ˈWƆN ˗GƆ 09
Bhɛɛsü ˗yö kwa ˗ɲɔɔn ˗Zlan ˗bha
ˈˈTʋ̈ŋ ˈbhaa ˗nu ˈka, ü ˗bhawɔn ˗yö ˗yö ˗gleŋ ˗da ü ˗bha ˗mɛn ˗bha ˗ee? ˈDhɛɛ ˈbhaa ˗nu ˈü ˗an kpɔ ü ˗de ˗gɔ, ü˗ ˈˈpiʋ̈ ˈü ˗an ˗yɔ dɔ ˗ee? Ü˗ ˈˈpiʋ̈ mɛn ˈbhaa ü ˗zogban, kö ˗yö ü zuʋ̈ˈˈ kë ˗saa ˗ee? Ü˗ ˈˈpiʋ̈ ˈü kë Zoova ˈˈsuee ˗ee? Bhɛɛsü ˗mɔn ˗a ˗bha ˈö ˈwɔn ˗nu bhë ˗an ˗kë ü ˗dhɛ. ˈˈKɛɛ bhɛɛˈˈ ˗kɔ ˗së ˈnën ˗tɔ ˗mën? ˗Zlan ö ˈˈtʋ ˗to kwa ˗bha bhɛɛwo ˗bha ˗ee? ˈMën ˈü ˗dho ˗a kë kö ˗Zlan ö ˈˈtʋ ˈto ü ˗bha bhɛɛwo ˗bha? ˈPë ˈkwa ˗dho ˗a yö ˈwɔn ˗gɔ ˈö yö ˗a ˈgü ˈyö bhë.
1. ˈDe ˈkwa ˗dho bhɛɛˈˈ ˗a ˗dhɛ? ˈYö ˈmën ˈkwa ˗dho bhɛɛˈˈ ˗a ˗wɔn ˈgü?
Yesu ˗ya ˗pö kwa Dë Zoova ˈö dhaŋ˗ ˈgü, yö dosɛnŋ ˈnën ˈkwa ˗dho bhɛɛˈˈ ˗a ˗dhɛ. ˈPë yö ꞊dede ˈö˗ ˗kë yö ˈnën bhë. ˗Ya ˗pö: ‹ˈKa˗ pö ˈka bhɛaˈˈ ˗Zlan ˗dhɛ ˗kaa pö: Yi Dë ˗Zlan ˈi ˗ya ˗sü ˈka dhang˗ ˈgü ...› (Matiö 6:9) Kö ˈkwa bhɛɛˈˈ Zoova ˗dhɛ, kwa˗ ˗nu kwa ˗bha ˈˈtɔŋdëdhɛ ˗gɛn ˗yö ˗gban.
Kwa ꞊mɔɔn˗ ˗bha ˈkwa ꞊bhɛɛ pë ˈˈpɛpɛ ˗wɔn ˈgü. ˈˈKɛɛ ˈkwa˗ pö ˗yö kwa ˗bha bhɛɛwo ˗daa kë, ˈpë ˈkwa˗ ˗dhɛ ˗a ˗gɔ, ˗yö kë ˗a ˗dhidhɛwɔn ˈka. ‹ˈPë ˈö˗ ˗wɔn ˈdhö ga ˗sü ˈka [˗Zlan] ˈgü ˈkwa˗ ˗gba ˗dhɛ ˗a ˗gɔ, ˗yö ö ˈˈtʋ ˗to kwa ˗wʋ ˗bha.› (1 Zan 5:14) Pë ˗nu ˈö ˈkwa ꞊mɔɔn˗ ˗bha ˈkwa bhɛɛˈˈ ˗an ˗wɔn ˈgü, Yesu ˗yö ˗an ˈbhaa ˗nu ˗wɔn ˗blɛɛ. (Matiö 6:9-13 ˗an ˗wo pö.) ˈWɔn ˗nu ˈwo ˗gban kwa ˗bha, kwa ꞊mɔɔn˗ ˗bha ˈkwa ꞊bhɛɛ ˗an ˗wɔn ˈgü, ˈˈkɛɛ kwa ˗zo ˈya ˗dho bhɔ ˗Zlan ˈˈnuɛ bho ˗sü ˈka pë ˗nu ˈö ˗an ˗kë kwa ˗dhɛ ˗an ˗wɔn ˈgü. ˗Kwa bhɛɛˈˈ mɛn ˈˈwɛɛ ˗nu ˗wɔn ˈgü ˈpö.
2. Kwa ˗dho bhɛɛˈˈ ˗kɔ ˗kë ꞊dhɛ?
Biblö ˗yö kwa ꞊faanmën kö ‹ˈkwa kwa zuʋ̈ˈˈ ˈˈpʋ ˗Zlan ˗dhɛ.› (Psaume 62:8) ˈDhɛ ˈö ˈˈdhʋ̈, kwa ˗bha bhɛɛsü ˗yö kë ˈˈpuu, ˗yö ˈgo kwa zuʋ̈ˈˈ ˈˈpiʋ̈. Kwa ꞊mɔɔn˗ ˗bha ˈkwa ꞊bhɛɛ kwa ˗wo ˗ta ɛɛnˈˈ kwa zuʋ̈ˈˈ ˈˈpiʋ̈. ˗Kɔ do kpɛnŋdhö ˈö ˈkwa ˗dho dɔ ˗a ˈka kö ˈkwa bhɛɛˈˈ, Zoova yö ˈti˗ pö, pë ˈö˗ ˈˈpiʋ̈ ˈyö ˗tɔ kwa ˗bha bhɛɛˈˈ ˗kɔ ˗yö kë ö ꞊bhlëë ˈgü. Kwa ꞊mɔɔn˗ ˗bha ˈkwa ꞊bhɛɛ ˈˈtʋ̈ŋ ˗suu ˈˈoo ˗su ˈka, ˗dhɛ ˈˈoo ˗dhɛ ˈgü.
3. ˗Zlan ˗yö kwa ˗bha bhɛɛwo ˗nu ˗daakë ˗kɔ ˗kë ꞊dhɛ?
˗Ya ˗kë ˗kɔ ꞊va ˗ta. Zoova ˗yö ö ˈˈDhiwo ˈö ˗kë Biblö ˈka bhë ˗a ˗nu kwa ˗dhɛ. ꞊Ya kë ꞊shiö, kwa kwa ˗bha dhɛɛˈˈ ˗nu ˗yɔ ˗slɔɔ ˗a ˈgü. Psaume 19:7 ˗ya ˗zɔn ꞊dhɛ Biblö ˗wopösü ˗yö «˗mɛn ˈö˗ ˗zo yö ˈti ˗gban ꞊köŋ ˗a ˗kë ꞊kpɔɔsü.» (Psaume 19:7; Zakö 1:5 ˗wo pö.) ˈKwa kë ˈwɔn ˈˈgbɩɩ˗ ˗nu ˈgü, ˗yö ꞊mɔɔn˗ ˗bha ˈö kwa zuʋ̈ˈˈ ˈwaannu. Kwa ˗bhawɔn ˗ya yö ˗takundhe ˗bha, ˗yö ˗bɔ ö ˗dhɔkëmɛn ˗nu ˗ta ˈö nu kwa ˗dhɛ.
˗KAA ˈˈPIƲ̈ ˈPƆN
Bhɛɛˈˈ ˗kɔ ˈö ˗Zlan ˗dhɛ ˗së waa ˈwɔn ˗së ˈö bhɛɛsü ˗ya ˗kë kwa ˗dhɛ, ˗kwa ˗an ˗ga.
4. Pë ˗nu ˈö ˈkwa ˗dho ˗an kë kö ˗Zlan ˗yö ˈˈwɩ kwa ˗bha bhɛɛwo ˗bha
Kwa ˗dho ˗a kë ꞊dhɛ kö ˗Zlan ˗yö ˈˈwɩ kwa ˗bha bhɛɛwo ˗bha? ˗Kaa VIDEO ˗ga.
Zoova ˗ya ˈˈpiʋ̈ kö ˈkwa bhɛɛˈˈ ö ˗dhɛ. ˗Ka Psaume 65:2 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Ü ˗bha ˈgü, ˗Zlan ˗ya ˈˈpiʋ̈ kö ˈü ˈwɔn blɛɛˈˈ ö ˗dhɛ ˗ee? ˈMën ˗kë ˈü˗ pö ˈˈdhʋ̈?
