09 NU GÈ NÒ
Tã̀àgã Ló Bàrì É Agẹlẹ Ló O Gbaa Ló Kilma Ló Bàrì
É kọ à íe tṍó ea beè tõó ní ló belí kọọ̀ ò íèè bíi ló tùle? É kọọ̀ à íe gbò bíb ea palàge dú bíi eo gbĩ́ gè nyimá a ààla? É kọ ò íè bíi ló nen ea é nveè ni nyíé gbàà àbèè ge siè ni kpóó ló? É kọ àé léémá ni gè kpáá tõo bã ló Jìhóvà? Tã̀àgã ló Bàrì é láá nvèè bá naa kọọ̀ dénè gbò nuí á valí. Sõò, mósĩ́ deè ní ea bọ́ló kọ é tã̀àgã ló Bàrì e? É kọọ̀ Bàrì ólò aalá tã̀àgã ló kọ̀láá nen? Éé ní ea bọ́ló kọ ó naa kọbé Bàrì áálá o tã̀àgã ló é? Naa mè é ẹb.
1. Mée ní ea bọ́ló kọ é tã̀àgã ló é, vaá éé ní eé láá kọ́ mm̀ bẹẹ tã̀àgã ló é?
Jíízọ̀s beè kọ é tã̀àgã ló áá bẹẹ Tẹ̀ ea di káála. Jíízọ̀s boo a lóó beè tã̀àgã ló Jìhóvà. A beè kọọ̀: “Neenii bé eo é tãagãi ló Bàrì naaniií: ‘Bẹẹ Tẹ̀ eo di káála . . . ’” (Máátìù 6:9) Tṍó e tãàgã ló Jìhóvà, à ólò agẹlẹ ló bẹẹ gbaa ló kìlmàé ló.
Èé láá kọ́ kọ̀láá kà nu nè Bàrì mm̀ tã̀àgã ló. Sõò, kọbé Bàrì láá aalá bẹẹ tã̀àgã ló, àé íè ge gbaaá ló a bùlà. “[Bàrì] ólò dã́i mon kilma ló kọ̀láá kà nú e e banìèé bá vaá à dú nu ea zọ a bùlà gbaaá ló.” (1 Jọ́ọ̀n 5:14) Jíízọ̀s beè kọ́ gbò nú ea bọ́ló kọ é tã̀àgã ló Bàrì kilma ló. (Bugi Máátìù 6:9-13.) Gbáló gè kọ́ bẹẹ gbò bíi nè Bàrì, náa bọ́ló kọ á táí nyíe gè olòó õá Bàrì zaa ló gbò nú ea ni náa nèi vaá bànie kọ á nvèè bá nè dõòna gbò.
2. Móbá ní ea bọ́ló kọ é tã̀àgã ló Bàrì e?
Kpá Káí síèi kpóó ló kọ é ‘kọ́ gbò nú ea dìí nyíe nè [Bàrì].’ (Psalm 62:8) Vóà naa, gbò nú eé kọ́ nè Bàrì á ààí nyíe. Èé láá tã̀àgã ló Bàrì dàlà mon boo àbèè mm̀ bẹẹ nyíe, mm̀ sĩ́deè e bé e tõò naa zógè fã̀ dẽè kilma ló Jìhóvà. Èé láá tã̀àgã ló Bàrì kọ̀láá tṍó nè gbẹá kọ̀láá ketõ̀ò.
3. Mósĩ́ deè ní e Bàrì ólò aalá bẹẹ tã̀àgã ló é?
À ólò aalá bẹẹ tã̀àgã ló mm̀ kele-kele sĩ́deè. Jìhóvà beè nèi a Moǹ Bel ea dú Kpá Káí, ea dú kiẽ́e eé láá mòn ààlaà bẹẹ gbò bíb. Ge bugi Moǹ Bel Bàrì é láá “naa kọọ̀ nen e bè náa nyímá nu á nyimá nu.” (Psalm 19:7; bugi Jém̀z 1:5.) Jìhóvà é néi dĩ̀ìnè ló bùlà tṍó e gé téní bá tã̀àgã̀ mm̀ dùm. Vaá àé láá naa kọọ̀ pá a gyóòlo á nvèè bá nèi tṍó e íè bíi ló nvèè bá.
KPÁÁ NÓ BỌ̀Ọ̀VẸ̀
Nyimá bé eo é láá tã̀àgã ló Bàrì mm̀ sĩ́deè ea é léémáe naa, nè bé e tã̀àgã ló Bàrì é láá dọ̀ bélè nè ni naa.
4. Bàrì kọ́ gbò nú eé náa kọbé à áálá bẹẹ tã̀àgã ló
Gbò éé ní ea é náa kọ Bàrì á aalá bẹẹ tã̀àgã ló àbèè kọ á gá aalá ẹ́? Bìlà VÍDIÒÍ.
Jìhóvà gbĩ́ kọ é tãagã̀èé ló. Bugi Psalm 65:2, vaá ò gbóó aalai gbò bíbví:
-
É kọ ò bulà kọọ̀ ‘Nen ea ólò dã́ tã̀àgã ló’ gbĩ́ kọ ó tãagã̀èé ló? Be ò náa ẽei àbèè ẽ́èe, ló éé?
Be è gbĩ́ì kọọ̀ Bàrì á dã́ bẹẹ tã̀àgã ló, èé íè ge tõó dùm ea gbááá ló gbò a nòòkúu ea di mm̀ Kpá Káí. Bugi Máíkà 3:4 nè 1 Pítà 3:12, vaá ò gbóó aalai nakà bíbví:
-
Éé ní eé láá naa kọbé Jìhóvà áálá bẹẹ tã̀àgã ló é?
Tṍó e bàà kà bon gé béá, buù kà boná ólò tã̀àgã ló Bàrì kọ bàá elìè bá. É kọ à bọ́ló gè ẹ̀bmà dẽe kọọ̀ Bàrì é áálá ene kà gbàà gbò tã̀àgã lóí?
5. À bọ́ló kọ bẹẹ tã̀àgã ló Bàrì á ààí nyíe
Ba beè noòmà sìgà gbò kọ bàá olòó òòa boo enè íb tã̀àgã ló Bàrì lee. Sõò é kọ níà bé e Bàrì gbĩ́ kọ é tãagã̀èé ló naa ẽ́? Bugi Máátìù 6:7, vaá ò gbóó aalai nakà bíbví:
-
Mósĩ́ deè ní eo é láá òòa aa ló gè tení “boo tẽ̀ènè kà bel” tṍó eo gé tãàgã ló Bàrì e?
Buù dee, òó láá kẽ̀èa boo ene kà nú e Bàrì náa nè ni vaá gbóó õáe zaa. Be ò náa vó buù deé mm̀ enè sè, òó tãàgã ló Bàrì boo àlàbà kà kele-kele nu e bè nóo oòa boo tọ́ọ̀ kà.
Lé tẹ̀ ólò gbĩ́ kọ a nvín á kọ́ bé e nu tọ́aẹ́ ló naa neèe. Jìhóvà gbĩ́ kọ é kọ́ bé e nu tọ́aí ló naa neèe mm̀ tã̀àgã ló
6. Tã̀àgã ló Bàrì dú dõ̀ònù ea aa bá Bàrì
Mósĩ́ deè ní e tã̀àgã ló Bàrì é láá nvèè bá nèi tṍó e nu léeí ló, nè tṍó e di kèbá tã̀àgã̀ ẽ? Bìlà VÍDIÒÍ.
Gbò nú ea di mm̀ Kpá Káí zógè kọọ̀ ge tã̀àgã ló Bàrì é láá naa kọ é ié dĩ̀ìnè ló bùlà. Bugi Fílipaì 4:6, 7, vaá ò gbóó aalai gbò bíbví:
-
Náa kal ló béè kọọ̀ tã̀àgã ló Bàrì náa ólò naa kọ bẹẹ tã̀àgã̀ á táí ló dénè tṍó, mósĩ́ deè ní ea ólò nvèè bá nèi ẽ́?
-
Gbò éé ní ea é léémá ni gè tã̀àgã ló Bàrì kilma ló é?
O beè nyimá gé?
Moǹ bel ea kọlà “aamèn” tõó dọ̀ “á dì naa vó.” Lọ̀l gé tṍó e bà géè emí Kpá Káíá, ba beè olòó kọọ̀ “aamèn” tṍó e ba ni tãàgã ló Bàrì lọ̀l. —1 Krónikòl 16:36.
7. Noo tṍó nyòòmà ge tã̀àgã ló Bàrì
Sìgà tṍó, gã́bug nu gè naá mm̀ dùm é láá naa kọ á táí nyíe gè tã̀àgã ló Bàrì. Ge tã̀àgã ló Bàrì beè bọọ́ ló Jíízọ̀s naa vàẹ? Bugi Máátìù 14:23 nè Máàk 1:35, vaá ò gbóó aalai gbò bíbví:
-
Éé ní e Jíízọ̀s beè naa kọbé à láá ié tṍó gè tã̀àgã ló Bàrì e?
-
Mó tṍó ní eo é láá noo nyòòmà ge tã̀àgã ló Bàrì e?
SÌGÀ GBÒ KỌ́Ọ̀: “Ge tã̀àgã ló Bàrì dú pèè tṍó boo béè kọ náa íe nen ea ólò aalá tã̀àgã ló.”
-
Éé ní eo é kọ́ nè va ẹ́?
NÚ E NI NÓ
Tṍó e tãàgã ló Bàrì lọa nyíe, à ólò naa kọ é kpáá tõo bã ló Bàrì, à ólò naa kọ é ié dĩ̀ìnè ló bùlà, vaá à ólò nèi kói gè láá naamá nú ea é léémá Jìhóvà.
Ge Òòa Boo
-
Mée ní ea bọ́ló kọ é tã̀àgã ló é?
-
Móbá ní ea bọ́ló kọ é tã̀àgã ló Bàrì e?
-
Mókà gbò bélè ní eé íe lọl ló gè tã̀àgã ló Bàrì e?
KPÁÁ GBĨ́ TẼ́ LÓ
Nyimá ààla gbò bíb e gbò nen ólò bọọgẹ̀ bĩiná ea kil ló gè tã̀àgã ló Bàrì.
“Seven Things You Need to Know About Prayer” (Kpá Tọ Kùdẽe Ló, October 1, 2010)
Nyimá nú ea náa vaá à bọ́ló kọ ó tã̀àgã ló Bàrì, nè bé eo é láá kpáá tãàgã ló Bàrì mm̀ sĩ́deè ea é dú lé naa.
Nyimá nú e Kpá Káí kọ́ kilma ló nen ea bọ́ló kọ é tã̀àgã ló.
Mm̀ nakà sọ́lí, nyimá be à gá náa à íe kiẽ́e àbèè tṍó ea bọ́ló kọ é tã̀àgã ló Bàrì.
