PWONY ME 09

Nyik Cok bot Lubanga i Lega

TUKI

Tika kare mogo iwinyo ni imito tira i kwoni? Mono imito kony me cobo pekkini? Tika imito cuko cwiny nyo kwe cwiny? Tika imito nyiko cok ki Jehovah? Lega twero konyi me cobo jami magi ducu. Ento yo mene ma opore me lega? Tika Lubanga winyo lega ducu ma dano ducu gilego? Ngo ma itwero timo me neno ni en owinyo legani? Kong dong wanenu lok meno.

1. Omyero waleg bot anga dok waleg pi gin ango?

Yecu opwonyo ni omyero waleg bot Wonwa me polo keken. Yecu kikome olego bot Jehovah. En owaco ni: “Dong wuleg kit man ni: ‘Wonwa ma tye i polo . . . ’” (Matayo 6:9) Ka walego bot Jehovah, ci wajingo wat i kinwa kwede.

Ka watye ka lega, watwero lego pi gin mo keken teke rwatte ki miti pa Lubanga. Ka watimo meno, Jehovah bigamo legawa. Baibul waco ni, “Ka walegge gin mo kun walubo gin ma en mito, ci en winyo legawa.” (1 Jon 5:14) Yecu ominiwa labol pa jami mogo mupore ma watwero lega pire. (Kwan Matayo 6:9-13.) Medo i kom lega pi mitiwa piwa kenwa, myero wiwa pe owil me pwoyo Lubanga pi jami mabeco ma en otimo piwa dok waleg bene ni en okony jo mukene.

2. Omyero waleg nining?

Baibul cuko cwinywa me ‘yabo cwinywa woko ducu bot Lubanga.’ (Jabuli 62:8) Pi meno, legawa myero oa ki i cwinywa. Watwero lega ki dwan malongo nyo laling dok ma wacung acunga, warumo piny, nyo wabedo abeda, teke wanyuto woro bot Jehovah. Waromo lega i cawa ki kabedo mo keken.

3. Lubanga gamo legawa nining?

En timo meno i yo mapol. Jehovah omiyo botwa Lokke, Baibul, ka ma pol kare wanongo iye lagam pi lapenywa. Kwano lok pa Lubanga twero “miyo ryeko bot luming.” (Jabuli 19:7; kwan Yakobo 1:5.) En twero miniwa wic ma opye mot ka watye ka kato ki i peko. Dok En twero tugo cwiny luticce mukene me konyowa ka wamito konygi.

NONG NGEC MATUT

Nen kong kit ma itwero lego lega ma a ki i cwinyi dok yomo cwiny Lubanga, dok inen kit ma lega twero konyi kwede.

4. Jami ma myero watim wek Lubanga owiny legawa

Jami ango ma weko Lubanga jolo nyo kwero legawa? Tuk VIDIO.

VIDIO: Lubanga Tika Winyo Lega Ducu?—Bute Manok (2:42)

Jehovah mito ni waleg bote. Kwan Jabuli 65:2, ci wunyam lapeny magi:

Tika itamo ni ‘Lawiny lega’ mito ni ileg bote? Pingo iye, nyo pe iye?

Myero watute me kwo ma lubbe ki rwom me kit ma atir pa Lubanga ka wamito ni en owiny legawa. Kwan Mika 3:4 ki 1 Petero 3:12, ci wunyam lapeny man:

Ngo ma omyero watim wek Jehovah owiny legawa?

I kare me lweny, gurup aryo pa lumony gitwero lega ni omyero gilo lweny. Tika itamo ni pore me geno ni Lubanga bigamo legagi?

5. Legawa myero oa ki i cwinywa

Jo mogo kipwonyogi ni ka gilego, myero gubed ka nwoyo nyig lok me lega ma gumako i wigi. Ento tika meno aye kit ma Lubanga mito ni waleg kwede bote? Kwan Matayo 6:7, ci wunyam lapeny man:

Itwero gwokke nining ki ‘duru lwak lok mapol’ nyo nwoyo nyig lok acel-li ka itye ka lega?

Nino ducu, itwero tamo i kom gin mo maber ma Jehovah otimo piri ci ipwoye pire. Ka itimo meno nino ducu pi cabit acel, ibinongo ni ilego pi jami abiro mapatpat labongo nwoyo gin mo.

Wego maber mito ni latinne owacce kit ma ewinyo kwede kikome. I yo acel-lu, Jehovah mito ni legawa oa ki i cwinywa

6. Lega obedo mic ma oa ki bot Lubanga

Lega twero konyowa nining, tutwalle i kare ma nongo watye ki peko i kwowa? Tuk VIDIO.

VIDIO: Lega Konyowa me Kanyo Peko (1:32)

Baibul miniwa cikke ni lega twero konyowa me bedo ki wic ma opye mot. Kwan Jo Pilipi 4:6, 7, ci wunyam lapeny magi:

Kadi bed pol kare lega pe kwanyo pekowa woko, ento twero konyowa nining?
Jami mene ma imito lega pire?

Tika onongo ingeyo?

Nyig lok ni “amen” gonye ni “wek ocobbe kit ma iwaco-ni” nyo “ada.” Cakke wa con i kare me Baibul, nyig lok ni “amen” kiwaco i agikki me lega.—1 Tekwaro 16:36.

7. Kwany kare me lega

I kare mogo, tic diyowa adada ma weko wiwa wil woko ki lega. Lega onongo pire tek lakwene bot Yecu? Kwan Matayo 14:23 ki Marako 1:35, ci wunyam lapeny magi: