REIREI 09

Kaania te Atua n te Tataro

KAMAIUA

Ko a tia n nanamakina kainnanoan te kairiri ni maium? Iai am titiraki aika kakawaki aika ko kan atai kaekaaia? Ko kainnanoa te kabebetenano ke te karaunano? Ko kani kaania riki Iehova? E kona ni buokiko te tataro ni baikai. Ma e kangaa raoi aron te tataro? E ongoraei tataro ni kabane te Atua? Tera ae ko na karaoia bwa e aonga n ongoraei am tataro te Atua? Ti na noria.

1. Antai ae ti riai n tataro nakoina, ao tera ae ti kona n tataro ibukina?

E reireinira Iesu bwa ti riai n tataro tii nakon Tamara are i karawa. E tataro naba Iesu nakon Iehova. E taku: “Ma kam riai n tataro n aron aei: ‘Tamara are i karawa . . . ’” (Mataio 6:9) Ngkana ti tataro nakon Iehova, ti a kakorakoraa iai ara iraorao ma ngaia.

Ti kona n tataro ibukini bwaai ni kabane. E riai ni boraoi ma nanon te Atua ara tataro ngkana e na kaekai. “Ngkana ti bubutiia te bwai teuana ae boraoi ma [nanon te Atua] ao e bon ongo iroura.” (1 Ioane 5:14) E katea te katoto Iesu ibukini baika ti riai n tataro ibukia. (Wareka Mataio 6:9-13.) Irarikin tataroakinani baika ti kainnanoi, ti riai naba ni kaitaua te Atua ibukin te baere e a tia ni karaoia ibukira, ao ni butiia bwa e na buokiia tabemwaang.

2. Tera arora n tataro ae riai?

E kaungaira te Baibara bwa ti na ‘bunrii nanora i matan te Atua.’ (Taian Areru 62:8) Ngaia are e riai n nako raoi mai nanora ara tataro. Ti kona n tataro ni kabaibati ke ni karaurau, ao n te aro ae karinerine. Ti kona n tataro n taai ao n taabo nako.

3. Tera aron te Atua ni kaekai ara tataro?

E kaekai n aanga aika kakaokoro. E katauraoa Iehova ana Taeka ae te Baibara, ae ti kona iai ni kakarekei kaekaan ara titiraki. Wawarekan ana Taeka te Atua e kona ni “kawanawana ane e roo nanona.” (Taian Areru 19:7; wareka Iakobo 1:5.) E kona n anganira te raunnano ngkana ti aitara ma kangaanga. Ao e kona ni kabonganaia taan taromauria bwa a na buokira ngkana ti rangi ni kainnanoia.

REIAKINA AE BATI RIKI

Neneria bwa ko na kangaa n tataro n te aro ae kukurei iai te Atua, ao noria bwa e na kangaa ni buokiko te tataro.

4. Iai ana kaetieti te Atua ibukin te tataro

Tera ae e na karika ara tataro bwa e na butimwaeaki iroun te Atua ke e na aki? Kaota te TAAMNEI.

TAAMNEI: E Ongoraei Tataro ni Kabane te Atua?—Mwakorona (2:42)

E tangirira Iehova bwa ti na tataro nakoina. Wareka Taian Areru 65:2, ao maroroakin titiraki aikai:

Ko iangoia bwa e tangiriko te “tia Ongo te tataro” bwa ko na tataro nakoina? Kabwarabwaraa am kaeka.

Ti riai ni maiuakin ana kaetieti te Atua ngkana ti tangiria bwa e na ongoraei ara tataro. Wareka Mika 3:4 ao 1 Betero 3:12, ao maroroakina te titiraki aei:

Ti na kangaa ni koaua bwa e na bon ongoraei ara tataro Iehova?

N tain te buaka, a bae n tataro taanga ni buaka aika uoua ibukin te tokanikai. Ti na kantaningaia bwa e na kaekai tataro aikai te Atua?

5. E riai n nako mai nanora ara tataro

A reireinaki tabeman bwa a na kamatenanoi aia tataro. Ma anne arora n tataro ae tangiria te Atua? Wareka Mataio 6:7, ao maroroakina te titiraki aei:

Ko na kangaa n aki taekin “taeka aika titeboo ni kaokiokii” n am tataro?

Iangoia ni katoabong bwa tera kakabwaiaam teuana ae okoro, ao kaitaua Iehova iai. Ngkana ko iangoa te bae okoro ae ko na kaitaua iai ni katoabong n te wiki, ao ane ko na tataroakin iai baika kakaokoro aika tao itua n aki kaokiokii.

E tangira natina te karo ae tatangira bwa e na taetae nakoina mai nanona. E tangirira naba Iehova bwa ti na tataro nakoina mai nanora

6. Te tataro bon te bwaintangira mairoun te Atua

E na kangaa te tataro ni kakorakoraira, n taai ni kakukurei ao ni kangaanga? Kaota te TAAMNEI.

TAAMNEI: E Kona te Tataro ni Buokira n Taai ni Kangaanga (1:32)

E berita te Baibara bwa e kona te tataro ni buokira ni karekea te raunnano ni koaua. Wareka I-Biribi 4:6, 7, ao maroroakin titiraki aikai:

E ngae ngke e aki katoki ara kangaanga te tataro n taai nako, ma e kangaa n ibuobuoki?
Baikara bwaai tabeua aika ko kan tataro ibukia?

Ko ataia?

Nanon te taeka ae “amen” “ngaia anne.” Ma n taai ake a karakinaki n te Baibara n uaa ngkai, ao e tataekinaki “amen” n tokin te tataro.—1 Rongorongo 16:36.

7. Kamwaawa am tai n tataro

N tabetai ti a rangi n tabetabe, ao ti a mwaninga n tataro. Tera aroni kakawakin te tataro iroun Iesu? Wareka Mataio 14:23 ao Mareko 1:35, ao maroroakin titiraki aikai: