FARKARKOR 09
Nadi Ḇye Au fa Fanam Syadi faro Manseren Allah
Ras oso kwara wakfandun farkankin faro marandan kenem Bena ke? Ausya wafandun fafnoḇek rofyor wasmai samswen ke? Wafandun wos sneprei ma wos ḇeyun kakyar ke? Wamarisen wafanam syadi faro Yahwe I ke? Nadi na nafnoḇek Au fa wasmai roi anna kam. Ḇape, moḇsa na benadi kuker nyan ḇekaku rai? Manseren Allah ryower snonggaku syakam nadi sena ke? Rosai na wafrur kaku insama Manseren Allah ryower nadi Bena? Rwama kawos na.
1. Koḇenadi faro mansei, ma rosai monda na kor ro nadi koḇena?
Yesus fyarkor ko fa koḇenadi faro Kma koḇedi ro nanggi derer. Yesus manggundi ḇyenadi faro Allah Yahwe I. Yesus ikofen ḇo doḇe, ”Mkoḇenadi radine: Kma nkobedi ro boiyaswa . . . ” (Matius 6:9) Koḇenadi kor faro Allah Yahwe I kada, nari kofanam syadi yoḇ I.
Bisa kor rosai monda ro nadi koḇena, mboi ipyum ya namnis Allah Yahwe marisen Ḇyena. Kofrur rarirya kada, Yahwe nari kyarem nadi koḇena. Refo ya doḇe, ”Kokyar imnaf fararyor koḇena, rofyor kor rosairya wer imnis kuker marisen ḇyedi.” (1 Yohanes 5:14) Yesus ikofenḇair roi bisa kor ro nadi koḇena. (Kowasya Matius 6:9-13.) Rofyor koḇenadi, bisa kokofenḇair makakwarek koḇena, imbape koḇefnder awer fa kokofen kasumasa faro Manseren Allah ḇekur roi ifrur kwar ḇe ko na resari. Oso wer ido, konadiwarek snonggaku ḇesesya.
2. Moḇsa na koḇenadi rai?
Refo ya ikofen ḇo doḇe, ”Mgosbawer roi mgokram ro mgosnemna ḇe I.” (Mazmur 62:8) Inja rofyor koḇenadi, kokofen fararyor koḇena kuker kosnesna nasiper. Bisa kawos nadi koḇena fa ryok naba ḇaido kawos ro kosnesna monda. Yahwe ryower nadi koḇena ro moḇ sairirya kam ma ro fafisu nakam. Yahwe dor ko fa kokain wepur, koḇansuba, ḇaido kores fafisu koḇenadi ke? Oroḇa. Ḇefandun syadi iso kofasnai syowi ro fafisu koḇenadi.
3. Moḇsa Manseren Allah kyarem nadi koḇena rai?
Allah Yahwe kyarem nadi koḇena ro nyan ḇebor. Oser ya iso fyasos Wos Ḇyena, Refo ya. Ro Refo ya, na kosmai wos ḇepyum fa nfarkin nyan kenem koḇena. Refo ya doḇe wos ḇero dori na ”nafrur fa snonggaku ḇekir ḇa sya sakfawinanem”. (Mazmur 19:7; kowasya Yakobus 1:5.) Yahwe kyarem nadi koḇena kako kuker byuk kananon ḇe ko rofyor kosmai samswen. Ma byuk manfamyan Ḇyesi fa sisaramper ko fafisu kofandun fafnoḇek.
SWEWAR KAKU WER
Nari kofarkor fa kofawi rosai na kofrur kaku insama Manseren Allah imarisen ryower nadi koḇena ma payamyum rosai nari kosmai kukro koḇenadi.
4. Roi na ḇefrur fa Manseren Allah ryower nadi koḇena
Rosai monda na ḇefrur fa Manseren Allah ryower nadi koḇena? Komam VIDIO.
Yahwe imarisen insama koḇenadi kor faro I. Kowasya Mazmur 65:2, raimnai kawos fakfuken ine:
-
Kwara ido, ”Manḇerower nadi” imarisen benadi faro I ke? Kwarem rarirya kukro?
