TOƁƁERE 09

Ɓadee Alla e hoore toragol mo

LECTURE

On miijike hay ɲannde wootere hiɗon hatonjini ɗoweede e ngurndan mon ɗan ? Hiɗon mari lanndaale hittuɗe ɗe faaleteɗon heɓude jaabaaji fii mun ? Hiɗon hatonjini multeede maa okkeede wakkilaare ? Hiɗon faalaa ɓadaade Yahuwah Alla ko ɓuri nii ? Toraare no waawi on wallude fii fow. Kono ko honno haanirɗen toraade Alla ? Alla no heɗoo toraaje ɗen fow ? Ko honɗun waɗoton fii no Alla heɗoroo toraaje mon ɗen ? Ndee toɓɓere jannay en fii mun.

1. Ko hommbo haanuɗen toraade e fii honɗun ?

Annabaaɓe wa Nuuhu, Ibraahiima, Muusa e Daawuuda torotono Yahuwah Alla. E piide misal, annabi Daawuuda torino : « Yaa an Yahuwah, heɗo toraare an nden » (Zabuura 143:1). Si en torike Yahuwah Alla en tiiɗinay weldigal men ngal e makko.

Hiɗen waawi toraade Yahuwah Alla kala huunde ko yaadi e faale makko. Si en waɗii ɗun, o jaaboto toraaje men ɗen. Deftere Alla nden wi’i : « si en torike mo goɗɗun ko yaadi e faale makko on, o heɗoto en » (1 Yuuhanna 5:14). Annabi Iisaa hollii en mise fii piiji ɗi haanuɗen toraade fii mun (janngee Matta 6:9-13). Hiɗen waawi toraade Alla fii kala huunde, hara en yejjitaali jarnugol mo fii kala ko o waɗani en e toroo mo kadi ballal fii woɓɓe goo.

2. Ko honno haanuɗen tororde Alla ?

Deftere Alla nden wakkilinay en ‘udditangol Alla ɓernde men nden’ (Zabuura 62:8 [62:9, VPFJ]). Hiɗen haani tororde ɓernde laaɓunde. Hiɗen waawi tororde Alla hito toowungo maa ka ɓernde men. En toroto mo hay si hiɗen jiccii, darii maa jooɗii, kono ko ɓuri hittude kon, ko tororgol mo teddungal. Hiɗen waawi mo toraade saa’i woo e kala ka wonuɗen.

3. Ko honno Alla jaaborto toraaje men ɗen ?

Himo jaabora en e nooneeji buy. Yahuwah Alla okkii en Daaluyee makko on ka waaweten heɓude jaabaaji fii lanndaale men ɗen. Janngugol Deftere Alla nden no « okka komooɓe hakkil » (Zabuura 19:7 [19:8, VPFJ] ; janngee Yaaquuba 1:5). O okkay en ɓuttu-ɓernde si en heɓii satteendeeji. O wakkilinay jiyaaɓe makko ɓen fii wallugol en saa’i mo hatonjiniɗen.

LUGGINEE

Honno torortoɗen Alla no o yiɗiri e fii honɗun toragol Alla no moƴƴani en ?

4. Alla heɗoto toraaje men ɗen si en torike mo no haaniri

Ko honno haanuɗen tororde Alla fii no o heɗoroo toraaje men ɗen ? Fijinee VIDIO on.

VIDIO : Ko toraaje ɗen fow Alla heɗotoo ? (Suutannde) (2:42)

Yahuwah Alla no faalaa yo en toro mo. Janngee Zabuura 65:2 (65:3, VPFJ) e yewton fii ɗee lanndaale :

E miijo mon, Alla no faalaa ‘heɗaade toraaje mon ɗen’ ? Fii honɗun ?

Si hiɗen faalaa yo Alla heɗo toraaje men ɗen, hiɗen haani wakkilaade teddingol laawi makko ɗin. Janngee Mikaa 3:4 e 1 Petruusu 3:12 e yewton fii ngal lanndal :

Ko honɗun haanuɗen waɗude fii no Alla heɗoroo toraaje men ɗen ?

E saa’i gere, senngo kala toroto Alla fii foolugol. Kono hiɗon miijii Alla jaaboto sifa ɗee toraaje ?

5. Hiɗen haani tororde Alla ɓernde men nden fow

Fii toragol Alla, woɓɓe goo no janna fillitagol haalaaji gooti maa wowlugol haalaaji ɗi ɓe faamataa. Kono ko non Alla faaliraa yo en toro mo ? Janngee Matta 6:7 e yewton fii ngal lanndal :

Ko honno gerdirton fii ‘wota on fillito soono woo haalaaji gooti’ e toraaje mon ɗen ?

Ɲannde woo, miijitee fii huunde moƴƴunde ko heɓi on. Ontuma jarnon Yahuwah Alla fii ɗun. Si on waɗii ɗun ɲannde woo e nder yontere, haray on torike fii piiji jeeɗiɗi sertuɗi hara on fillitaaki huunde wootere.

Baabaajo moƴƴo no faalaa yo ɓiɗɗo makko on wowlan mo fii piiji iwruɗi ka ɓernde makko. Ko wano non kadi, Alla no faalaa yo en yewtu mo fii piiji wonuɗi ka ɓernde men.

6. Toraare ko dokkal Alla

Ko honno heɓirten doole e hoore toragol Alla tentinii e saa’i sattuɗo ? Fijinee VIDIO on.

VIDIO : Toraare wallay en muɲɲagol satteendeeji men ɗin (1:32)

Deftere Alla nden no fodi, si en torike Alla, en waaway heɓude ɓuttu-ɓernde ko timmi. Janngee Filipii 4:6, 7 e yewton fii ɗee lanndaale :

Hay si toraare jittataa satteendeeji men ɗin soono woo, ko honno nde waawirta en wallude ?
Ko fii piiji honɗi faaleteɗon toraade ?

Hari hiɗon anndi ?

Innugol « aamiina » no firi « yo wonir non » maa « ko non tigi ». Gila ko neeɓi, Deftere Alla nden no holli rewooɓe Alla ɓen no wi’a « aamiina » ka lannoode toraaje maɓɓe (Zabuura 41:13 [41:14, VPFJ]).

7. Waɗee saa’i toragol Alla ko adii kon

Wonnde haray hiɗen mari piiji buy ko waɗeten haa yejjiten toragol Alla. Ko honno toraare hittirannoo annabi Iisaa ? Janngee Matta 14:23 e Markuusa 1:35 e yewton fii ɗee lanndaale :