ƝAAKWƐLƐI 09

Yálá hwɛliɛ a ka Yálá ka wɔ ɓəlannaa huwala-wala

NWOO MƐN

Ə́ wɔ yɛnɛɛ hu, yaa ta ɲaakaa yɛ́ ma ə́ maakpaan gaa tənəndɔɔɓo ɓa ? Kɛɛmaalən nwala-walaɠaa kaa ə́ yəi, diɛi ə́ kaa bɔ ə́ di mukulaaɠaa hɔlɔɓo ? Ə́ maakpaan gaa hwaŋalɔ ɓa ? Ə́ kaa bɔ ə́ maa ə́ kɛ a nɛɠɛɛ Zehova ɓa kpɔ kɛnɛ ? Yálá hwɛliɛ a pɛli ə́ kpɔnmaa tɛɛ ə́ pɔ mɛniɠaa tii kəlee hu. Kɛlɛɛ Yálá hwɛli pələ leelee a kɛ ləi ? Yálá a mɔɔn nwəlitɔɔ hwɛliwoo kəlee ɓa ? Mɛni ləkɛɛɠaa ɓə ya pɛli gɛi ə gɛ Yálá yɛ pɛli nwəlitɔɔi ə́ wɔ hwɛliwooɠaa diɛ ? Gu kaa pai gɛɛmaalənŋaa ŋɛi mukulaaɠaa hɔlɔɓoi ɲaakwɛlɛi ŋɛi hu.

1. Gbɛɛ ɓə maanɛɛ gu vɛli, ə lɛɛ lə mɛniɠaa ɓə gwa pɛli moi gu wɔ hwɛliwooɠaa hu ?

Zesu ə mo yɛ ma gu Nan Yálái yələkɔlɔn ɉu, ya lɔ ɓə maanɛɛ gu vɛli. Zehova ɓə Zesu yaa kpinii ə kɛi vɛli. Ə mo yɛ ma bələi maanɛɛ ka Yálá hwɛli la bələ ka : “ ka kɛ ma ku Nán yɛ́i ə́ kaa yələkɔlɔn ɉu ” (Matie 6:9). Gwa kɛi Zehova hwɛli, yili a gwa diɛni gu wɔ nɛɛlaa huwala-wala.

Gwa kɛi Yálá hwɛli, gwa pɛli gu mɛni lɔpee gəlee hu hwɛli ma, akɛ gaa a niiɓa. Gwa gɛ tii a nwəlitɔɔ gu wɔ hwɛliwoo ɓa. “ Gwa hɛn da hwɛli ma yaa kpinii niiɓa hu, a nwəlitɔɔ gu woo ɓa ” (Ɉaan dɔlɔɔ 5:14). Mɛniɠaa gwa pɛli Yálá hwɛlii ɉu, Zesu ə gɔɔmaaɠaa tɛɛ (Matie 6:9-13 ɓo). Pələi ma gwa pɛli gu maakpaanŋaa laahəlii la ma, maahonɛɛli mɛniɠaa aa gɛ guɔ, gu ho lea mamaɓoi. Ə lɛɛ maahonɛɛli gu ho lea vɛlii nu takpɛliɠaa maamɛni ɓa.

2. Gwa pɛli Yálá hwɛlii ləi ?

Biblə a gu hwaŋalɔ gu gu kwəi mɛni kəlee hukulɔ Yálá ɓa (Maatɛnɛ 62:9 [62:8, NWT]). Yili ɓa yii kpɔ gaa gu kwəi ya ɓə maanɛɛ guɔ mo gu wɔ hwɛliwooɠaa hu. Gwa pɛli gu Yálá hwɛli a gu woo kɛnɛ, awala kɛtii gu vɛli gu nii hu. Guɔ gu pu gu kpəli na, guɔ gu kɛ heeni, guɔ gu kɛ tɔɔni, yii lɔ maamɛni wala-walaa, ya ɓaa gu vɛli a maawiɛlaa. Gwa pɛli vɛlii a lowai lɔpee, da ɓɛi lɔpee.

3. Yálá a gu wɔ hwɛliwooɠaa mu hon ləi ?

A yili kɛ a kpaalə tamaa. Zehova aa Biblə tɛɛ gu pɔ. Gaa a hɛɓɛ yii gu wɔ kɛɛmaalənŋaa mukulaaɠaa kaa ɉu. Ya kɛi Biblə ɓo, “ a pɛli ə́ kili tɛɛ ə́ pɔ ” (Timote veelɛ 3:15 ; Ɉakə 1:5 ɓo). Gwa kɛ mɛni wala-walaɠaa hu a pɛli ə gu liilaa guɔ. A pɛli ə tɛɛ matoonua kɔwɔi di kpɔnmaa tɛɛ gu pɔ ɓɛlowai gwa kɛ la kpaan ɉu.

Ə́ WƆ MƐNIKƆLƆNŊAA TA PƐLƐ MA

Gaa pələi ya pɛli Yálá hwɛlii la a kpaalə ta yii nwɛli a pɛli too ma, ə lɛɛ pələi ya Yálá hwɛliɛ pulu mɛinɛɛɠaa hɔlɔɓo la.

4. Mɛniɠaai maanɛɛ gu gɛ, gwa kɛ bɔ Yálá ə nwəlitɔɔ gu wɔ hwɛliwoo ɓa

Gwa kɛ bɔ Yálá ə nwəlitɔɔ gu wɔ hwɛliwoo ɓa, mɛni ləkɛɛɠaa ɓə maanɛɛ gu gɛ ? VIDIO kaa.

VIDIO : Yálá a nwɛlitɔɔ hwɛliwoo kəlee ɓa ? (Vidio naa ta) (2:42)

Zehova kaa bɔ guɔ vɛli yaa tɔnɔ gbən. Maatɛnɛ 65:3 ɓo [65:2, NWT], ə lɛɛ ka lono kɛ gɛɛmaalənŋaa ŋɛi mɛi.

Ə́ wɔ kili ɓa Yálái ‘ a nwəlitɔɔ hwɛliwoo ɓa, ’ gaa bɔ yɛ́ vɛli ? Lə mɛni ɓa ə́ kaa kɛi ma ee, awala kɛtii kpaa ?

Gwa kɛ bɔ Yálá ə nwəlitɔɔ gu wɔ hwɛliwoo ɓa, maanɛɛ guɔ hiɛ a ŋɔ kpaaləɠaa. Mise 3:4 ɓo da Piɛrə dɔlɔɔ 3:12, ə lɛɛ ka lono kɛ gɛɛmaalən ŋɛi mɛi :

Lə ɓə maanɛɛ gu gɛ, ə gɛ Yálá ə nwəlitɔɔ gu wɔ hwɛliwoo ɓa ?

Kɔ a too, gɔkɔnua bələ hweelɛi kəlee da kɛ Yálá hwɛlii, ə gɛ Yálá ə yeetɛɛmaalaa tɛɛ di pɔ. Ə́ wɔ kili ɓa Yálá a pɛli ɲəi heei vɛliwooɠaa tii kəlee mu ?

5. Maanɛɛ gu wɔ hwɛliwooɠaa yɛ həɠə gu nii hu

Daa mo nu tamaa ɓa diɛ ma da kɛi Yálá hwɛli maanɛɛ diɛ hwaa tamaa ɓo, awala kɛtii diɛ ɓə lɔ mɛni tɔnɔ ɓa diɛ mo. Akɛtii pələ ɓə mɔɔn Yálá kaa bɔ guɔ vɛli la ? Matie 6:7 ɓo, ə lɛɛ ka lono kɛ gɛɛmaalən ŋɛi mɛi.

Ya kɛi Yálá hwɛli ya tɛɛ ləi ‘ hó hwaa tamaa ɓo awala kɛtii yɛ́ ɓə lɔ mɛni tɔnɔ ɓa yɛ́ mo ’ ?

