LESEN 09

Ririéch Ngeni Kot lón Iótek

PLAY

Ka meefi pwe a lamot ngonuk emmwen lón manawom? Mi wor óm kapas eis mi aúchea ka mochen ar repwe pélú? A lamot ngonuk kapasen ourur me apéchékkúl? Ka mochen an epwe lapóló óm chiechi ngeni Jiowa? Iótek a tongeni álisuk lón ekkena mettóch. Nge ifa usun kopwe iótek pwe Kot epwe etiwa? Kot a aúseling ngeni iótek meinisin? Met ka tongeni féri pwe epwe aúseling ngeni óm kewe iótek? Sipwe ppii.

1. Ié sipwe iótek ngeni, me met sia tongeni ióteki?

Jesus a áiti ngenikich ach sipwe chék iótek ngeni Semach we lón láng. Jesus pwisin a iótek ngeni Jiowa. A erá: “Iwe, iei usun ämi oupwe iotek: ‘Semem lon läng . . . ’” (Mateus 6:9) Atun sia iótek ngeni Jiowa, a lapóló ach riri ngeni.

Sia tongeni apachaalong sókkopaten mettóch lón ach kewe iótek. Nge ren án Kot epwe pélúweni ach kewe iótek, a lamot ar repwe tipeeú ngeni letipan. “Are sia tüngor och mine a fich ngeni letipan, a aüselingakich.” (1 Johannes 5:14) Jesus a áiti ngenikich ekkóch mettóch mi fich ach sipwe iótek usur. (Álleani Mateus 6:9-13.) Me lúkún ach ióteki ach kewe aúrek, a lamot ach sipwe chemeni le kilisou ngeni Kot ren met a féri fán itach, me tingorei an epwe pwal álisi ekkewe ekkóch.

2. Ifa usun sipwe iótek?

Ewe Paipel a pese ngenikich ach sipwe ‘pwäri ngeni [Kot] ach weires meinisin.’ (Kölfel 62:8) Iwe a lamot pwe ach kewe iótek repwe seni enletin letipach. Sia tongeni iótek ngeni fán léúwommóng are mwéngúnúngún chék. Ese lifilifil napanapach atun sia iótek, nge epwe fiti súfél. Sia tongeni iótek ese lifilifil ineet me ese lifilifil ia.

3. Ifa usun Kot a pélúweni ach kewe iótek?

A pélúweni lón chómmóng napanap. Jiowa a awora an we Kapas ewe Paipel, ikewe sia kan kúna me ie pélúwen ach kewe kapas eis. Án Kot we Kapas a tongeni ‘atipachema chon wewemang,’ are chókkewe ese naf ar sile atun ra álleani. (Kölfel 19:7; álleani James 1:5.) A tongeni atoto ngenikich kinamween ekiek atun sia nóm fán weires, me a tongeni néúnéú néún kewe chón angang le álisikich atun a fókkun lamot ngenikich álillis.

KÚTTAFICHI

Káé ifa usun ka tongeni eáni iótek seni enletin letipom ewe esin iótek Kot epwe etiwa, me ppii ifa usun iótek a tongeni álisuk.

4. Minne Kot a menei seni ach kewe iótek

Epwe ifa usun ach iótek pwe epwe ketiw me ren Kot? Fichi ei VIDEO.

VIDEO: Kot A Aúseling Ngeni Iótek Meinisin?—Kinikinin Chék (2:42)

Jiowa a mochen ach sipwe iótek ngeni. Álleani Kölfel 65:2, me mwirin pwóróusfengen wóón ekkeei kapas eis:

Óm lúkú nge ewe Chón Aúselinga iotek a mochen óm kopwe iótek ngeni? Pwata ka erá ena?

A lamot ach sipwe etipeeúfengeni manawach ngeni án Kot kewe allúk ika sia mochen an epwe aúseling ach kewe iótek. Álleani Mika 3:4 me 1 Petrus 3:12, me mwirin pwóróusfengen wóón ei kapas eis:

Met sipwe féri pwe Jiowa epwe aúseling ngeni ach kewe iótek?

Atun eú maun, iir me ruu ekkeei kúmiin soufiu ra iótek pwe repwe win. Nge mi tufich án Kot epwe pélúweni ekkena esin iótek?

5. A lamot ach kewe iótek repwe seni enletin letipach

Ekkóch aramas ra eéreni le epinipini ekkóch ar iótek pokiten ina met ra fen káé seni ar lamalam. Nge itá Kot a mochen an epwe ina usun ach iótek ngeni? Álleani Mateus 6:7, me mwirin pwóróusfengen wóón ei kapas eis:

Ifa usun sipwe túmúnú ach sisap “kapaspat” are epinipini ach kewe iótek?

Ka tongeni ekieki iteiten rán eú mettóch kopwe kilisou ngeni Jiowa ren. Féri ena lón unusen eú wiik, iwe epwe wor fisu sókkun mettóch ka fen iótekiir, nge kese epini me epini.

Emén sam mi múrinné a mochen án néún we epwe fós ngeni seni letipan. A pwal ina usun ren Jiowa, a mochen ach sipwe iótek ngeni seni letipach

6. Iótek ina liffangach me ren Kot

Ifa usun iótek a tongeni apéchékkúlakich lón fansoun kinamwe me fansoun weires? Fichi ei VIDEO.

VIDEO: Iótek A Álisikich le Likiitú (1:32)

Ewe Paipel a pwonei pwe iótek a tongeni álisikich le eáni enletin kinamween letip. Álleani Filipi 4:6, 7, me mwirin pwóróusfengen wóón ekkeei kapas eis:

Inaamwo ika esap fansoun meinisin iótek epwe ataweei ach kewe osukosuk, nge ifa usun a álisikich?
Ikkefa ekkóch mettóch ka mochen iótekiir?

En mi silei?

Ewe kapas “amen” a wewe ngeni “fókkun ina,” are “amwo epwe ina usun.” Seni me lóóm, aramas ra kan akkapasa “amen” lesópwólóón ar kewe iótek.—1 Kronika 16:36.

7. Awora fansoun le iótek

Fán ekkóch, eli sia kon tawengaw iwe sia ménúki le iótek. Ifa úkúkún aúchean iótek me ren Jesus? Álleani Mateus 14:23 me Markus 1:35, me mwirin pwóróusfengen wóón ekkeei kapas eis: