PARLAJARAN 09

Padohor Nasiam ma bani Naibata Marhitei Tonggo

PADALAN

Sihol do ham itogu-togu ibagas hagoluhan on? Sihol do ham ase damei uhur ampa pingkiranmu? Sihol do ham lambin dohor bani Jahowa? Ganupan ai boi dapot hita marhitei tonggo. Tapi, sonaha cara na sintong laho martonggo? Ai itangar Naibata do ganup tonggo? Aha do na boi ibahen ham ase itangar Naibata tonggomu? Ulas hita ma ai.

1. Hubani ise do hita martonggo, janah aha do na boi itonggohon hita?

Jesus mangajarhon ase hita martonggo pitah hubani Bapanta na i surga. Ia sandiri pe martonggo hubani Jahowa do. Ia mangkatahon, “Ase sonon ma tonggonima, ‘Ham Bapanami na i nagori atas . . .’” (Mateus 6:9) Anggo martonggo hita hubani Jahowa, lambin orot ma hita hu Bani.

Hita boi manonggohon pasal aha pe hubani Naibata. Ase ibalosi tonggonta, maningon domu do ai hubani harosuh-Ni. Bibel mangkatahon, “Anggo ipindo hita atap aha pe na domu hubani rosuh ni uhur-Ni, itangihon do hita.’’ (1 Johannes 5:14) Ibere Jesus do siusihan pasal aha na boi itonggohon hita. (Basa Mateus 6:9-13.) Boi do ipatugah hita pasal holsoh ni uhurta janah ulang ma lupa martarima kasih bani sibere-bere ni Naibata hubanta. Tonggohon ma homa halak na legan.

2. Sonaha cara na sintong laho martonggo?

Bibel mangojur hita ase “manguseihon ganup na ibagas uhurta i lobei ni [Naibata]”. (Psalmen 62:8) Jadi, tonggonta maningon roh humbani borsih ni uhur. Boi do hita marsora sanggah martonggo atap pitah ibagas uhur. Lang soal hita jongjong atap hundul, na sipontingan maningon hormat do hita sanggah martonggo. Janah hita boi martonggo bani ganup panorang.

3. Sonaha Naibata mambalosi tonggonta?

Boi do ibalosi Jahowa tonggonta marhitei bahat cara, contohni marhitei Bibel. Mambasa hata ni Naibata boi “mambahen halak na lang marpangalaman gabe pandei”. (Psalmen 19:7; basa Jakobus 1:5.) Ibere Jahowa do homa hadameion ni uhur hassi pe adong tantangan. Anjaha, boi do Ia mambahen juakjuak-Ni laho mangurupi hita.

PARLAJARI ROH BAHATNI

Parlajari ma sonaha ase tonggonta boi pamalaskon uhur ni Naibata, janah aha do gunani tonggo hubanta.

4. Sonaha ase itangihon Naibata tonggonta?

Aha do piga-piga alasan na mambahen tonggonta lang itangihon Naibata? Tonton ma VIDEO.

VIDEO: Ai Itangar Naibata do Haganup Tonggo?—Cuplikan (2:42)

Sihol do Jahowa ase hita martonggo hu Bani. Basa ma Psalmen 65:2, janah ulas ma sungkun-sungkun on:

Anggo iahap ham, tongon do “Sitangihon tonggo” sihol ase ham martonggo hu Bani? Mase sonai balosmu?

Marusaha ma hita mandalankon parentah ni Naibata ibagas goluhta ase itangar Ia tonggonta. Basa ma Mika 3:4 ampa 1 Petrus 3:12, janah ulas ma sungkun-sungkun on:

Aha do na mambahen pos uhurta anggo Naibata ra manangihon tonggonta?

Dong tentara na martonggo ase monang bani porang, hape munsuhni manonggohon na sarupa. Ai itangihon Naibata do tonggo sisonai?

5. Patugah ma bani Jahowa aha na ibagas uhurmu

Adong halak na iajarhon ase manghapal sada tonggo janah marulak-ulak mangkatahon ai sanggah martonggo. Tapi, ai marosuh do Naibata bani tonggo na sisonai? Basa ma Mateus 6:7, janah ulas ma sungkun-sungkun on:

Sanggah hita martonggo, sonaha ase ‘ulang marulak-ulak isahapkon hita hata na sarupa’?

Tiap ari, pingkirhon ma pasu-pasu aha na iahapkon ham humbani Jahowa janah hatahon ma tarima kasih hu Bani marhitei tonggo. Horjahon ma ai ibagas saminggu. Anggo ibahen ham sonai pasti lang sarupa tonggomu bani ganup ari.

Bapa na parholong sihol ase niombahni patugahkon na ibagas uhurni. Sonai homa, Jahowa sihol ase hita patugahkon na ibagas uhurta marhitei tonggo

6. Sibere-bere humbani Naibata do tonggo ai

Pardiateihon ma sonaha tonggo boi mangurupi hita sanggah sonang atap pe susah? Tonton ma VIDEO.

VIDEO: Tonggo Mangurupi Hita Ase Boi Martahan (1:32)

Bibel mangkatahon tonggo boi mambere hadameion ibagas uhur ampa pingkiran. Basa ma Pilippi 4:6, 7, janah ulas ma sungkun-sungkun on:

Hassi pe sipata tonggo lang mambahen salpu parsoalanta, tapi sonaha ai boi mangurupi?
Aha do na sihol itonggohon ham hubani Jahowa?

Ai ibotoh ham do?

Hata “amen” artini “saud ma” atap “pasti”. Humbani na hinan pe juak-juak ni Naibata mangkatahon “amen” bani ujungni tonggo.—1 Kronika 16:36.

7. Pasirsir ma panorang laho martonggo

Sipata lupa hita martonggo halani bahatni horja. Tapi, sonaha pangahap ni Jesus pasal tonggo? Basa ma Mateus 14:23 pakon Markus 1:35, janah ulas ma sungkun-sungkun on: