ADZESUA 09
Mpaabɔ Bɛma Atwe Abɛn Nyankopɔn
Aso ɔyɛ a etse nka dɛ ihia akwankyerɛ bi wɔ w’asetsena mu? Ana epɛ nsɛmbisa ahorow bi a no ho hia wo no ho mbuae? Ihia awerɛkyekyer anaa dzenhyɛ bi? Ana ebɛpɛ dɛ etwe bɛn Jehovah? Mpaabɔ botum aboa wo ma wo nsa aaka dɛm ndzɛmba ahorow yi nyina. Naaso kwan pa a ɔsɛ dɛ yɛfa do bɔ mpaa no nye dɛn? Aso mpaabɔ nyina na Nyankopɔn tsie? Ebɛnadze na ibotum ayɛ ama Nyankopɔn eetsie wo mpaabɔ? Ma yɛnhwɛ ɛ.
1. Woana na ɔsɛ dɛ yɛbɔ no mpaa, na ebɛnadze na yebotum abɔ ho mpaa?
Jesus kyerɛkyerɛɛ dɛ yɛmbɔ hɛn sor Egya no nkotsee mpaa. Jesus nankasa bɔɔ Jehovah mpaa. Ɔkaa dɛ: “Dɛm ntsi hom [mbɔ mpaa] dɛ iyi: Hɛn Egya a ewɔ sor . . .” (Matthew 6:9) Sɛ yɛbɔ Jehovah mpaa a, yɛhyɛ yɛnye no ntamu anyɛnkofa no mu dzen.
Yebotum abɔ dza ohia hɛn biara no ho mpaa. Naaso, sɛ Nyankopɔn betsie hɛn mpaabɔ a, ɔwɔ dɛ mpaabɔ no nye ne pɛ hyia. ‘Sɛ yɛserɛ biribiara dɛ mbrɛ Nyankopɔn pɛ a, otsie hɛn.’ (1 John 5:14) Jesus kyerɛɛ hɛn ndzɛmba ahorow bi a ɔfata a yebotum abɔ ho mpaa. (Kenkan Matthew 6:9-13.) Sɛ yɛrobɔ ndzɛmba a ohia hɛn no ho mpaa a, onnyi dɛ hɛn werɛ fir so dɛ yɛbɛda Nyankopɔn ase wɔ ndzɛmba a ɔayɛ ama hɛn no ho, na ɔwɔ dɛ yɛbɔ mpaa serɛ no dɛ ɔmboa afofor so.
2. Ebɛn kwan na ɔwɔ dɛ yɛfa do bɔ mpaa?
Bible no tu hɛn fo dɛ “[yenhue] hɛn akoma ngu [Nyankopɔn] enyim.” (Ndwom 62:8) Ntsi sɛ yɛrobɔ mpaa a, ɔwɔ dɛ yefi hɛn akoma mu kasa. Yebotum ebu ntwɛr, atsena ase anaa yeegyina hɔ wɔ ɔkwan biara a ɔkyerɛ obu do abɔ Jehovah mpaa, na yebotum ebue hɛn ano abɔ mpaa anaa yebotum abɔ wɔ hɛn tsirmu. Yebotum abɔ mpaa aber biara wɔ beebiara.
3. Nyankopɔn si dɛn bua hɛn mpaabɔ?
Nyankopɔn bua hɛn mpaabɔ wɔ akwan pii do. Jehovah dze n’Asɛm Bible no ama hɛn, na mpɛn pii no, yenya hɛn nsɛmbisa ahorow ho mbuae wɔ mu. Bible ne kenkan botum ama ‘obi a noho nnkokwaa no ayɛ onyansafo.’ (Ndwom 19:7; kenkan James 1:5.) Sɛ yehyia ɔhaw a, Nyankopɔn botum ama hɛn asomu aadwe hɛn. Afei, sɛ yehia mboa bi ankasa a, obotum ama n’asomfo aboa hɛn.
PƐNSAPƐNSA MU KƆ EKYIR
Yebosusu mbrɛ ibotum efi w’akoma mu abɔ mpaa a ɔsɔ Nyankopɔn enyi ho, na yaahwɛ mbrɛ mpaabɔ botum aboa wo.
4. Nyankopɔn hwehwɛ dɛ yɛyɛ biribi ana oeetsie hɛn mpaabɔ
Ebɛn ndzɛmba na ɔma yehu dɛ Nyankopɔn betsie hɛn mpaabɔ anaa orinntsie? Ma yɛnhwɛ VIDEO no.
Jehovah pɛ dɛ yɛbɔ no mpaa. Ma yɛnkenkan Ndwom 65:2, na yensusu nsɛmbisa a odzidzi do yi ho:
-
Isusu dɛ ‘Nyia otsie mpaayi’ no pɛ dɛ ebɔ no mpaa? Ebɛnadze ntsi na ereka dɛm?
Sɛ yɛpɛ dɛ Nyankopɔn tsie hɛn mpaabɔ a, ɔwɔ dɛ yɛdze n’akwankyerɛ bɔ hɛn bra. Ma yɛnkenkan Micah 3:4 nye 1 Peter 3:12, na yensusu asɛmbisa yi ho:
-
Sɛ yɛpɛ dɛ Jehovah tsie hɛn mpaabɔ a, ohia dɛ yɛyɛ dɛn?