ˈKwa˗ pö ˗Zlan ˗yö ö ˈˈtʋ ˈto kwa ˗bha bhɛɛwo ˗bha, ˗kwa kwa ˈgü dɔ ˈˈgbɩɩ˗ kö ˈkwa˗ ˗bha ˈtɔŋ˗ ˗nu ˈkun. ˗Ka Michée 3:4 waa 1 Piɛdhö 3:12 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
ˈMën kwa dua ˈdhö ˗mü kö ˈkwa˗ kë kö ˗Zlan ˗yö ö ˈˈtʋ ˈto kwa ˗bha bhɛɛwo ˗bha?
꞊Ya kë ꞊shiö ˗gblü ˈˈtʋ̈ŋ ˗nu ˈka, mɛn ˗nu ˈwo ˗dho ˗gblü gɔn wo ˈˈkwëë, ˗a mɛn ˈö ˈdhö ˗yö ˗bhɛɛ ˗Zlan ˗dhɛ kö ˈö ˈto ˗a ˈˈgbɩɩ˗ ˈka. Ü ˗bha ˈgü ˗Zlan ˗dho ö ˈˈtʋ ˈto mɛn ˗gwaa ꞊plɛ ˈwo bhë ˗an ˗bha bhɛɛwo ˗bha ˗ee?
5. Kwa ˗bha bhɛɛwo ˗yö ˈgo kwa zuʋ̈ˈˈ ˈˈpiʋ̈.
Mɛn ˈbhaa ˗nu ˗wo bhɛɛwo ˗draan kö ˈwo ʒiö ˗a ˈˈpiʋ̈. ˈˈKɛɛ ˗kɔ ˈö Zoova ˈdhö˗ ˈˈpiʋ̈ kö ˈkwa ˈwɔn blɛɛˈˈ ˗a ˈka ö ˗dhɛ yö ˈpö bhë ˗ee? ˗Ka Matiö 6:7 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
Kwa ˗dho ˗a kë ꞊dhɛ kö kwa ˗bha bhɛɛwo ˈgü kö kwa «ˈdho˗ ˗wo ˗dhɛ do ˈgü kplɔnkplɔndhö» ɛɛnˈˈ kö ˈkwa ˗wo do pö ˗kplawo?
ˈWɔn ˗së ˈö ˗kë ü ˗dhɛ ˗dhɛkpaɔyi ˈˈpɛpɛ ˈka, ü ˗zota ˗a ˈgü kö ˈü Zoova ˈˈnuɛ bho ˗a ˗bha. Kö ˈü˗ kë ˈˈdhʋ̈ ˈˈdhoogɔ do ˈgü, ü ˗dho bhɛɛˈˈ pë ˈˈsɔɔplɛ ˗wɔn ˈgü ˈö ˈbhaa ˗wo do pö ü ˗bha bhɛɛwo ˈgü ˗kplawo.
ˈPë ˈnën dë ˗tiaandhö ˈdhö˗ ˈˈpiʋ̈ ˈyö ˗tɔ kö ö ˗bha ˈnën ˗yö ö ˗zopiʋ̈wɔn ˗nu blɛɛˈˈ ö ˗dhɛ. Zoova ˗ya ˈˈpiʋ̈ ˈpö kö ˈkwa kwa ˗zopiʋ̈wɔn ˗nu blɛɛˈˈ ˗a ˗dhɛ.
6. Bhɛɛsü ˗yö gbɔɔdhe ˗së ˈö go ˗Zlan ˈˈpiʋ̈ ˗a ˈka.
Bhɛɛsü ˗yö ꞊faan ˗nu kwa ˗dhɛ ˗kɔ ˗kë ꞊dhɛ ˈˈtʋ̈ŋ ˗së waa ˈˈtʋ̈ŋ ˈˈgbɩɩ˗ ˗nu ˈgü? ˗Kaa VIDEO ˗ga.
Biblö ˗ya ˗pö bhɛɛsü ˈsaa˗ ˈgü, kwa ꞊mɔɔn˗ ˗bha ˈkwa zuʋ̈waannudhe ꞊dede ꞊slɔɔ. ˗Ka Fidhipö 4:6, 7 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Bhɛɛsü ˈyaa kwa ˗bha ˈwɔn ˗nu ˈˈɲan bhɔ ˈˈtʋ̈ŋ ꞊gban ˈka, ˈˈkɛɛ ˈkö ˗kë ˈˈdhʋ̈ ˗yö kwa ˗takun ˗kɔ ˗kë ꞊dhɛ?
-
˗Mën ˗nu ˈü˗ ˈˈpiʋ̈ ˈü bhɛɛˈˈ ˗an ˗wɔn ˈgü?
