IRUẸMWI 09

Erhunmwu Gha Si Ruẹ Kẹ Osanobua

KPẸRE

U gualọ adia nọ gha ru iyobọ nuẹn vbe ẹdagbọn ruẹ ra? Ọ mwẹ inọta eso nọ kpokpo ruẹ vbe orhiọn ra? U hoo ne orhiọn ruẹ sotọ ra? U hoo ne u sikẹ e Jehova sayọ ra? Erhunmwu gha sẹtin ru iyobọ nuẹn. Sokpan de odẹ nọ khẹke na ya gha na erhunmwu? Erhunmwu hia ẹre Osanobua danmwehọ re ra? Vbọ khẹke ne u ru ne Osanobua mieke na gha họn erhunmwu ruẹ? Gia ziro yan rẹn.

1. De ọmwa nọ khẹke na gha na erhunmwu gie? De emwi na gha sẹtin nọ vbe erhunmwu?

Jesu wẹẹ Erha mwa nọ rre ẹrinmwi ọkpa, ẹre ọ khẹke ne ima gha na erhunmwu gie. Irẹn tobọre wa gha na erhunmwu gie Jehova. Jesu khare wẹẹ: “Vbenian ọre uwa [khian] ya gha na erhunmwu, ‘Erha mwa nọ rre ẹrinmwi . . . ‘” (Matiu 6:9) Ma ghaa na erhunmwu gie Jehova, ma ghi gha sikẹ ọre sayọ.

Ma gha sẹtin nọ e Jehova vbe erhunmwu, emwi ke emwi nọ gua iho ọghẹe ro. E Baibol wẹẹ, ‘deghẹ ima nọ rẹn emwi nọ gua iho ọghẹe ro, ọ gha họn.’ (1 Jọn 5:14) Jesu ya unu kaẹn emwi eso na gha sẹtin nọ vbe erhunmwu. (Tie Matiu 6:9-13.) Ẹi wa re emwi nọ da ima vbe orhiọn ọkpa ẹre ima khian gha nọ e Jehova re, ọ vbe khẹke ne ima gha kpọnmwẹ ọnrẹn ye emwi nọ he ru ne ima, ma ghi vbe gha rinmwiaẹn nọ ru iyobọ ne emwa ọvbehe.

2. De odẹ nọ khẹke na ya gha na erhunmwu?

E Baibol wẹẹ ne ima “ta enegbe [ima] hia ma [Osanobua].” (Psalm 62:8) Nọnaghiyerriọ, ọ khẹke ne erhunmwu ima gha re nọ ke ekhọe rre. Ma sẹtin na erhunmwu ladian, ma sẹtin vbe naẹn ye ekhọe, sokpan ma ghi mu egbe ye ihe nọ gha rhie ọghọ ne Osanobua. Ma sẹtin na erhunmwu vbe ẹghẹ ke ẹghẹ ra vbe ehe nọ rhirhi gha khin.

3. De vbene Osanobua ya họn erhunmwu ima hẹ?

Odẹ ughughan ẹre ọ ya họn erhunmwu ima. Te Jehova kpemehe Baibol, ne ima mieke na gha miẹn ewanniẹn ọghe avbe inọta ni kpokpo ima vbe orhiọn. Te Baibol “rhie ẹwaẹn ne iran nẹi te mwẹ”; ọ khẹke na gha tie ẹre. (Psalm 19:7; tie Jems 1:5.) Osanobua gha sẹtin mu ima orhiọn sotọ vbe ima ghaa rre ọlọghọmwa. Ọ gha vbe sẹtin loo emwa rẹn ya ru iyobọ ne ima vbe ẹghẹ nọ khẹke.

GUALỌ OTỌ RE SAYỌ

Gia ziro yan emwi nọ khẹke ne u ru, ne Osanobua mieke na gha họn erhunmwu ruẹ kevbe vbene erhunmwu ne a na, khian ya ru iyobọ nuẹn hẹ.

4. Evbọ khẹke ne ima ru, ne Osanobua mieke na gha họn erhunmwu ima

De emwi nọ khian ya Osanobua gha họn erhunmwu ima? Kpee VIDIO na.

E VIDIO: Erhunmwu Hia Ẹre Osanobua Danmwehọ Re Ra?—Abọ Ne Kuẹi Vbọ (2:42)

E Jehova hoo ne ima gha na erhunmwu gie irẹn. Tie Psalm 65:2, iyeke ọni, uwa ghi ziro yan avbe inọta na:

Uwẹ yayi wẹẹ e Jehova nọ re Osa nọ “họn erhunmwu” hoo ne uwẹ gha na erhunmwu gie irẹn ra? Vbua gu kha vberriọ?