Holo kəlee ə́ kiliŋahiɛ mɛni lɛlɛɛ ta ɓa yii aa həli yɛ́, ə lɛɛ ə́ Zehova mamaɓo mɛnii tii maamɛni ɓa. Ya kɛi gɛ tii holo kəlee, ə lɛɛ la ɉu lɔwɔ tɔnɔ, ə́ kaa pai pɛlii Yálá hwɛlii mɛni mɛihweelɛ maamɛni ɓa, hɛnigɛ yɛ́ ɓə lɔ mɛni tɔnɔ ɓa yɛ́ mo.

Longaanan yii ŋɔ mɛni lɛlɛɛ, gaa bɔ non ə gwəi mɛni leelee ɓo ma. Pələ lɔ ɓə Zehova yaa kpɛliman gaa la. A kɛ bɔ gwa kɛi vɛli, gu gu kwəi mɛni leelee ɓo ma.

6. Yálá hwɛliɛ kaa a mɛinɛɛ yii a həɠə Yálá yəi

Yálá hwɛliɛ a pɛli kpɔnmaa tɛɛ ləi gu pɔ, gəlee ə ma gɛ gwa kɛ ɲɛikɔu kpɔli mɛni hu ? VIDIO kaa.

VIDIO : Yálá hwɛliɛ a pɛli kpɔnmaa tɛɛ gu pɔ gu tɔɔ kpaan (1:32)

Biblə a mo guɔ yɛ ma Yálá hwɛliɛ a pɛli ə liilaa leelee tɛɛ gu pɔ. Filipə 4:6, 7 ɓo, ə lɛɛ ka lono kɛ gɛɛmaalənŋaa ŋɛi mɛi :

Yálá hwɛliɛ a pɛli kpɔnmaa tɛɛ ləi gu pɔ, bələi ma hwa gu maamɛniɠaa kəlee ɲɛikulɔ la a lowai kəlee ?
Mɛni taɠaa hwaaɓo yii ya pɛli ə́ mo ə́ wɔ hwɛliwoo hu ?

Ə́ kili kaa ɉu ?

“ Miina ” mukulaa ɓaa “ ə kɛ tii ” awala kɛtii “ bɔ mɛni ə kɛ. ” Biblə a mo, yɛ ma ɉu aa wɔlɔ kwea Yálá ɓatoonua da kɛ kɛi ma “ miina ” di wɔ hwɛliwooɠaa laakulɔi (Maatɛnɛ 106:48).

7. Kɛ́ lowai həɠəi yɛ́ Yálá hwɛli

A kɛ a lowai taɠaa gu maamɛniɠaa di tama kpɔ kɛnɛ, ə lɛɛ yili ə gɛ gu lea Yálá hwɛli mɛni ɓa. Yálá hwɛliɛ maamɛni wala-walaa kɛ ləi Zesu ɲɛi mu ? Matie 14:23 da Markə 1:35 ɓo, ə lɛɛ ka lono kɛ gɛɛmaalənŋaa ŋɛi mɛi :

Lə ɓə Zesu ə kɛi gɛ yii yaan yɛ lowai hɔlɔɓo yɛ Yálá hwɛli ?
Lowai ləkɛɛ ɓə ya pɛli ɉəɠəi ɉu yii yaan yɛ́ Yálá hwɛli ?

NUTAƓAA DA KƐ KƐI MA : “ Yálá hwɛliɛ kaa a lowai hukulaa, maahɔlɔɓo nu lɔpee ta hwa kɛ nwəlitɔɔ hwɛliwoo ɓa. ”

Nuta a mo tii yɛ́, lə ɓə ə́ kaa pai moi ?

YII GU GALAN

Gwa kɛi gu kwəi mɛni leelee ɓo Yálá ɓa hwɛliwoo hu, a gwa diɛ ni gu wɔ ɓəlannaa huwala-wala, ə liilaa leelee tɛɛ gu pɔ, vaŋai gu maakpaan gaa ma, guɔ pɛli niiɓa kɛi, a yili maa hwaŋaai tɛɛ gu pɔ.