PELAJARAN 09

Martangiang ma Asa Lam Jonok tu Debata

PANGOLU

Hea do dihilala hamu porlu adong na mangajar-ajari hamu? Adong do sukkun-sukkunmuna na so taralusi dope? Tikki marsak hamu, porlu do adong dongan makkatai lao paposson rohamuna? Lomo do rohamuna asa lam jonok tu Jahowa? Dapotmuna ma i sude molo martangiang tu Debata. Alai, ikkon boha do sasittongna hita martangiang? Ditangihon Debata do tangiang ni sude jolma? Boha do carana asa ditangihon Debata tangiangmuna? Taida ma alusna.

1. Ikkon tu ise do hita martangiang jala akka aha do na boi tatangiakkon?

Diajarhon Jesus do tu hita asa martangiang holan tu Debata. Jesus pe tu Jahowa do martangiang. Didok ibana, “Songon on ma hamu martangiang: ‘Ale Amanami na di banua ginjang . . . ’” (Mateus 6:9) Molo martangiang hita tu Jahowa, lam jonok ma hubungatta tu Ibana.

Boi do tatangiakkon manang aha pe. Alai asa ditangihon Jahowa tangiangta, ikkon sadalan do i tu lomo ni rohana. Bibel mandok, “Manang aha na tapangido sesuai tu lomo ni rohana, tangihononna do hita.” (1 Johannes 5:14) Dipaboa Jesus do tong contoh tangiang asa taboto akka aha na boi tatangiakkon. (Jaha Mateus 6:9-13.) Asing ni i, unang ma lupa hita mandok mauliate tu Debata alani sude naung dibahen Debata tu hita. Tatangiakkon ma tong akka donganta.

2. Ikkon songon dia do hita martangiang?

Bibel mandok, “Paboa hamu ma sude na di bagasan rohamuna tu [Debata].” (Psalmen 62:8) Jadi sian ias ni rohatta ma hita martangiang. Boi do hita martangiang marsoara manang di bagasan roha. Asing ni i, manang sadihari pe jala didia pe, boi do hita martangiang. Dang didok Jahowa ikkon marsinggang, hundul, manang jongjong hita tikki martangiang. Na uppetting, ikkon sangap do hita tu Jahowa tikki martangiang.

3. Songon dia do Debata mangalusi tangiangta?

Marragam do cara ni Jahowa mangalusi tangiangta. Misalna dilehon Ibana do tu hita Bibel lao mangalusi sukkun-sukkunta. Jadi molo tajaha Bibel, “boi do i mambahen halak na so marpengalaman gabe marbisuk”. (Psalmen 19:7; jaha Jakobus 1:5.) Asing ni i tikki susa hita, boi do dilean Jahowa tu hita dame ni roha. Jala boi do dibahen Ibana akka naposona asa olo mangurupi hita.

ASA LAM TAATTUSI

Taparsiajari ma boha carana asa dijalo Debata tangiangta, jala aha do gunana molo martangiang hita.

4. Boha do carana asa ditangihon Debata tangiangta?

Aha do na manottuhon ditangihon Debata do tangiangta manang na dang? Putar ma VIDEO.

VIDEO: Ditangihon Debata do Sude Tangiang?—Cuplikan (2:42)

Lomo do roha ni Jahowa asa martangiang hita tu Ibana. Jaha Psalmen 65:2, dung i bahas ma sukkun-sukkun on:

Di ayat on, didok do Jahowa “Sitangihon tangiang”. Molo menurut hamu, boasa lomo rohana molo martangiang hamu tu Ibana?

Asa dijalo Debata tangiangta, ikkon taulahon do lomo ni rohana di ngolutta. Jaha Mika 3:4 dohot 1 Petrus 3:12, dung i bahas ma sukkun-sukkun on:

Molo menurut ayat on, boha do carana asa ditangihon Jahowa tangiangta?

Biasana jolo martangiang do dua kelompok tentara na naeng marporang asa monang nasida. Menurut hamu, dijalo Debata do tangiang ni nasida i?

5. Ikkon sian ias ni roha do hita martangiang

Adong do deba halak na diajari asa mangapil-apil tangiang. Alai memang songon i do tangiang na dipangido Jahowa? Jaha Mateus 6:7, dung i bahas ma sukkun-sukkun on:

Songon dia ma asa ‘unang mulak-ulak tadok hata na sarupa’ di tangiangta?

Ganup ari pikkirhon hamu ma pinomatna sada na denggan na dijalo hamu sian Jahowa. Dung i martangiang ma hamu tu Jahowa mandok mauliate alani i. Coba ma jo ulahon on di bagasan saminggu. Hasilna, gabe dang songon na diapil-apil be annon dihilala hamu tangiangmuna.

Lomo do roha ni sahalak bapak molo dipaboa gellengna na di rohana tu ibana. Dos songon i ma nang Jahowa

6. Hadiah na sian Debata do tangiang

Boha do tangiang mangurupi hita tarlumobi tikki borat sitaononta? Putar ma VIDEO.

VIDEO: Margogo do Hami Alani Tangiang (1:32)

Bibel mandok boi do gabe dame rohatta molo martangiang. Jaha Pilippi 4:6, 7, dung i bahas ma sukkun-sukkun on:

Boasa porlu hita martangiang nang pe dang pittor mago sitaononta?
Molo hamu, akka aha ma contohna na naeng ditangiakkon hamu tu Jahowa?

Diboto hamu do?

“Amen” lapatanna, “masa ma songon i” manang “tutu”. Tikki martangiang naposo ni Debata najolo, didok nasida do “amen” dung sae martangiang.—1 Kronika 16:36.

7. Unang ma lupa hita martangiang

Sipata, olo do ra lupa hita martangiang alani godang ni ulaonta. Alai molo Jesus, porlu hian do di ibana martangiang. Sian dia taboto i? Jaha Mateus 14:23 dohot Markus 1:35, dung i bahas ma sukkun-sukkun on:

Boha do dibahen Jesus asa adong tikkina martangiang?
Molo hamu, sadihari ma tikki na pas di hamu lao martangiang?

ADONG DO NA MANDOK: “Dang adong lapatanna iba martangiang, ai so dialusi Debata tangiang ni iba.”

Boha menurut hamu?

KESIMPULAN

Molo martangiang hita sian ias ni rohatta, gabe lam jonok ma hubungatta tu Debata, dame ma rohatta, jala margogo ma hita lao mangulahon lomo ni roha ni Jahowa.