Ü˗ ˈwɔn ˗dɔ ˗ee?
Biblö ˗ya ˗zɔn ꞊dhɛ ˈö˗ ˗bhɔ ˈˈdhʋ̈ ꞊kwɛŋzü, ˗Zlan ˗dhɔkëmɛn ˗nu ˗wa ˗pö «˗yö kë ˈˈdhʋ̈» wo ˗bha bhɛɛwo ˈˈdhiʋ̈todhɛ ˈgü.—1 Chroniques 16:36
7. ˈˈTʋ̈ŋ ˈsü kö ˈü bhɛɛˈˈ.
꞊Ya kë ꞊shiö yö ˗yö ˗kë kwa ˗kɔ ˗ta ˈgbɛ ˈö kwa ˗zo ˗yö bhɔ bhɛɛsü ˈka. ˈˈKɛɛ Yesu ˗yö bhɛɛsü ꞊bhlëë ˗zɔn ˗kɔ ˗kë ꞊dhɛ? ˗Ka Matiö 14:23 waa Makö 1:35 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
Yesu ˗ya ˗kë ꞊dhɛ ˈö ˈˈtʋ̈ŋ ꞊slɔɔ kö ˗yö bhɛɛˈˈ?
-
ˈˈTʋ̈ŋ ˗mɛɛn ˈü ˗mɔn ˗a ˗bha ˈü bhɛɛˈˈ ˗a ˈgü?
MƐN ˈBHAA ˗NU ˗WA ˗PÖ: «Bhɛɛsü ˈö bhë mɛn zuʋ̈ˈˈ ˗kë ˗saa ˗pë ˈˈkpaan ˗mü.»
-
Mɛn ˈö˗ pö ˈˈdhʋ̈, ˗mën ˈü ˗dho ˗a pö ˗a ˗dhɛ?
˗A ˈDHƐ TO KWA ˈˈƝAAN
Bhɛɛwo ˈö go kwa zuʋ̈ˈˈ ˈˈpiʋ̈, ˗yö kwaa ˗Zlan ˗nu kwa ˗bha ˈˈtɔŋdëdhɛ ˗gɛn ˗gban, ˈö zuʋ̈waannusü nu kwa ˗dhɛ, ˈö ꞊faan ˈö kwa ˗bhawɔn ˈdhö ˗a ˗bha ˗a nu kwa ˗dhɛ kö ˈkwa kë Zoova ˗dhɛ ˗së.
˗Zobuödhe
-
ˈDe ˈkwa ˗dho bhɛɛˈˈ ˗a ˗dhɛ?
-
Kwa ˗dho bhɛɛˈˈ ˗kɔ ˗kë ꞊dhɛ?
-
˗Mën ˈö bhɛɛsü ˗mɔn ˗a ˗bha ˗ya kë kwa ˗dhɛ?
˗AN ˗GA ˈPÖ
Dhɛɛˈˈ ˗nu ˈö mɛn ꞊vadhɛ ˗an kpɔ wo ˗de ˗gɔ ˈö ˈwo ˗gban bhɛɛsü ˗bha, ˗an ˗yɔ ˗ga.
ˈPë ˗kë ˈö bhɛɛsü ˗wɔn ˈdhö ˈˈgbɩɩ˗ waa ˗kɔ ˈö ˈkwa ˗dho kwa ˗bha bhɛɛsü kë ˗a ˈka ˗tiaandhö ˗an ˗ga.
«ˈMën ˗kë ˈö n dua ˈdhö ˗mü kö ˈa bhɛɛˈˈ?» (ˈWɔn ˗gɔ ˈö jw.org ˗ta)
ˈMɛn ˈkwa ˗dho bhɛɛˈˈ ˗a ˗dhɛ Biblö ˗ya ˗zɔn kwa ˗dhɛ.
«N dua ˗mü ˈa bhɛɛˈˈ mɛn ˈˈslʋ̈ʋ̈slʋ̈ ˗nu ˗dhɛ ˗ee?» (ˈWɔn ˗gɔ ˈö jw.org ˗ta)
Video ˈö yö ˗ya ˗zɔn ꞊dhɛ kwa ˗mɔn ˗a ˗bha ˈkwa bhɛɛˈˈ ˗dhɛ ˈˈoo ˗dhɛ ˈgü, ˈˈtʋ̈ŋ ˗suu ˈˈoo ˗su ˈka.
