PES 09
Kôôge bebee ni Djob ni njel masoohe
Baa u ma nôgda kel yada le u gwé ngôñ le mut a éga we? Baa u gwé mambadga ma tôbôtôbô u gwé ngôñ le ba timbhe? Baa u gwé ngôñ le mut a hôgbaha we? Baa u nla gwés le we ni Yéhôva ni ba mawanda? Masoohe ma nla hôla we i yônôs i njômbi i yosôna. Ndi lelaa u nla ni soohe? Baa Djob a ñemble masoohe ma bôt bobasôna? Kii u nla boñ inyu boñ le a emble masoohe moñ? Di tehe le jam li.
1. Njee di nlama soohe, kii di nlama bat ikété masoohe més?
Yésu a bi kal le di nlama ndik soohe Tata wés nu a yé i ngii. Yésu nyemede a bé soohe Yéhôva. A kal le: “Jon haana nyen ni nlama soohe: ‘A Tata wés nu a yé i ngii . . . ’” (Matéô 6:9) Ngéda di nsoohe Yéhôva, di nlédés maada més ni nye.
Di nla soohe inyu to limbe jam. I yé maliga le inyu boñ le Djob a emble masoohe més, ma nlama kiha ni sômbôl yé. “To kinje jam di mbat inoñ naga ni sômbôl [Djob], a ñemble bés.” (1 Yôhanes 5:14) Yésu a bi kal ngim mam di nla bat ikété masoohe. (Añ Matéô 6:9-13.) Ngéda di nsoohe, di bat ndik bañ mam ma nkon bés ngôñ, ndi di ti ki Djob mayéga inyu mam a mbôñôl bés. Di bat ki le a hôla bôt bape.
2. Lelaa di nlama soohe?
Bibel i nti bés makénd le di ‘yiblene [Djob] miñem [nwés].’ (Tjémbi 62:8) Ibale di mboñ hala, masoohe més ma ga lôl i ñem wés. Di nla soohe ikété ñem wés tole di nla soohe, di pahlak bibañga. Yéhôva a mbat bé le di telep tole di yén ngéda di nsoohe. I yom i nlôôha ba nseñ i yé le di ti Nye lipém ngéda di nsoohe Nye. Di nla soohe to numbe homa, to imbe ngéda.
3. Lelaa Djob a ntimbhe masoohe més?
Djob a ngwélél ngandak manjel inyu timbhe bés. A bi ti bés Bañga yé le Bibel i het di nla léba mandimbhe ma mambadga di mbadba. I añ Bañga i Djob i nla “ti i mut a gwé bé yi pék.” (Tjémbi 19:7; añ Yakôbô 1:5.) A nla ti bés ñem nwee ngéda di mboma mandutu. A nla tinde bagwélél bé i lona bés mahôla i loñge ngéda.
KÔNDE YÉÑ
Béñge lelaa u nla soohe kayéle masoohe moñ ma lémél Djob, ni lelaa masoohe ma nla bane we nseñ.
4. Djob a mbem le di yônôs ngim matode ngéda di nsoohe Nye.
Mambe mam ma nla boñ le masoohe més ma lémél Djob, tole ma lémél bé Nye? Tuk VIDÉÔ.
Yéhôva a nsômbôl le di soohe ndik nye. Añ Tjémbi 65:2, i mbus ni kwélél mambadga mana:
-
Baa u nhoñol le “Nu a ñemble masoohe” a gwé ngôñ le u soohe nye? Inyuki?
Di nlama boñ biliya i nôgôl matiñ ma Djob ibale di gwé ngôñ le a emble masoohe més. Añ Mika 3:4 ni 1 Pétrô 3:12, i mbus ni kwélél mbadga ini:
-
Lelaa di nla ba nkwoog nkaa le Yéhôva a ga emble masoohe més?
Ngéda gwét, bipes gwobiba bi yé i soohe inyu yémbél. Baa u nhoñol le Djob a nla emble masoohe ma?
5. Masoohe més ma nlama lôl i ñem
Ngim bôt i bi nigil masoohe ma ba ntiimba hiki ngéda. Ndi baa hala nyen Djob a ngwés le di soohe nye? Añ Matéô 6:7, i mbus ni kwélél mbadga ini:
-
Lelaa di nla soohe ibabé i ‘tiimba minlélém mi mam’?
Hiki kel, u nla hoñol jam li tôbôtôbô Yéhôva a mbôñôl we, u ti ki nye mayéga inyu i jam li. Ibale u mboñ hala hiki kel ikété ngim sonde, u ga léba le u ntiimba bé minlélém mi mam ngéda u nsoohe.
Ngwal a ngwés le lok yé i kwélés nye ni ñem wé wonsôna, yak Yéhôva a ngwés le masoohe més ma lôl i ñem
6. Masoohe ma yé likébla li tôbôtôbô Djob a bi ti bés
Lelaa masoohe ma nla hôla bés i niñ yés téntén ngéda di mboma mandutu? Tuk VIDÉÔ.
Bibel i mbôn bés le masoohe ma nla hôla bés i bana ñem nwee. Añ Filipi 4:6, 7, i mbus ni kwélél mambadga mana:
-
To hala kiki masoohe ma nhéya bé mandutu més hiki ngéda, lelaa ma nla nhôla bés?
-
Mambe mam u nla gwés kal Djob ikété masoohe?
Baa u yik laa?
I buk ini le “amen” i nkobla le “i ba hala” tole “maliga ma.” Ibôdôl kôba, bôt ba nkal “amen” i mbus masoohe.—1 Miñañ 16:36.
7. Bana lem i soohe
Ngim mangéda di yé di pagap kayéle di hôya soohe. Lelaa Yésu a bé tehe masoohe? Añ Matéô 14:23 ni Markô 1:35, i mbus ni kwélél mambadga mana:
-
Lelaa Yésu a bé a boñ inyu léba ngéda inyu soohe?
-
We u nla soohe imbe ngéda?
BÔT BAPE BA NKAL LE: “Masoohe ma yé i lep ngéda inyule mut nye ki nye a ñemble bé.”
-
We u nhoñol lelaa?
I SEM KWEP
Ngéda di nsoohe ni ñem wés wonsôna, ha nyen di nkôôge bebee ni Djob, hala a nti bés ñem nwee, di nkôhna ki ngui i i mbéda inyu boñ mam ma ma nlémél Yéhôva.
Mambadga ma mbigda
-
Njee di nlama soohe?
-
Lelaa di nlama soohe?
-
Inyuki masoohe ma yéne bés nseñ?
KÔNDE YÉÑ
U nla kôhna mandimbhe inyu mambadga bôt ba mbéna bat inyu masoohe.
“Mam masaambok di nlama yi inyu jam li masoohe” (Nkum Ntat, 1 Biôôm 2010)
Di béñge inyu mambe mam u nla soohe ni lelaa u nla lémés masoohe moñ.
Bibel i nyis bés njee di nlama soohe.
Munu ngembe nsik unu, béñge hee ni imbe ngéda di nla soohe.
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