Wɔ akodzi mu no, afa ebien a worikedzi ako no nyinara botum abɔ mpaa dze ahwehwɛ konyimdzi. Ehwɛ a, yebotum aka dɛ Nyankopɔn betsie hɔn mpaabɔ no?
5. Ɔwɔ dɛ yefi hɛn akoma mu bɔ mpaa
Nyimpa binom wɔ hɔ a wɔaka akyerɛ hɔn dɛ wɔnse mpaabɔ pɔtsee bi aber biara. Naaso ana dɛm kwan yi na Nyankopɔn pɛ dɛ yɛfa do bɔ no mpaa? Ma yɛnkenkan Matthew 6:7, na yensusu asɛmbisa yi ho:
-
Yebesi dɛn ekwetsir dɛ yɛbɛyɛ “kasansanmu gyan” anaa yɛbɛka nsɛm kor no ara mpɛn pii wɔ hɛn mpaabɔ mu?
Da biara, ibotum adwendwen adze pɔtsee bi a Jehovah ayɛ ama wo wɔ w’asetsena mu no ho, na aada no ase wɔ ho. Sɛ eyɛ dɛm da biara dapɛn kor a, ibohu dɛ abɔ ndzɛmba ahorow esuon ho mpaa a annsan annka asɛm bi a aka no dada.
Egya pa biara pɛ dɛ ne ba fi n’akoma mu nye no kasa. Dɛmara so na Jehovah pɛ dɛ yefi hɛn akoma mu bɔ no mpaa
6. Mpaabɔ yɛ akyɛdze bi a ofi Nyankopɔn hɔ
Mpaabɔ besi dɛn aboa hɛn, nkanka wɔ ber a ndzɛmba nnkɔ yie wɔ hɛn asetsena mu no? Ma yɛnhwɛ VIDEO no.
Bible no ka dɛ mpaabɔ botum ama yeenya asomdwee ankasa. Ma yɛnkenkan Philippifo 4:6, 7, na yensusu nsɛmbisa a odzidzi do yi ho:
-
Ɔwɔ mu dɛ nnyɛ aber nyina na mpaabɔ yi hɛn haw ahorow fi hɔ dze, naaso ebɛn kwan do na ɔboa hɛn?
-
Ebɛn ndzɛmba dɛm na ebɛpɛ dɛ ebɔ ho mpaa?
Ana Inyim?
Kasafua “amen” kyerɛ dɛ “ɔnyɛ hɔ” anaa “ɔmbra mu.” Ofitsi Bible mber mu no, wɔka “amen” wɔ mpaabɔ n’ewiei.—1 Mbermunsɛm 16:36.
7. Nya ber ma mpaabɔ
Ɔtɔfabi a ndzɛmba gye hɛn ber araa ma hɛn werɛ fir mpo dɛ yɛbɔbɔ mpaa. Nna ebɛn kwan do na mpaabɔ ho hia Jesus? Ma yɛnkenkan Matthew 14:23 nye Mark 1:35, na yensusu nsɛmbisa a odzidzi do yi ho:
-
Ebɛnadze na Jesus yɛe ama oeenya ber abɔ mpaa?
-
Ibesi dɛn enya ber ama mpaabɔ?
BINOM KA DƐ: “Nyankopɔn kyɛr ana oebua hɛn mpaabɔ.”
-
Edwen ho dɛn?
DZA ESUA
Sɛ yefi hɛn akoma mu bɔ mpaa a, ɔma yɛtwe bɛn Nyankopɔn, ɔma hɛn asomu dwe hɛn, na ɔma yenya ahoɔdzen dze som Jehovah.
Mbobɔdo
-
Woana na ɔwɔ dɛ yɛbɔ no mpaa?
-
Ebɛn kwan na ɔwɔ dɛ yɛfa do bɔ mpaa?
-
Mfaso ahorow a ɔwɔ mpaabɔ do no bi nye dɛn?
HWEHWƐ PII KA HO
Hwɛ mpaabɔ ho nsɛmbisa a nkorɔfo taa bisa no ho mbuae.
“Ndzɛmba Esuon Bi A Ɔsɛ Dɛ Ihu Fa Mpaabɔ Ho” (Ɔweɔn-Aban, October 1, 2010)
Hwɛ siantsir ahorow a ohia dɛ ebɔ mpaa, nye mbrɛ ibotum ama wo mpaabɔ eetu mpon.
“Ebɛnadze Ntsi Na Ɔsɛ Dɛ Mobɔ Mpaa?” (Asɛm bi a ɔwɔ wɛbsaet do)
Hwɛ dza Bible no kyerɛkyerɛ fa obi a ɔwɔ dɛ yɛbɔ no mpaa no ho.
“Ana Ɔsɛ Dɛ Mobɔ Ahotseweefo Mpaa?” (Asɛm bi a ɔwɔ wɛbsaet do)
Wɔ ndwom a wɔayɛ no video yi mu no, hwɛ dɛ beebi a yɛbɔbɔ mpaa nye ber a yɛbɔbɔ mpaa no ho hia anaa.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
