LESEN 09
Kam Klosap Long God Tru Long Prea
?Yu yu nidim wan narafala blong i lidim yu? ?Yu wantem save ansa blong sam impoten kwestin? ?Yu nidim kamfot? ?Yu wantem kam klosap moa long Jehova? Prea i save halpem yu blong kasem olgeta samting ya. ?Be wanem stret rod blong prea? ?God i lesin long evri prea? ?Yu save mekem wanem, blong hem i harem ol prea blong yu? I gud yumi faenemaot.
1. ?Yumi mas prea long hu, mo from wanem samting?
Jisas i tijim se yumi mas prea nomo long Papa blong yumi long heven. Jisas tu i prea long Jehova. Hem i talem se: “Taswe yufala i mas prea olsem: ‘Papa blong mifala long heven . . .’” (Matiu 6:9) Taem yumi prea long Jehova, yumi stap mekem frensip blong yumi wetem hem i kam strong moa.
Yumi save prea from eni samting. Be blong God i ansa, ol prea ya oli mas laenap wetem wil blong hem. “Nomata wanem samting yumi askem long [God], mo sipos i laenap wetem wil blong hem, hem i harem yumi.” (1 Jon 5:14) Jisas i tokbaot sam samting we i stret blong prea from. (Ridim Matiu 6:9-13.) Yumi save prea from prapa nid blong yumi, be antap moa, yumi mas tingbaot blong talem tangkiu long God from samting we hem i mekem finis blong yumi, mo askem hem blong i halpem ol narafala.
2. ?Yumi mas prea olsem wanem?
Baebol i enkarejem yumi blong “talemaot olgeta samting we i stap long hat blong [yumi].” (Ol Sam 62:8) So, ol prea blong yumi oli mas tru mo oli kamaot long hat blong yumi. Yumi save prea long laod voes o long tingting nomo, mo long eni posisen we i soem respek. Yumi save prea long enitaem mo long eniples.
3. ?Olsem wanem God i ansa long ol prea blong yumi?
Hem i ansa long plante rod. Jehova i givim Baebol, mo plante taem ansa blong ol kwestin blong yumi i stap long hem. Fasin blong ridim Baebol i “mekem man we i no gat ekspiriens, i waes.” (Ol Sam 19:7; ridim Jemes 1:5.) God i save givim pis long tingting taem yumi fesem ol jalens. Mo Hem i save pulum ol man blong hem, blong oli halpem yumi taem yumi nidim.
DIGIM MOA
Jekem olsem wanem yu save mekem ol gudfala prea we God i glad long olgeta, mo faenemaot olsem wanem prea i save givhan long yu.
4. Stret rod blong prea long God
?Wanem sam samting we i save mekem se God i akseptem ol prea blong yumi? Plei VIDEO.
Jehova i wantem se yumi prea long hem. Ridim Ol Sam 65:2, mo tokbaot ol kwestin ya:
-
?Yu ting se “Man blong harem ol prea” i wantem yu prea long hem? ?From wanem yu ansa olsem?
Yumi mas mekem se laef blong yumi i laenap wetem ol rul blong God, sipos yumi wantem se hem i harem ol prea blong yumi. Ridim Maeka 3:4 mo 1 Pita 3:12, mo tokbaot kwestin ya:
-
?Olsem wanem blong meksua se Jehova i lesin long ol prea blong yumi?
Long taem blong wo, tugeta saed i prea blong win. ?I stret blong talem se God i save ansarem ol prea ya?
5. Ol prea blong yumi oli mas kamaot long hat
Sam man oli lanem blong ripitim sem toktok long ol prea blong olgeta. ?Be God i wantem se yumi prea olsem? Ridim Matiu 6:7, mo tokbaot kwestin ya:
-
?Olsem wanem blong no “talem sem toktok bakegen mo bakegen” long ol prea?
Evri dei, yu save tingbaot wan blesing long laef blong yu, mo yu talem tangkiu long Jehova from. Yu mekem olsem blong seven dei long wan wik, ale bambae yu luk se yu prea from seven defren topik we yu no nid blong ripitim sem toktok.
Wan gudfala papa i wantem se pikinini blong hem i toktok wetem fulhat blong hem. Jehova tu i wantem se yumi prea wetem fulhat blong yumi
6. Prea i wan presen we i kam long God
?Olsem wanem prea i save givim paoa long gudtaem mo badtaem? Plei VIDEO.
Baebol i promes se prea i save halpem yumi blong gat pis long tingting. Ridim Filipae 4:6, 7, mo tokbaot ol kwestin ya:
-
Nating se prea i no tekemaot ol problem blong yumi, ?be i givhan olsem wanem?
-
?Wanem sam samting we yu wantem prea from?
?Yu yu save?
Tok ya “amen” i minim “!I mas olsem!” o “i tru.” Stat long taem blong Baebol, ol man oli stap talem “amen” long en blong ol prea.—1 Kronikel 16:36.
7. Tekem taem blong prea
Samtaem yumi bisi tumas nao yumi foget blong prea. ?Prea i impoten olsem wanem long Jisas? Ridim Matiu 14:23 mo Mak 1:35, mo tokbaot ol kwestin ya:
-
?Wetaem Jisas i faenem taem blong prea?
-
?Wetaem yu save faenem taem blong prea?
SAM MAN OLI SE: “Prea i blong westem taem nomo.”
-
?Wanem tingting blong yu?
SAMARI
Prea we i kamaot long hat, i mekem yumi kam klosap moa long God, i givim pis long tingting, mo i givim paoa we yumi nidim blong mekem Jehova i glad.
Tingtingbak
-
?Yumi mas prea long hu?
-
?Yumi mas prea olsem wanem?
-
?Prea i save givhan long yumi olsem wanem?
FAENEMAOT
Faenem ansa blong ol kwestin long saed blong prea, we plante man oli stap askem.
“Seven Samting We Yu Mas Save Long Saed Blong Prea” (Wajtaoa, 1 Novemba 2010)
Lanem ol impoten risen blong prea mo blong mekem ol prea blong yu oli kamgud moa.
Baebol i talem stret man ya we yumi mas prea long hem. Yu traem faenemaot.
?I rili impoten blong prea long wan stret ples mo long wan stret taem? Plis luk miusik video ya.
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