Ma ghaa hoo ne Osanobua họn erhunmwu ima, te ọ khẹke ne ima gha ya ilele ọghẹe ru emwi. Tie Maika 3:4 kevbe 1 Pita 3:12, iyeke ọni, uwa ghi ziro yan inọta na:

Vbọ khẹke ne ima ru ne Jehova mieke na gha họn erhunmwu ima?

Vbe ẹghẹ okuo, obọ ọkpa ghaa na erhunmwu ne iran khọn miotọ, obọ nọkpa ghi vbe gha ru vberriọ. Uwẹ yayi wẹẹ Osanobua gha họn erhunmwu vberriọ ra?

5. Ọ khẹke ne erhunmwu ne ima na gha re nọ ke ekhọe rre

Emwi na maa emwa eso re, ọre ne iran gha ta ẹmwẹ ọkpa yan egbe yan egbe vbe ẹghẹ ke ẹghẹ ne iran ya na erhunmwu. Sokpan uwẹ yayi wẹẹ erriọ Osanobua gualọe yi ra? Tie Matiu 6:7, NW, iyeke ọni, uwa ghi ziro yan inọta na:

De emwi nọ gha ru iyobọ nuẹn, ne u ghẹ gha ta “ẹmwẹ ọkpa yan egbe yan egbe” vbe ẹghẹ ke ẹghẹ ne u ya na erhunmwu?

Gha muẹn roro vbe ẹdẹgbegbe, emwi ọkpa kpataki ne Jehova he ru nuẹn vbe ẹdagbọn ruẹ, u ghi vbe kpọnmwẹ ọnrẹn yọ. U gha ru ẹre vberriọ la uzọla ọkpa, u i khian ghi gha ta emwi ọkpọkpa vbe erhunmwu.

Erha nọ maan keghi hoo ne ovbi ẹre gha fannọ otọ ẹko ẹre ma irẹn. Erriọ e Jehova vbe hoo ne ima gha fannọ otọ ẹko ma irẹn vbe erhunmwu

6. Te Osanobua ya erhunmwu ru ima ẹse

De vbene erhunmwu ya ru iyobọ ne ima hẹ, katekate vbe ima ghaa rre uwu ọlọghọmwa? Kpee VIDIO na.

E VIDIO: Erhunmwu Keghi Ru Iyobọ Ne Ima Vbe Ẹghẹ Ibavbaro (1:32)

E Baibol tama ima wẹẹ, erhunmwu gha sẹtin mu ima orhiọn sotọ. Tie Filipai 4:6, 7, iyeke ọni, uwa ghi ziro yan avbe inọta na:

De iyobọ ne erhunmwu ye, agharhemiẹn wẹẹ, ẹi re ẹghẹ hia ne ima ya na erhunmwu, ẹre ọlọghọmwa ne ima ye wa ya fo vbe otọ?
De emwi eso ne u gha hoo ne u nọ vbe erhunmwu?

U ka rẹn ra?

Evba ya “isẹ” kha ọre, “gi ẹre gha yerriọ.” Ke ẹghẹ na ya gha gbẹn e Baibol gha dee, ẹre a ke gbe “isẹ” ye erhunmwu vbe a gha naẹn fo nẹ.—1 Krọnikol 16:36.

7. Zẹ ẹghẹ kọ ne u ya gha na erhunmwu

Ugbẹnso, ma ghaa mwẹ emwi nibun ne ima ru, ma sẹtin mianmian ya na erhunmwu. De aro ne Jesu ya gha ghee erhunmwu ne a na? Tie Matiu 14:23 kevbe Mak 1:35, iyeke ọni, uwa ghi ziro yan avbe inọta na:

De emwi eso ne Jesu ru, nọ mieke na miẹn ẹghẹ ya na erhunmwu?
De ẹghẹ ne uwẹ yayi wẹẹ ọ khẹke ne u ya gha na erhunmwu?

EMWA ESO KEGHI KHA WẸẸ: “Ẹghẹ na ya na erhunmwu, te a muẹn rhia, rhunmwuda, ọmwa rhọkpa i rrọọ nọ danmwehọ.”

Ọmwa gha ta ẹmwẹ vbenian ma ruẹ, vbua khian ya khuẹnniẹn ọnrẹn hẹ?

OLIKA ẸMWẸ

Ma ghaa na erhunmwu nọ ke ekhọe rre, ọ ghi ya ima sikẹ Osanobua sayọ, ọ ghi mu ima orhiọn sotọ, ọ ghi vbe ru iyobọ ne ima ya gha ru emwi nọ yẹẹ e Jehova.