nzambi? (Tanga Minkunga 25:14.) Bue wulenda bela nkundi’andi? Bibila kilembu vani mimvutu mu biuvu biobi ayi kisudikisidi bila mbi kikundi kietu ayi Yehova kilutidi kikundi kioso kioki wulenda tula ayi wunkaka.

1. Mambu mbi Yehova kalembu tombi wuvanga?

‘Fikama kuidi Nzambi, ayi niandi wela kufikama.’ (Zaki 4:8) Verse yayi yi Bibila mbi yinsundula? Yehova katidi wuba nkundi’andi. Batu bankaka beta banzila ti balendi ba ko bakundi ba Nzambi bila kamonikanga ko. Vayi mu phov’andi Bibila, Yehova wutumonisini mambu moso mo tuidi mfunu yizaba matedi bumutu buandi muingi mo tumfikama. Bobuawu tunluta tangila Bibila, yinsundula nkanda wo Yehova ka tutindila, buawu kikundi kietu ayi niandi kinluta kuiza bela kingolo buba ti tumonanga ko.

2. Bila mbi Yehova kalutidi bakundi boso bolenda baka?

Kuisi ko mutu weta kuzola viokila Yehova. Katidi wuba mu zikhini ayi wunlombanga lusadusu mu thangu zia zioso widi phuila yilusadusu. Wulenda ‘kunyekudila mayindu maku, bila niandi weta kubanzila.’ (1 Piela 5:7) Yehova wukala thangu zioso wukubama mu sadisa, mu kindisa ayi mu wa bakundi bandi.—Tanga Minkunga 94:18, 19.

3. Mbi fueti tula mo wuba nkundi Yehova?

Yehova weta zola batu boso, vayi “weta tula kikundi kingolo ayi batu ba busonga.” (Zingana 3:32) Mosi wuba nkundi Nzambi, fueti tula zingolo mu vanga mambu momo keta mona ti madi mamboti, ayi loza mambu momo keta mona ti madi mambimbi. Batu bankaka beta mona ti balendi ko nunga tumukina minsiku mi Yehova. Vayi Yehova ntima nneni kadi. Weta tula kikundi ayi batu bobo beta kun’zola mu bukiedika ayi bobo beta tula zingolo mu kunyangidika.—Minkunga 147:11; Mavanga 10:34, 35.

 TUVISA MBOTI MBOTI

4. Abalahami wuba nkundi Yehova

Disolo di Bibila di Abalahami (voti nio wube tedulungu Abalami) di kutuvana diyindu dizaba tsundu yiba nkundi Nzambi. Tanga 1 Mose 12:1-4 ayi vana mimvutu mu biuvu biabi:

• Mbi Yehova katomba Abalahami kavanga?

• Tsila mbi Yehova kamvana?

• Mbi Abalahami katuba mu thangu Yehova kamvana lusadusu?

5. Mambu momo Yehova keta tomba kuidi bakundi bandi

Tukala zodi ti bakundi betu batuvangila mambu mamboti.

• Mambu mbi weta zola bakundi baku bavangila?

Tanga 1 Yowani 5:3 ayi vana mvutu mu kiuvu kiaki:

• Mambu mbi Yehova keta zola bakundi bandi bamvangila?

Mosi tutumukina Yehova, tufueti balula thangu zinkaka mavanga metu voti ndambu mambu mankaka ma bumutu buetu. Tanga Yesaya 48:17, 18 ayi vana mvutu mu kiuvu kiaki:

• Bila mbi Yehova keta zodila ti batu babika vanga mambu mambimbi?

 6. Mambu momo Yehova keta vangila bakundi bandi

 MU BUKHUFI

Yehova katidi wuba nkundi’andi ayi makasadisa wuba nkundi’andi.

Phutukulu

• Bue Yehova keta sadisila bakundi bandi?

• Bila mbi Yehova keta tombila bakundi bandi balembu vanga mambu mambimbi?

• Wum’banzila ti Yehova weta tomba bakundi bandi mambu momo kabalendi nunga vanga ko? Bila mbi?