UKPEPN̄KPỌ 09
Akam Ayanam Fi Enen̄ede Ekpere Abasi
Ndi akananam omoyom owo eteme fi se akpanamde? Ndi enyene mbụme oro akpamade ndidiọn̄ọ ibọrọ? Ndi omoyom ndọn̄esịt? Ndi omoyom ẹnọ fi idotenyịn? Ndi akpama ndinen̄ede n̄kpere Jehovah? Akam ekeme ndinam kpukpru oro nnọ fi. Edi owo ọkpọbọn̄ akam didie man Abasi okop? Ndi kpukpru akam ke Abasi esikop? Nso ke akpanam man enye esikop akam fo? Yak ise ise.
1. Anie ke ikpọbọn̄ akam inọ, ndien nso ye nso ke ikeme ndisịn ke akam?
Jesus ọkọdọhọ isibọn̄ akam inọ Ete nnyịn eke heaven. Enye ke idemesie ekesibọn̄ akam ọnọ Jehovah. Enye ọkọdọhọ ete: “Mbufo ẹbọn̄ akam ntem, ndien, ẹte: ‘Ete nnyịn emi odude ke heaven . . . ’” (Matthew 6:9) Nte ibọn̄de akam inọ Jehovah, ntre ke idinen̄ede ikpere enye.
Imekeme ndibọn̄ akam mban̄a n̄kpọ ekededi. Abasi oyokop akam nnyịn amakam edi akam nnyịn ekem ye uduak esie. 1 John 5:14 ọdọhọ ke “Se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.” Jesus ama ekpep nnyịn ndusụk n̄kpọ ikpesibọn̄de akam iban̄a. (Kot Matthew 6:9-13.) Imekeme ndibọn̄ akam mben̄e Abasi se iyomde, edi ana isikọm enye n̄ko ke se enye anamde ọnọ nnyịn isinyụn̄ isịn mbon en̄wen ke akam.
2. Ikpesibọn̄ akam didie?
Bible ọdọhọ ete: “Ẹn̄wan̄a esịt mbufo ẹnọ enye.” (Psalm 62:8) Ọwọrọ ke ana akam nnyịn oto nnyịn esịt. Imekeme ndibọn̄ akam uyo ọwọrọ, imekeme ndibọn̄ ke esịt, edi ana ibọn̄ ukpono ukpono m̀mê idada, m̀mê itetie, m̀mê itọtọn̄ọ edọn̄. Imekeme ndibọn̄ akam ini ekededi ye ke ebiet ekededi.
3. Didie ke Abasi esibọrọ akam nnyịn?
Jehovah Abasi esibọrọ akam ke nsio nsio usụn̄. Enye ọnọ nnyịn Ikọ esie, ndien ediwak ini imesikụt ibọrọ akam nnyịn do. Ndikot Ikọ Abasi esinam owo enyene ọniọn̄. (Psalm 19:7; kot James 1:5.) Abasi ekeme n̄ko ndinam esịt nnyịn ana sụn̄ ke ini mfịna. Enye onyụn̄ ekeme ndida ikọt esie n̄n̄wam nnyịn.
SỊN IDEM KPEP
Se nte ekemede ndibọn̄ akam emi otode fi esịt, ye nte akam ekemede ndin̄wam fi.
4. Enyene se idinamde Abasi okop akam nnyịn
Nso ikeme ndinam Abasi okop akam owo m̀mê okûkop? Se VIDIO emi.
Jehovah oyom isibọn̄ akam inọ imọ. Kot Psalm 65:2, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ndi emekere ke “Andikop akam” oyom fi ọbọn̄ akam ọnọ imọ? Nso inam ọdọhọ ntre?
Ana idu uwem nte Abasi amade man enye esikop akam nnyịn. Kot Micah 3:4 ye 1 Peter 3:12, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ke ana inam man Jehovah esikop akam nnyịn?
Ke ini ekọn̄, mbonekọn̄ n̄kan̄ mbiba ke ẹbọn̄ akam ẹte Abasi anam mmimọ ikan. Ndi emekere ke Abasi oyokop utọ akam oro?
5. Akpana akam nnyịn oto nnyịn esịt
Ediwak owo ẹmụm nsio nsio akam ẹdọn̄ ke ibuot. Akam oro ke mmọ ẹsitịn̄ ẹma ẹyom ndibọn̄ akam. Ndi se Abasi oyomde edi oro? Kot Matthew 6:7, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ke akpanam mbak udûsuyịre utịn̄ ukem n̄kpọ ke ini ọbọn̄de akam?
Kpukpru usen, yom n̄kpọ kiet emi Jehovah anamde ọnọ fi kọm enye. Akpanam ntre kpukpru usen, oyokụt ke ofụri urua kiet ke akam fo ediban̄a nsio nsio n̄kpọ.
Eti ete esiyom eyen esie etịn̄ se isịnede enye ke esịt ọnọ imọ. Jehovah esiyom akam nnyịn oto nnyịn esịt
6. Edi n̄kpọ ukpono Abasi ndiyak nnyịn ibọn̄ akam inọ enye
Didie ke akam ekeme ndin̄wam nnyịn ini n̄kpọ ọfọnde ye ini n̄kpọ ọdiọkde? Se VIDIO emi.
Bible etịn̄ ke akam ekeme ndinam esịt ana nnyịn sụn̄. Kot Philippi 4:6, 7, ekem ẹbọrọ mbụme emi ẹnyụn̄ ẹneme ẹban̄a mmọ:
-
Didie ke akam esin̄wam nnyịn idem ke ini mfịna nnyịn mîkụreke?
-
Nso ye nso ke edima ndisịn ke akam fo?
Ndi ọmọdiọn̄ọ?
“Amen” emi isisịnde ke akam ọwọrọ, “yak edi ntre.” Idem mme owo ke Bible ẹma ẹsisịn “amen” ke utịt akam. —1 Chronicle 16:36.
7. Kûfre ndibọn̄ akam
Ndusụk ini n̄kpọ ekeme ndiyọhọ nnyịn ibuot tutu nnyịn ifre ndibọn̄ akam. Jesus ekesida akam didie? Kot Matthew 14:23 ye Mark 1:35, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ke Jesus ekesinam man enye okûfre ndibọn̄ akam?
-
Ini ewe idifọn ye afo ndibọn̄ akam?
NDUSỤK OWO ẸSIDỌHỌ ẸTE: “Akam inyeneke ufọn.”
-
Nso ke ọkpọbọrọ utọ owo oro?
SE IKPEPDE
Akam ofụri esịt ekeme ndinam inen̄ede ikpere Abasi, anam esịt ana nnyịn sụn̄, onyụn̄ an̄wam nnyịn inam se Jehovah amade.
Se M̀mê Emeti
-
Anie ke ikpesibọn̄ akam inọ?
-
Ikpesibọn̄ akam didie?
-
Didie ke akam esin̄wam owo?
KPEP N̄KPỌ EN̄WEN
Se ibọrọ nsio nsio mbụme emi ediwak owo ẹsibụpde ẹban̄a akam.
“N̄kpọ Itiaba Oro Anade Ọfiọk Aban̄a Akam” (Enyọn̄-Ukpeme, October 1, 2010)
Se ntak oro ekpesibọn̄de akam ye se akpanamde man akam fo esito fi esịt.
Se nnennen owo emi Bible ọdọhọde isibọn̄ akam inọ.
Ke ikwọ emi, se ise m̀mê ini ye ebiet emi owo ọbọn̄de akam edi akpan n̄kpọ.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
