AYÈGÈ 09

Ngogelen é ne bò na amvoé doé ai Zamba a yem ngul

VOGOLO A

Ye é kuiya wò na feg ya dzang wò éyòng o tele étié zing? Ye wò yi na wò yem biyalen ya minsili mizing? Ye wò yang’en ai awono? Ye wò yi na wò subu Yéhova babi? Ngogelen é ne wò dzam vòli na o dzali meyang’en moé meté. Veda akia afé o ne tuene kogelen? Ye Zamba a vogolo fò mengogelen mese? Dzé o ne dzam bò asu yi na Zamba a vogolo mengogelen moé? Bia yi yalen minsili mité ayègè di.

1. Za bia yeane kogelen ai nyè ai asu mam mefé?

Yésus a nga yegele na Tara waan ya yob, Yéhova, nnye étam bia yeane kogelen ai nyè. É ne é dzom émen a nga bò. A nga dzo na: “Éye mi karege kogelen na: ‘A Tara waan o ne a yob . . . ’” (Matéus 6:9). Éyòng bia kogelen ai Yéhova, nala a vòli na amvoé daan ai nyè a tòbò ngul.

Bi ne dzam kogelen asu dzom ése. Mbol yi na Zamba a vogolo bia, é dzom ése bia dzaa nyè ya yeane toben ai nyien woé. A nga dzo na “nge bi dzaa nyè dzom a nyien woé [Zamba], a wog bia” (1 Yohannes 5:14). Yésus a nga ve bia memvulna ya é mam bi ne dzam sili a ngogelen (Lang’a Matéus 6:9-13). Bi ne kogelen asu é mam ma bebe bia, veda te bia vuen ve Zamba ngang asu é mam a bò asu daan. Bi ne fe kogelen asu é bot bevòk.

2. Akia afé bia yeane kogelen?

Bibel a yegele bia na “bi soé minnem miaan asu [Zamba]” (Salmen 62:8). Ndò fe mengogelen maan ma yeane bi sò a nnem. Bi ne dzam kogelen abog ase ai vom ose, a yob été ngeki a menying. Bi ne fe tebe akia étié ése veda bi bò dò ai dzin.

3. Akia afé Zamba a yalen mengogelen maan?

A bò dò ai abui mezen. Yéhova a nga ve bia Ébug dzié, Bibel, é vom ya bia kòb biyalen ya minsili miaan. Éyòng bia lang kalara Zamba nala a vòli bi na “[bi bò] mimfefeg” (Salmen 19:7; Lang’a Yakòbus 1:5). A ne bi dzam ve mvòè ya nsisim éyòng bia toben ai mindzug. A ne fe tindi bebò bisié boé na be vòli bia éyòng bi ne a meyang’en.

TUENE FAG

Yene akia mengogelen mefé ma fû Zamba nnem ai akia afé ngogelen é ne bi bò nfi.

4. Dzé bi ne dzam bò asu yi na Zamba a vogolo mengogelen maan

Mam mefé me ne bò na Zamba a vogolo mengogelen maan ngeki na a bò tegè mò vogolo? Bebege VIDÉO.

VIDÉO: Ye Zamba a vogolo mengogelen mese?—Étun (2:42)

Yéhova a yi na bi kogelen ai nyè. Lang’a Salmen 65:2 ai yalen minsili mi tsaa mi:

Ye wò tsog na “Ényò a wog ngogelen” a yi na o kogelen ai nyè? Asu dzé?

Mbol yi na Zamba a vogolo mengogelen maan, bia yeane ve mengul na bi wulu ane mezen moé me ne. Lang’a Mikéa 3:4 ai 1 Pétrus 3:12 ai yalen a nsili hi:

Dzé bia yeane bò asu yi na Yéhova a vogolo mengogelen maan?

Abog bita, nkan bita ose wa kare kogelen asu yi na o dang. Ye bi ne tsog na Zamba a yi wog kan mengogelen meté?

5. Mengogelen maan ma yeane sò a nnem

Abui bot a nga yègè na ba yeane bâlen bibug mengogelen nge a belen mengogelen bot befe be nga man til. Ve, ye akia té nde Zamba a yi na bot be kogelen ai nyè? Lang’a Matéus 6:7 ai yalen a nsili hi:

Akia afé o ne bò te bâlen “dzam deda biyòng biyòng” a mengogelen moé?

Amos ose, tsogo é dzam a ne mbeng a he kui wò ai vaa Yéhova ngang. Nge wò bò nala amos ose a tang nguma sòndò, o kogeleneya asu mam zamgba a me ne kan kan, nala a nga bò na o tege fe bare bâlen dzam deda.

Ésia a yi na mòn woé a lèè ai nyè ai nnem woé ose. Akia deda, Yéhova a yi na bi kogelen ai nyè ai nnem waan ose

6. Ngogelen é ne éfaa ya sò abe Zamba

Akia afé ngogelen é ne bi dzam ve ngul abog mindzug ngeki abog mintak? Bebege VIDÉO.

VIDÉO: Ngogelen é ne bi vòli na bi dzibi ndzug zing (1:32)

Bibel a kaa bi na ngogelen é ne bi dzam vòli na bi bi évovoé a nnem. Lang’a Filippi 4:6, 7 ai yalen minsili mi tsaa mi:

Tò ane ngogelen ya vaa ki mindzug miaan, ve akia afé é ne bi vòli?
Asu mam mefé wò yi na wò kogelen?

Ye o mbe yeme dò?

Ébug “amen” ya tilen na “a bòben akia o he dzo” ngeki “a tòbega nala.” Bibel a lere na oyab melu ya mvus, bebò bisié be Yéhova be karege fala ébug “amen” a mesuu me ngogelen (1 Kronika 16:36).

7. Karege nòng abog ya kogelen

Da kui biyòng bizing na mbol bi bele abui mam ya bò, bia vuen ngogelen. Abim afé ngogelen é nga be nfi asu Yésus? Lang’a Matéus 14:23 ai Markus 1:35 ai yalen minsili mi tsaa mi:

Dzé Yésus a mbe bò asu yi na a bi abog ya kogelen?
Abog afé o ne dzam kogelen?

ABUI BOT DA DZO NA: “Ngogelen é ne édzèè abog amu mot zing a vogolo ki dzò.”

Mfaa woé wò yen ya?

OBALBAS

Mengogelen ma sò a nnem me ne mbeng, ma yemede fe élat dzaan ai Zamba, ma ve bia évovoé a nnem ai é ngul bia yang’en ai dzò asu yi na bi fû Yéhova nnem.