KALANSEN 09

Gɛrɛ Ala la delili sababu fɛ

A BILA A LA

Yala i delila k’a miiri ko i mago bɛ ɲɛminɛli la i ka ɲɛnamaya kɔnɔ wa? Yala ɲininkali nafamaw bɛ i bolo i tun b’a fɛ ka minnu jaabiw sɔrɔ wa? Yala i mago bɛ dususaalo walima hakililatigɛ la wa? Yala a tun bɛ diya i ye ka gɛrɛ kosɛbɛ Jehova la wa? Delili bɛ se ka i dɛmɛ o fɛnw bɛɛ la. Nka delili kɛcogo ɲuman ye jumɛn ye? Yala Ala bɛ deliliw bɛɛ lamɛn wa? I bɛ se ka mun kɛ walasa ka d’a la ko a bɛna i ka deliliw lamɛn? An ka o lajɛ.

1. An ka kan ka jɔni de deli ani an bɛ se ka delili kɛ mun ni mun de ko la?

Yesu y’a fɔ ko an ka kan ka an sankolo la Fa dɔrɔn de deli. Yesu yɛrɛ tun bɛ Jehova de deli. A y’a fɔ ko: “Aw ka kan ka Ala deli tan ko: ‘An Fa min bɛ sankolo la . . . ’” (Matiyu 6:9) Ni an bɛ to ka Jehova deli, an bɛ an ni a ka teriya barika bonya.

An bɛ se ka delili kɛ fɛn caman caman ko la. Nka walasa Ala ka an ka deliliw lamɛn, u ka kan ka bɛn a sago ma. “Ni an ye fɛn dɔ deli [Ala] fɛ ka kɛɲɛ ni a sago ye, a bɛ an lamɛn.” (1 Yuhana 5:14) An ka kan ka delili kɛ fɛn minnu ko la, Yesu ye olu misaliw di. (Matiyu 6:9-13 kalan.) Ni an bɛ delili kɛ an yɛrɛ haminakow kosɔn, an kana ɲinɛ ka Ala barika da a ka ko kɛlenw kosɔn an ye. An kana ɲinɛ fana k’a ɲini a fɛ a ka tɔw dɛmɛ.

2. An ka kan ka delili kɛ cogo di?

Bibulu bɛ dusu don an kɔnɔ an ka an “kɔnɔna kow bɛɛ fɔ [Ala] ye k’a foori.” (Zaburu 62:9) O la, an ka deliliw ka kan ka kɛ ni kɔnɔnajɛya ye ani k’u kɛ ni an dusukun bɛɛ ye. An bɛ se ka delili kɛ ni kanba ye walima k’a kɛ an kɔnɔ, nka an kɛcogoya ka kan k’a jira ko an bɛ bonya da Ala kan. An bɛ se ka delili kɛ waati bɛɛ ani yɔrɔ bɛɛ la.

3. Ala bɛ an ka deliliw jaabi cogo di?

A bɛ o kɛ cogo caman na. Jehova ye a ka Kuma di an ma, ni o ye Bibulu ye. An bɛ to ka an ka deliliw jaabiw sɔrɔ o kɔnɔ tuma caman. Ala ka Kuma kalanni bɛ se ka “hakilitigiya di mɔgɔ ko dɔnbali ma.” (Zaburu 19:8; Yakuba 1:5 kalan.) Ala bɛ se ka an hakili sigi ni gɛlɛyaw bɛ an kan. Ani a bɛ se ka a batobagaw bila u ka an dɛmɛ, ni an mago bɛ dɛmɛ na tiɲɛ yɛrɛ la tuma min na.

DƆ FARA I KA DƆNNIYA KAN

I bɛ se ka deliliw kɛ minnu ka di Ala ye ni i dusukun bɛɛ ye cogo min na, an ka o sɛgɛsɛgɛ. An bɛna a ɲini k’a dɔn fana delili bɛ se ka i nafa cogo min na.

4. Ala bɛ fɛn dɔw ɲini an fɛ delili ko la

Mun ni mun de b’a to Ala ka sɔn an ka deliliw la walima ka ban u la? A’ye WIDEYO lajɛ.

WIDEYO: Yala Ala bɛ deliliw bɛɛ lamɛn wa?—Yɔrɔ dɔ (2:42)

Jehova b’a fɛ an ka to ka a deli. Zaburu 65:3 kalan, o kɔ aw ka baro kɛ nin ɲininkaliw kan:

Yala e hakili la, “min bɛ delili lamɛn,” o b’a fɛ i ka to ka a deli wa? Mun na e sɔnnen bɛ o ma walima mun na e ma sɔn o ma?