Komarisen Manseren Allah ryower nadi koḇena ido, kokenem imnis marisen Ḇyena kada. Kowasya Mikha 3:4 ma 1 Petrus 3:12, raimnai kawos fakfuken ine:
-
Rosai na kofrur kaku insama Yahwe ryower nadi koḇena?
Ro mamamun oso, raryur ri suru sumbroḇ su ḇo senadi insama sisambraḇ fa smun mbroḇ sesya. Kwara ido, nari Manseren Allah kyarem nadi ḇeradine ke?
5. Kokofenḇair rosai kokram ro kosnesna ro nadi koḇena
Snonggaku ḇebor sfarkor si kwar fa sap kaḇer ker wos ro nadi oso, oroḇa ido senadi ro wos oso mboi manggunsi sfawi pyum na ḇa. Manseren Allah na imarisen faro nadi ḇeradine ke? Kowasya Matius 6:7, raimnai kawos fakfuken ine:
-
Rosai na wafrur kaku insama wap kaḇer ker awer wos oser-oser ro nadi Bena?
Ro ras ḇe ras, kwarapan roi ḇepyum risai wasmai kwar ro ras ani, mura benadi fa wakofen kasumasa faro Yahwe I. Wafrur roi ine ro swaf minggu oser kwar ido, kwara ḇa boi benadi faro roi ri fik kwar ma wap kaḇer ker roi oso monda ḇa.
Kma ḇesawarwar na imarisen fa roma ḇyedi ikofenḇair rosai ikram ro sneri yoḇ i. Imnis rarirya, Yahwe dakmarisen koḇenadi fa kokofenḇair rosai kokram ro kosnesna yoḇ I
6. Nadi ima roi ḇepyum Manseren Allah byuk nairi
Moḇsa nadi syambraḇser ko rofyor koisya ro fafisu ḇepyum ma ḇepyum ḇa na? Komam VIDIO.
Refo ya doḇe nadi nafnoḇek ko fa kosmai sneprei fafisu kosmai samswen. Kowasya Filipi 4:6, 7, raimnai kawos fakfuken suine:
-
Koḇenadi raposa, samswen koḇena nandebur ko ḇeri ḇa. Ḇape payamyum rosai na kosmai kukro koḇenadi kwar?
-
Rosai monda wamarisen wakofen ro nadi Bena?
Wafawi ke?
Wos ”amin” knam kaku ya iso ”kaku ryarirya”. Ro fafisu naiwara, snonggaku sya senadi rawo imbe simnai kwar ido, na sap wos ”amin”.—1 Tawarikh 16:36.
7. Fasos swaf Bena fa benadi
Ras ono ido, koḇefnder fa koḇenadi kukro kofrur fararur na nabore. Yesus manggundi myam nadi ḇe roi ḇefandun kaku. Kowasya Matius 14:23 ma Markus 1:35, raimnai kawos fakfuken suine:
-
Rosai Yesus ifrur kaku insama nya swaf fa ḇyenadi?
-
Fafisu risai na wakḇenadi?
SIA SOḆE: ”Yanadi kwar, fama rya Manseren kyarem nadi yena ḇa.”
-
Rosai na wakofen ya?
FARKARKOR ḆYENA
Koḇenadi kuker sne ḇesiper ido, nari kofanam syadi ḇe Manseren Allah, kosmai kananon, ma nafnoḇek ko fa kosouser pdef ḇe Yahwe I.
Waswarepen Kaḇer
-
Koḇenadi faro mansei?
-
Moḇsa na koḇenadi rai?
-
Payamyum rosai na kosmai kukro koḇenadi kwar?
SWEWAR NABOR WER
Rosai ḇefnai kaku fa benadi, ma moḇsa na benadi kuker sne ḇesiper rai?
Refo ikofenḇair ḇe ko koḇenadi faro mansei kaku.
”Fandun fa Yanadi Yor faro Santo Sya Ke?” (Fasfas ro situs jw.org)
Vidio musik ine fyasnaiḇair Yahwe bisa ryower nadi koḇena ro moḇ sairirya kam ma ro fafisu nakam.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
