প্ৰাৰ্থনাই আপোনাক বহুতো দিশত সহায় কৰিব পাৰে। উদাহৰণস্বৰূপে, আমাৰ জীৱনত যেতিয়া নিৰ্দেশনাৰ প্ৰয়োজন হয়, যেতিয়া আপুনি গুৰুত্বপূৰ্ণ প্ৰশ্নৰ উত্তৰ জানিব বিচাৰে আৰু আপোনাৰ জীৱনত শান্ত্বনাৰ প্ৰয়োজন হয়, তেতিয়া প্ৰাৰ্থনাই আপোনাক সহায় কৰে। ইয়াৰ উপৰিও, যিহোৱাৰ লগত ঘনিষ্ঠ সম্পৰ্ক গঢ়ি তুলিবলৈ প্ৰাৰ্থনাই আপোনাক সহায় কৰিব। হয়তো আপুনি ভাবিব পাৰে, ‘প্ৰাৰ্থনা কৰাৰ সঠিক উপায় কি? ঈশ্বৰে সকলোৰে প্ৰাৰ্থনা শুনেনে? যদি মোৰ প্ৰাৰ্থনা ঈশ্বৰে শুনাটো বিচাৰোঁ, তেনেহʼলে মই কি কৰা উচিত?’ আহক চাওঁ।

১. আমি কাক প্ৰাৰ্থনা কৰা উচিত?

যীচুৱে কৈছিল যে আমি কেৱল যিহোৱাকহে প্ৰাৰ্থনা কৰা উচিত। তেওঁ নিজেই যিহোৱা ঈশ্বৰলৈ প্ৰাৰ্থনা কৰিছিল। তেওঁ এইদৰে কৈছিল: “তোমালোকে এইদৰে প্ৰাৰ্থনা কৰা; হে আমাৰ স্বৰ্গত থকা পিতৃ . . . ” (মথি ৬:৯) যিহোৱা ঈশ্বৰলৈ প্ৰাৰ্থনা কৰিলে, তেওঁৰ লগত আমাৰ বন্ধুত্ব ঘনিষ্ঠ হয়।

আমি কিহৰ বিষয়ে প্ৰাৰ্থনা কৰিব পাৰোঁ? আমি যিকোনো বিষয়ে প্ৰাৰ্থনা কৰিব পাৰোঁ। কিন্তু আমি তেওঁৰ ইচ্ছা অনুসৰি প্ৰাৰ্থনা কৰিলেহে তেওঁ আমাৰ প্ৰাৰ্থনা শুনিব। বাইবেলত এইদৰে লিখা আছে, “আমি যদি তেওঁৰ ইচ্ছাৰ দৰে কিবা যাচ্‌না কৰোঁ, তেন্তে তেওঁ [ঈশ্বৰে] আমাৰ সেই যাচ্‌না শুনে।” (১ যোহন ৫:১৪) যীচুৱে কৈছিল যে আমি কি কি বিষয়ৰ বাবে প্ৰাৰ্থনা কৰিব পাৰোঁ। (মথি ৬:৯-১৩ পঢ়ক।) আমি নিজৰ বিষয়ে প্ৰাৰ্থনা কৰাৰ লগতে আনৰ বিষয়েও প্ৰাৰ্থনা কৰা উচিত। যিহোৱাই আমাৰ বাবে যি যি কৰিছে, তাৰ বাবে আমি তেওঁক ধন্যবাদ দিয়া উচিত।

২. আমি কেনেদৰে প্ৰাৰ্থনা কৰা উচিত?

বাইবেলে উৎসাহিত কৰিছে যে “তোমালোকৰ সমুদায় মনৰ কথা তেওঁৰ [ঈশ্বৰৰ] আগত ভাঙি কোৱা।” (গীতমালা ৬২:৮) আমি হৃদয়ৰপৰা প্ৰাৰ্থনা কৰা উচিত। আমি যিকোনো সময়ত আৰু যিকোনো ঠাইত প্ৰাৰ্থনা কৰিব পাৰোঁ। আমি জোৰকৈ বা মনে-মনে, থিয় হৈ বা বহিও প্ৰাৰ্থনা কৰিব পাৰোঁ। কিন্তু আমি সন্মানেৰে ঈশ্বৰলৈ প্ৰাৰ্থনা কৰা উচিত।

৩. ঈশ্বৰে আমাৰ প্ৰাৰ্থনাৰ উত্তৰ কেনেকৈ দিয়ে?

তেওঁ বিভিন্ন উপায়েৰে আমাৰ প্ৰাৰ্থনাৰ উত্তৰ দিয়ে। যেনে, প্ৰশ্নবোৰৰ উত্তৰ বিচাৰিবলৈ যিহোৱাই বাইবেলৰ যোগেদি আমাক সহায় কৰে। গীতমালা ১৯:৭ পদৰ অনুসৰি বাইবেল পঢ়িলে এজন ব্যক্তি “জ্ঞানী” বা বুদ্ধিমান হʼব। (যাকোব ১:৫ পঢ়ক।) সমস্যাৰ সময়ত ঈশ্বৰে আমাক মনৰ শান্তি দিয়ে। কেতিয়াবা কেতিয়াবা তেওঁ নিজৰ সেৱকসকলৰ যোগেদি আমাক সহায় কৰে।

 আমি কি শিকিলোঁ

হৃদয়েৰে প্ৰাৰ্থনা কৰিলে যিহোৱাৰ লগত থকা আমাৰ বন্ধুত্ব ঘনিষ্ঠ হয়। আমি মনৰ শান্তি আৰু সাহস লাভ কৰোঁ।

আপুনি কেনেকৈ উত্তৰ দিব?

• আমি কাক প্ৰাৰ্থনা কৰা উচিত?

• আমি কেনেদৰে প্ৰাৰ্থনা কৰা উচিত?

• প্ৰাৰ্থনা কৰিলে আমাৰ কি লাভ হʼব?