Ni an b’a fɛ Ala ka an ka deliliw lamɛn, fo an ka ɲɛnamaya kɛ ka kɛɲɛ ni a ka sariyakolow ye. Mise 3:4 ani 1 Piɛrɛ 3:12 kalan, o kɔ aw ka baro kɛ nin ɲininkali kan:

An bɛ se ka d’a la tigitigi cogo di ko Jehova bɛna an ka deliliw lamɛn?

Kɛlɛ waati la, a bɛ se ka kɛ ko, minnu bɛ ka ɲɔgɔn kɛlɛ, olu bɛɛ bɛ Ala deli u yɛrɛw fan fɛ walasa u ka se sɔrɔ. Yala hakilitigiyako don ka sigi n’a ye ko Ala bɛna o deliliw jaabi wa?

5. An ka deliliw ka kan ka bɔ an dusukun de la

Mɔgɔ dɔw kalanna u ka to ka segin-segin delili dɔw kan tuma bɛɛ, walima ka delili kɛ kan dɔ la u tɛ min faamu. Nka yala Ala b’a fɛ an ka to k’a deli o cogo de la wa? Matiyu 6:7 kalan, o kɔ aw ka baro kɛ nin ɲininkali kan:

I bɛ se ka i yɛrɛ tanga cogo di “fɛn kelenw fɔli ma tuma bɛɛ” i ka deliliw kɔnɔ?

Don o don, i bɛ se ka miiri duba kɛrɛnkɛrɛnnen dɔ ko la i ye min sɔrɔ i ka ɲɛnamaya kɔnɔ ani ka Jehova barika da o duba ko la. Dɔgɔkun kɔnɔ, i ka o kɛ don o don, o la i bɛna delili kɛ fɛn wolonwula ko la k’a sɔrɔ i ma segin-segin fɛn kelenw kan.

Denfa ɲuman b’a fɛ a den dusukunnakow ye minnu ye tigitigi, a ka olu de fɔ a ye. O cogo kelen na, Jehova fana b’a fɛ an k’a deli ni an dusukun bɛɛ ye

6. Delili ye nilifɛn ye ka bɔ Ala yɔrɔ

Delili bɛ se ka fanga di an ma cogo di waati ɲumanw ani waati juguw la? A’ye WIDEYO lajɛ.

WIDEYO: Delili bɛ an dɛmɛ ka muɲuli kɛ (1:32)

Bibulu ye layidu ta ko delili bɛ se ka an dɛmɛ an ka hakilisigi lakika sɔrɔ. Filipekaw 4:6, 7 kalan, o kɔ aw ka baro kɛ nin ɲininkaliw kan:

Hali ni delili tɛ an ka gɛlɛyaw bɛɛ ban tuma bɛɛ, a bɛ an dɛmɛ cogo di?
A bɛ diya i ye ka delili kɛ fɛn minnu ko la, olu dɔw ye jumɛnw ye?

I tun bɛ nin dɔn wa?

Daɲɛ min ye ko “amiina”, o kɔrɔ ye ko “a ka kɛ ten” walima “siga t’a la.” Kabini Bibulu sɛbɛn waatiw la, “amiina” tun bɛ fɔ deliliw laban na.—1 Tilew Kibaru 16:36.

7. Waati ɲini delili kama

Tuma dɔw la, an bolo degunnen bɛ se ka kɛ, fo an bɛ ɲinɛ ka delili kɛ. Delili nafa tun ka bon Yesu bolo fo ka se hakɛ jumɛn ma? Matiyu 14:23 ani Marka 1:35 kalan, o kɔ aw ka baro kɛ nin ɲininkaliw kan:

Yesu ye mun de kɛ walasa ka waati sɔrɔ delili kama?
E bɛ se ka waati sɔrɔ tuma jumɛn de la delili kama?

MƆGƆ DƆW B’A FƆ KO: “Ala tɛ an ka deliliw jaabi joona.”

I bɛna mun de fɔ ka o tigilamɔgɔw jaabi?

BAKURUBAFƆLI

Delili minnu bɛ kɛ ni kɔnɔnajɛya ye, olu bɛ an gɛrɛ kosɛbɛ Ala la, ka hakilisigi di an ma ani ka fanga di an ma an mago bɛ min na walasa ka an kodiya Jehova ye.