KALANSEN 09

Delili be se k’i dɛmɛ i k’i magwɛrɛ Ala la

A LAMƐN KAAN NIN NA

I mako b’a la mɔgɔ dɔ k’i bila sira ɲuman kan tuma dɔw la wa? I b’a fɛ u k’i dɛmɛ k’i ka ɲiningali dɔw jaabili sɔrɔ wa? I mako b’a la u k’i dusu saalo wala k’i hakili sigi wa? A bena diya i ye k’i magwɛrɛ kosɔbɛ Jehova la wa? Delili be se k’i dɛmɛ o koow bɛɛ la. Nka delili kɛcogo juman lo bɛnnin be Ala ma? Ala be deliliw bɛɛ lamɛn wa? I be se ka mun lo kɛ walisa Ala k’i ka deliliw lamɛn? An k’o lajɛ.

1. An ka ɲi ka jɔn lo deli ani an be se ka delili kɛ mun lo koo la?

Yezu y’a fɔ ko an ka ɲi k’an sankolola Faa dɔrɔn lo deli. Yezu yɛrɛ ye Jehova lo deli. A y’a fɔ ko: “Aw ka kan ka Ala daali cogo min na, o filɛ: ‘An Faa min be sankolo la . . . ’ ” (Matiyo 6:9). N’an be Jehova deli, teriya min be an n’ale cɛ, o be fanga sɔrɔ.

An be se ka Ala deli koo caaman na. Nka n’an b’a fɛ Ala k’an ka deliliw lamɛn, fɔɔ an k’a deli ka kɛɲɛ n’a sago ye. “N’an ye fɛɛn o fɛɛn daali Ala fɛ, n’o kɛra a sago ye, an jigi b’a la ko a be mɛnni kɛ an fɛ.” (1 Zan 5:14). An be se ka Ala deli fɛɛn minw koo la, Yezu y’u dɔw kofɔ (Matiyo 6:9-13 kalan). An mako be min na, an be se ka Ala deli o koo la. Nka an kana ɲinɛ ka barika la a ye fana a ka ɲumanya kosɔn ani k’a deli a ka tɔɔw dɛmɛ.

2. An ka ɲi ka delili kɛ cogo di?

Bibulu b’an jija ko an k’an “jusukunnakow bɛɛ fɔ [Ala] ye.” (Zaburuw 62:9, Biblu Ala ta kuma). O la, an ka ɲi k’an kɔnɔ gwɛ ka delili kɛ n’an dusu bɛɛ ye. An be se k’an kaan kɔrɔta ka delili kɛ wala an be se ka delili kɛ an kɔnɔ. An be se ka sigi, ka biri, ka ɲɔngiri wala ka lɔ walisa ka Jehova deli, a daan ye an k’o kɛ ni bonya ye. An be se ka Jehova deli yɔrɔ bɛɛ ani wagati min k’an diya.

3. Ala b’an ka deliliw jaabi cogo di?

A b’o kɛ cogo caaman na. A y’a ka Kuma lase an ma, o min ye Bibulu ye. An ka teli k’an ka ɲiningaliw jaabili sɔrɔ o kɔnɔ. Ka Ala ka Kuma kalan, o be “lɔnniya di kolɔnbali ma.” (Zaburuw 19:8; Vɛrise nin kalan: Zaki 1:5). Ni gwɛlɛyaw b’an kan, Ala be se k’an dɛmɛ an k’an hakili sigi. A be se fana k’a sagokɛla dɔw lasun u k’an dɛmɛ n’an mako be dɛmɛ na.

A ƝINI KA DƆ LƆN TUGUN

An k’a filɛ delili sifa minw ka di Ala ye ani delili be se k’an nafa cogo min na.

4. Mun lo ben’a to Ala b’an ka deliliw lamɛn?

Mun lo be se k’a to Ala be sɔn an ka deliliw la wala a be ban u la? A’ ye VIDEWO filɛ.

VIDEWO: Yala Ala be deliliw bɛɛ lamɛn wa?—A yɔrɔ dennin dɔ (2:42)

Jehova b’a fɛ an k’ale deli. Zaburuw 65:3 kalan. O kɔ, a’ ye ɲiningali nunu kɛ ani ka baro kɛ u kan:

E ka miiri la, Ala b’a fɛ ka e ka ‘deliliw mɛn’ wa? Mun na i ko ten?

N’an b’a fɛ Ala k’an ka deliliw lamɛn, fɔɔ an k’an jija k’a ka sariyaw labato. Mise 3:4 ani 1 Piyɛri 3:12 kalan. O kɔ, a’ ye ɲiningali nin kɛ ani ka baro kɛ o kan:

An be se ka mun lo kɛ walisa Jehova k’an ka deliliw lamɛn?

Kɛlɛ tuma na, jɛnkulu kelen kelen bɛɛ be delili kɛ walisa ka se tɔɔ kelen kɔrɔ. Yala a bɛnnin lo an k’a miiri ko Ala bena o deliliw jaabi wa?

5. Min b’an kɔnɔ, an ka ɲi k’o lo fɔ Ala ye

U ye dɔw kalan delili dɔw la ani u y’a fɔ u ye k’u ka ɲi k’o lo fɔ tigitigi. Nka Ala b’a fɛ an k’a deli o cogo lo la wa? Matiyo 6:7 kalan. O kɔ, a’ ye ɲiningali nin kɛ ani ka baro kɛ o kan:

An be se ka mun lo kɛ walisa an “kana segi kuma kelen kan siɲɛ caaman” an ka deliliw la?

Loon o loon, miiri k’a filɛ Jehova ye koo tigitigi min kɛ i ye, ani a fo o kosɔn. N’i tora k’o kɛ loon o loon, lɔgɔkun kelen kɔnɔ i bena delili kɛ koo wolonfila koo la. O la, i tɛna kuma kelen fɔ tuma bɛɛ.

Faa ɲuman b’a fɛ a deen k’a kɔnɔkow lo fɔ a ye. O cogo kelen na, Jehova b’a fɛ an

k’an kɔnɔkow lo fɔ a ye.

6. Delili ye Ala ka nilifɛn dɔ ye

Delili be se k’an dɛmɛ cogo di ka fanga sɔrɔ, sanko gwɛlɛya wagati la? VIDEWO nin filɛ.

VIDEWO: Delili b’an dɛmɛ ka gwɛlɛyaw muɲu (1:32)

Bibulu b’a yira ko delili be se k’an dɛmɛ an k’an hakili sigi. Filipikaw 4:6, 7 kalan. O kɔ, a’ ye ɲiningali nunu kɛ ani ka baro kɛ u kan:

Tiɲɛn lo ko delili t’a kɛ tuma bɛɛ an ka gwɛlɛyaw be ban. O bɛɛ n’a ta, delili b’an dɛmɛ. Cogo di do?
E b’a fɛ ka delili kɛ mun lo koo la?

I b’a lɔn wa?

N’u ko “Amiina,” o kɔrɔ ko “o lo cɔ” wala “Ala k’o kɛ.” Bibulu b’a yira ko kabi wagatijan, ni Ala sagokɛlaw ye delili kɛ ka ban, u b’a fɔ ko “amiina.”—1 Tilew Kibaru 16:36.

7. Wagati ɲini ka delili kɛ

Tuma dɔw la, an bolo degunnin lo fɔɔ an be ɲinɛ ka delili kɛ. Delili koo tun ka gwɛlɛ Yezu ma. Cogo di do? Matiyo 14:23 ani Mariki 1:35 kalan. O kɔ, a’ ye ɲiningali nunu kɛ ani ka baro kɛ u kan: